26 июнæй 3 июлмæ Хуссар Ирыстоны территорийыл æрцыдис дыууæ фыдракæнды æмæ дзы иу раргом ис. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы. Республикæйы фæндæгтыл æрцыдис æхсæз фæндагон-транспортон цауы. Авариты фæстиуæгæн рынчындонмæ алыгъуызон цæфтимæ бахаудтой цыппар адæймаджы – æртæ дзы разындысты æнæххæст кары сывæллæттæ.
Алыгъуызон бархалынæдты фæдыл горæты милицийы управленийы кусджытæ бæрндзинадмæ æркодтой 8 адæймаджы.
Фæндагон змæлды æдасдзинады инспекци къуырийы дæргъы сбæлвырд кодта 334 фæткхалæн цауы. Уыдонæй 12 уыдысты нозтджынæй машинæ скъæрыны цаутæ.
27 июны горæт Цхинвалы Советон уынгæй Плиты Иссæйы уынгмæ азилæны 7-аздзыд сывæллон бахаудта автомашинæйы бын. Аварийы фæстиуæгæн æнæххæст кары сывæллон алыгъуызон цæфтимæ бахаудта рынчындонмæ. Шофыр разынд нæ горæты 23-аздзыд цæрæг.
28 июны Криминалон милицийы кусджытæ Знауыры районы милицийы управ-ленийы кусджытимæ иумæ оперативон информацийы фæдыл басгæрстой Знауыры поселочы 40-аздзыд цæрæджы хисæрмагонд хæдзар. Басгæрсты рæстæджы цæхæрадоны ссардтой 9 гæны къутæры, кæцыты сконды ис наркотикон буарадтæ.
28 июлы горæт Цхинвалы милицийы управленийы кусджытæ рейдон мадзæлттæ ауадзыны фæстиуæгæн иу дуканийы баййæфтой энергетикон нозтытæ 69 банкæйы æмæ сæ сконфискаци кодтой. Дуканийы хицау разынд 43-аздзыд бынæттон цæрæг æмæ йыл арæзт æрцыд административон суагъæ. Энергетикон нозтытæ ма ссардтой æндæр дуканийы дæр, æмæ ууыл дæр баконд æрцыд административон суагъæ.
29 июны Гуфтайы хъæуы милицийы стационарон посты баурæдтой автомашинæ «Лада Гранта», кæцыйы шофыр разынд РЦИ-Аланийы Джызæлы хъæуы 34-аздзыд цæрæг. Басгæрсты рæстæджы машинæйы ссардтой 8 пакеты, дымгæ кæй нæ кæнынц, ахæм тамако «снюс». Шофыр æмæ йæ бæлццон, горæт Дзæуджыхъæуы 33-аздзыд цæрæг, урæд æрцыдысты.
30 июны Хуссар Ирыстонæй Уæрæсейы Федерацимæ сэкстрадици кодтой нæ горæты дыууæ бынæттон цæрæджы, кæцыты аххосджын кæнынц уæззау фыдракæнд саразыны. Уголовон хъуыддаджы фигуранттæ 2007 азы горæт Иркутскы амардтой дыууæ адæймаджы æмæ уæдæй нырмæ æмбæхсынц барадхъахъхъæнæг органтæй. Ӕрæджы уæрæсейаг слестгæнæн органтæ бахатыдысты сæ хуссарирыстойнаг коллегæтæм, цæмæй сын баххуыс кæной фыдгæнджыты сбæлвырд кæныны хъуыддаджы. Майы мæйы РХИ-йы Мидхъуыддæгты министрады уголовон фæдагуырды кусджытæ Информацион-координацион центры кусджыты æххуысæй сбæлвырд кодтой æмæ æрцахстой ацы дыууæ æмбæстаджы.
30 июны Цхинвалы районы милицийы кусджытæ рейдон мадзæлтты рæстæджы Цхинвал-Къостайыхъæуы фæндагыл баурæдтой зæрдæхсайгæ автомашинæ «Lexus IS250», кæцыйы шофыр разынд нæ горæты 23-аздзыд цæрæг. Шофыр разынд нозтджын æмæ ма спайда кодта марихуанайæ дæр.
1 июлы горæт Цхинвалы æрцыд фæндагон-транспортон цау. 17-аздзыд бынæттон цæрæг нæ сарæхст йæ мотоцикл скъæрын æмæ сæмбæлд автомашинæйыл. Аврийы фæстиуæгæн æнæххæст кары сывæллон алыгъуызон цæфтимæ бахаудта рынчындонмæ.
2 июлы 2020 азы гуырд сывæллон бахаудта автомашинæйы бын æмæ райста уæззау цæфтæ. Шофыр разынд 29-аздзыд бынæттон цæрæг.
Арæнхъахъхъæнджытæ Цхинвалы районы Гудзабары хъæумæ ввахс баурæдтой автомашинæ «Dodge Caliber», кæцыйы шофыр разынд нæ горæты 38-аздзыд цæрæг. Басгæрсты рæстæджы, йæм ссардтой марихуана. Медицинон басгæрсты рæстæджы ма рабæрæг, фæткхалæг кæй спайда кодта марихуанайæ. Автомашинæйы ма бадт бæлццон дæр, 44-аздзыд горæттаг цæрæг. Медицинон басгæрсты фæстиуæгæн рабæрæг ис, уый дæр марихуанайæ кæй спайда кодта.
Цхинвалы районы милицийы управленийы кусджытæ баурæдтой горæт Дзæуджыхъæуы 38-аздзыд цæрæджы, кæцы спайда кодта марихуанайæ. Сæ зæрдæ ма фехсайдта 22-аздзыд горæт Цхинвалы æмæ 47 æмæ 34-аздзыд Цхинвалы районы Тбеты хъæуы цæрджытæм дæр, фæлæ фæткхалджытæ нæ бакуымдтой медицинон басгæрстмæ. Милицийы наркотикты ӕрзылды контроль кӕныны управленийы кусджытӕ та баурæдтой горæттаг 46-аздзыд цæрæджы, кæцымæ сæ зæрдæ фехсайдта наркотиктæй спайда кæнынмæ. Фæткхалæг нæ бакуымдта медицинон басгæрстмæ æмæ йын горæт Цхинвалы тæрхондон стæрхон кодта ахæстоны сбадын иу мæйы æмгъуыдмæ.
