11 декабрӕй 18 декабрмӕ Хуссар Ирыстоны территорийыл ӕрцыд иу фыдракæнд ӕмӕ раргом ис. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы. Уымӕй уӕлдай ма республикӕйы фӕндӕгтыл ӕрцыд дыууӕ аварийы. Хъыгагӕн, иу аварийы фӕмардис адӕймаг.
Алыгъуызон бархалыны фӕдыл горӕты милицийы управленийы кусджытӕ бӕрндзинадмӕ ӕркодтой дыууӕ адӕймаджы.
Фæндагон змæлды æдасдзинады инспекци къуырийы дæргъы сбæлвырд кодта 357 фæткхалæн цауы. Уыдонæй 10 шофыры разындысты нозтджынтӕ кӕнӕ та уыдысты наркотикты ӕндӕвдады бын.
14 декабры 79-аздзыд бынæттон цæрæг, фæндаджы иннæ фарсмæ хизгæйæ, бахаудта автомашинæйы бын, кæцыйы шофыр разынд нæ горæты 21-аздзыд цæрæг. Аварийы фæстиуæгæн фистæг бæлццон райста алыгъуызон цæфтæ æмæ рынчындоны амард.
14 декабры нæ горæты 62-аздзыд цæрæг милицимæ бахаста æхсæнгарзы нæмгуытæ 300 фылдæр. Куыд бамбарын кодта, афтæмæй йæм ацы нæмгуытæ баззадысты 2008 азы хæстæй.
Наркотикты ӕрзылдыл контроль кӕныны кусджытӕ, Дзауы районы Гуфтайы хъæуы стационарон посты рейдон мадзæлттæ уадзгæйæ, баурæдтой 46 æмæ 30-аздзыд горæттаг цæрджыты, кæцытæм сæ зæрдæ фехсайдта наркотиктæй спайда кæнынмæ. 46-аздзыд цæрæгæн медицинон басгæрсты рæстæджы рабæрæг, кæй спайда кодта наркотикон буарадтæй æмæ психотропон препараттæ метадон, экстази, амфетамин, бензодиазепин æмæ лирикайæ. 30-аздзыд фæткхалæг медицинон басгæрстмæ нæ бакуымдта æмæ йæ тæрхондон фæивар кодта.
Цхинвалы районы милицийы управленийы кусджытæ баурæдтой Тъбеты хъæуы 49-аздзыд цæрæджы, кæцы спайда кодта метадон æмæ марихуанайæ. Баурæдтой ма ноджы ӕртӕ ӕмбӕстаджы марихуанайæ спайда кæныны тыххæй. Уымæй уæлдай ма Дзауы районы милицийы управленийы кусджытæ баурæдтой Гуфтайы хъæуы 50-аздзыд æмæ горæт Къуайсайы 35-аздзыд цæрджыты, кæцытæ спайда кодтой марихуанайæ. Горӕт Цхинвалы милицийы управленийы кусджытӕ та баурӕдтой 49-аздзыд бынӕттон цӕрӕджы, кӕцымӕ сӕ зӕрдӕ фехсайдта наркотиктӕй спайда кӕнынмӕ. Фӕткхалӕг нӕ ба-куымдта медицинон басгӕрстмӕ ӕмӕ йӕ тӕрхондон фӕивар кодта.
