6 ноябрæй 13 ноябрмæ Хуссар Ирыстоны территорийыл ӕрцыд ӕртӕ фыдракæнды ӕмӕ раргом сты. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы. Къуырийы дæргъы республикæйы фæндæгтыл æрцыдис дыууӕ фæндагон-транспортон цауы. Авариты фæстиуæгæн рынчындонмæ алыгъуызон цæфтимæ бахаудтой дыууӕ адæймаджы.
Алыгъуызон бархалæн цауты фӕдыл горӕты милицийы управленийы кусджытӕ бӕрндзинадмӕ ӕркодтой 11 адӕймаджы – цыппарӕй дзы разындысты ӕнӕххӕст кары сывӕллӕттӕ.
Фæндагон змæлды æдасдзинады инспекци къуырийы дæргъы сбæлвырд кодта 299 фæткхалæн цауы. Уыдонæй 13 шофыры разындысты нозтджынтӕ, кӕнӕ та уыдысты наркотикты ӕндӕвдады бын.
6 ноябры горæт Цхинвалы автомашинæйы бын бахаудта Къостайыхъæуы 41-аздзыд цæрæг, кæцы фæндаджы иннæ фарсмæ хызт æнæмбæлон бынаты. Аварийы фæстиуæгæн фистæг бæлццон ноджы бахаудта æндæр цæугæ хæдтулгæйы бынмæ. Алыгъуызон цæфтимæ йæ аластой рынчындонмæ.
9 ноябры изæрӕй милицимæ фехъусын кодтой, зæгъгæ, ресторан «Бынæттон»-мæ ‘ввахс кардæй кæйдæр ныццавтой. Бынатмæ ссыдысты милицийы кусджытæ æмæ сбæлвырд кодтой, – 34-аздзыд бынæттон цæрæг тыхми бакодта 50-аздзыд горæттаг цæрæгæн æмæ сылгоймаджы лæппу, 22-аздзыд бынæттон цæрæг, кардæй ныццавта фыдгӕнӕджы. Дыууӕ ӕрыгон адӕймаг дӕр урӕд ӕрцыдысты. Кардæй кӕй ныццавтой, уый аластой рынчындонмæ медицинон ӕххуыс бакӕныны тыххӕй. Медицинон басгæрст ма куыд сбæрæг кодта, афтæмæй фыдгæнæг разынд нозтджын æмæ ма спайда кодта марихуанайæ дæр.
Цхинвалы районы милицийы кусджытæн рейдон мадзæлттæ уадзыны рæстæджы баурæдтой автомашинæ, кæцыйы шофырмæ сæ зæрдæ фехсайдта наркотиктæй спайда кæнынмæ. 26-аздзыд шофыр нæ бакуымдта медицинон басгæрстмæ, фæлæ йемæ бæлццон уыд æмæ уымæн рабæрæг марихуанайæ спайда кæныны факт.
Горæт Цхинвалы æмæ Дзауы районы милицийы кусджытæ дæр баурæдтой 40 æмæ 39-аздзыд æмбæстæгты, кæцытæ спайда кодтой марихуанайæ. Наркотикты æрзылды, контроль кæныны управленийы кусджытæ дӕр баурæдтой 37-аздзыд бынæттон цæрæджы, кæцы спайда кодта метадонæй æмæ марихуанайæ. Уымæй уæлдай ма баурæдтой 43-аздзыд горæттаг цæрæджы марихуанайæ спайда кæныны тыххæй. 48 æмæ 44-аздзыд æмбæстæгтæ та нæ бакуымдтой медицинон басгæрстæмæ æмæ сæ тæрхондон фæивар кæндзæн.
