Хетӕгкаты Къостайы номыл паддзахадон драмон театры уыд Республикӕ Хуссар Ирыстоны Президенты цур ирон национ зарӕджы хор, РХИ-йы Культурӕйы министрады цур хореографион скъола-студийы ансамбль «Кафт» ӕмӕ Республикӕ Цӕгат Ирыстон-Аланийы паддзахадон филармонийы адӕмон зарды ӕмӕ уадынгӕрзты къорд «Уацамонгӕ»-йы иумæйæг концерт. Сӕ аивадӕй уыдон тынг барухс кодтой залмӕ ӕрбацӕуджыты зӕрдӕтӕ. Адӕмон, хъайтарон ӕмӕ лирикон зарджытӕ зæлыдысты театралон залы. «Хъуыбады», «Цӕргӕс базӕронд», «Хъӕлдзӕг зарӕг», «Нартыхты Сосойы зарӕг», «Чызгай», «Хосдзӕутты зарӕг», «Зӕронд тулдз бӕлас» ӕмӕ ӕндӕртӕ зæрдæтæ агайдтой, цин æмæ урс хъыгтæй æнкъарæнтæ дзы æвзарын кодтой. Уымæн сыл афтæ зæрдиагæй æмбæлдысты концертмæ æрбацæуæг адæм.
Ирон лӕджы цард фыдӕлтӕй фӕстӕмӕ уыдис хӕцӕнгарзимӕ баст. Уымӕй дарддӕр ма æнӕмӕнгæй йæ царды уыдысты кафт ӕмӕ зард дӕр. Нæ адæмон сфӕлдыстады кафты æгъдау ӕмӕ хӕцӕнгарзы дӕсныдзинад æмдзу кодтой.
Концерты хуыздæр хореографион номыртæ уыдысты композицитæ «Хъаматимӕ кафт» æмæ «Скифаг мотивтӕ». Уæдæ «Абхазаг кафт», «Рог кафт», «Симд», «Хонгӕ кафт» ӕмӕ ӕндӕртыл дæр фау æрæвæрæн нæ уыд. Цæгатирыстойнаг ансамбль «Уацамонгӕ» иу ӕмӕ дыууӕ хатты нӕ фӕуазӕг Хуссар Ирыстонмӕ. Уымӕ гӕсгӕ сӕ аивадимӕ хорз зонгӕ сты хуссарирыстойнаг сценӕмӕкӕсджытӕ. Æмæ та «Уацамонгæйы» музыканттæн бантыст адæмы зæрдæтæ барухс кæнын.
Аивадон коллективтӕ сӕ арӕхстдзинад бӕрзонд ӕмвӕзадыл кӕй ӕвдыстой, уый бӕрӕг уыд залмӕ ӕрбацӕуджыты тыхджын къухӕмдзӕгъдӕй дӕр. Нӕ горӕты цӕрӕг Зассеты Альбинӕйы ацы концертмӕ фӕхуыдта йӕ чызг ӕмӕ дзы сылгоймаг райста стыр ӕхцондзинад: «Ахӕм фӕсивӕдмӕ кӕсгӕйӕ адӕймаджы зӕрдӕ сӕрыстырдзинады ӕнкъарӕнтӕй байдзаг вӕййы. Сӕ архайд ӕмӕ фезмӕлдӕй ирдӕй ӕвдыстой, ирон культурӕ кӕй уарзынц ӕмӕ йын кӕй аргъ кӕнынц, уый».
Хореографион скъоластудийæн бындур æвæрд æрцыд 2000-æм азты. Ныртæккæ йӕ разамонӕг у Хуссар Ирыстоны ӕмӕ Абхазы сгуыхт артисткӕ, Хуссар Ирыстоны адæмон ахуыргæнæг Майя Четион. Студийы ахуырдзаутӕ арӕх райсынц призон бынӕттӕ алыгъуызон конкурсты, йӕ рауагъдонтӕй бирæтæ систы ӕнтыстджын артисттӕ.
Нӕ уацх.
