Мидхъуыддæгты министрад хъусын кæны

21-æм сентябрæй 28-æм сентябрмæ Хуссар Ирыстоны территорийыл фыдракæнд не ‘рцыд. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы. Уымӕй уӕлдай ма республикӕйы фӕндӕгтыл ӕрцыд æртæ фæндагон-транспортон цауы. Авариты фæстиуæгæн рынчындонмæ алыгъуызон цӕфтимӕ бахаудтой æртæ адæймаджы.

Фæндагон змæлды æдасдзинады инспекци къуырийы дæргъы сбæлвырд кодта 187 фæткхалæн цауы. Уыдонæй 8 уыдысты нозтджынæй машинæ скъæрыны цаутæ.

Ӕхсæнадон фæтк фехалыны фæстиуæгæн Цхинвалы районы милицийы управленимæ конд æрцыд иу æмбæстаг.

Наркотикты æрзылдыл контроль кæныны управленийы кусджытæ оперативон информацийы фæдыл басгæрстой нæ горæты 30-аздзыды хæдзар æмæ дзы ссардтой цъæх кæрдæджы ссадæг, кæцы разынд «марихуана».

Горæт Цхинвалы Дзаттиайы фырты уынгыл доны хæтæлтæ ивыны рæстæджы 34-аздзыд бынæттон цæрæг зæххы бын ссардта 5 минæ-йы. Сапертæ минæты раластой полигонмæ, цæмæй сæ скуынæг кæной. 

Ленингоры районы Ахмадзы хъæуы 20-аздзыд, Коринты хъæуы 63-аздзыд æмæ Миделаны хъæуы 27-аздзыд цæрджыты æрцахстой Ленингоры районы арæнхъахъхъæнджытæ. Фæткхалджытæ æрвыст æрцыдысты карантинмæ Ленингоры рынчындонмæ 14 боны æмгъуыдмæ.

Знауыры районы Схлиты хъæуы 67-аздзыд цæрæг нозтджынæй нæ сарæхст йæ автомашинæ «ГАЗ-3110» скъæрын, фехæлдта фæндагон фæткойтæ æмæ Цхинвал-Знауыры фæндаджы 1-æм километры сæмбæлд æндæр автомашинæ «Mercedes-С200»-ыл, кæцыйы шофыр та разынд Цхинвалы районы Къостайыхъæуы 36-аздзыд цæрæг. Аварийы фæстиуæгæн ма бахъыгдард ис ноджы иу автомашинæ.

23-æм сентябры Цхинвалы районы Къостайыхъæуы æрцыд фæндагон-транспортон цау. Горæт Ӕрыдоны 46-аздзыд цæрæг нæ сарæхст йæ автомашинæ «Лада Гранта» скъæрын, фехæлдта фæндагон фæткойтæ æмæ сæмбæлд бæласыл. Аварийы фæстиуæгæн шофыр æмæ йæ бæлццон, Цхинвалы районы Къостайыхъæуы 66-аздзыд цæрæг, алыгъуызон цæфтимæ бахаудтой рынчындонмæ. Шофыр нæ бакуымдта медицинон басгæрстмæ æмæ нымад æрцыд нозтджыныл.

Къуайса-Гуфтайы фæндагыл 30-æм километры Цхинвалы районы Дменисы хъæуы 24-аздзыд цæрæг нæ сарæхст йæ автомашинæ «ВАЗ-2114» скъæрын æмæ сæмбæлд æфсæйнаг æмбондыл. Шофыр алыгъуызон цæфтимæ бахаудта рынчындонмæ.