«Республикæ Хуссар Ирыстон æмæ Луганскы Адæмон Республикæйы ‘хсæн

хæлардзинад, æмгуыстад æмæ кæрæдзийæн æххуысы фæдыл

Сразыдзинад сратификаци кæныны тыххæй» РХИ-йы Закъоны тыххæй

Республикæ Хуссар Ирыстоны  Парламент уынаф-фæ кæны:

1. Ист æрцæуæд «Республикæ Хуссар Ирыстон æмæ Луганскы Адæмон Республикæйы ‘хсæн хæлардзинад, æмгуыстад æмæ кæрæдзийæн æххуысы фæдыл Сразыдзинад сратификаци кæныны тыххæй» РХИ-йы закъон.

2. Ацы закъон æрвыст æрцæуæд РХИ-йы Прези-дентмæ къух ыл æрфыссын æмæ йæ ныммыхуыр кæныны тыххæй.

3. Ацы Уынаффæ йæ тыхы цæуы йæ райсыны бонæй.

Республикæ Хуссар Ирыстоны Парламенты Сæрдар ГАССИТЫ Петр

г.Цхинвал, 2019 азы 28 март

РЕСПУБЛИКÆ ХУССАР ИРЫСТОНЫ ЗАКЪОН

Республикæ Хуссар Ирыстон æмæ Луганскы Адæмон

 Республикæйы ‘хсæн хæлардзинад, æмгуыстад æмæ кæрæдзийæн

æххуысы фæдыл Сразыдзинад сратификаци кæныны тыххæй

Ратификаци æрцæуæд Респуб-ликæ Хуссар Ирыстон æмæ Лу-ганскы Адæмон Республикæйы ‘хсæн хæлардзинад, æмгуыстад æмæ кæрæдзийæн æххуысы фæдыл Сразыдзинад, кæцыйыл къухтæ фыст æрцыд 2018 азы 19 декабры.

Республикæ Хуссар ирыстоны президент Бибылты Анатоли

г.Цхинвал, 2019 азы 4 апрель

БАДЗЫРД

Республикӕ Хуссар Ирыстон ӕмӕ Луганскы Адӕмон Республикӕйы ‘хсӕн хӕлардзинад,

ӕмгуыстад ӕмӕ кӕрӕдзийӕн ӕххуыс кӕныны тыххӕй

Республикæ Хуссар Ирыстон ӕмӕ Луганскы Адӕмон Республикӕ, дарддӕр – Бадзурӕг Фӕрстӕ,

Республикӕ Хуссар Ирыстон ӕмӕ Луганскы Адӕмон Республикӕйы ‘хсӕн хӕларадон ахастытӕ, ӕмгуыстад ӕмӕ кӕрӕдзийӕн ӕххуыскӕнынад фидардӕр кӕныны хъуыддаг, дыууӕ паддзахадты адӕмты бындурон национ интерестӕн дзуапп кӕй ратдзӕн, уымӕй ныфс ӕвӕргӕйӕ,

ног политикон реалитӕ хынцгӕйӕ, кӕрӕдзийы хӕдбар-дзинад ӕмӕ суверенитет ӕмхуызонӕй кӕй нымайдзысты, уый бафидар кӕнгӕйӕ,

кӕрӕдзимбарынад, рӕстдзинад, ӕмбардзинад ӕмӕ кӕрӕдзийы мидӕггагон хъуыддӕгты хи нӕ хӕццӕ кӕныны бындурыл се ‘хсӕнпаддзахадон ахастытӕ аразынмӕ тырнгӕйӕ,

политикон, базарадон-экономикон, социалон-гуманитарон, культурон ӕмӕ ӕндӕр къабӕзты сӕ ахастытӕ активонӕй рӕзын кӕныны фӕндонимӕ, ӕхсӕнадӕмон барады принциптӕ ӕмӕ нормӕтӕм, фыццаграды, ИНО-йы Уставы нысӕнттӕ ӕмӕ принциптӕн кӕй аргъ кӕнынц, уый бафидар кӕнгӕйӕ, сӕ ахастытӕ ног гъæдджын æмвæзадмæ скӕныны фæндонимæ, бадзырдтой дӕлдӕруӕвӕгыл:

Уац 1

Бадзурӕг Фӕрстӕ сӕ ахастытӕ араздзысты куыд хӕларадон, ӕмбар ӕмӕ суверенон паддзахадтæ, афтӕ, фӕд-фӕдылонӕй къухдариуӕг кӕндзысты паддзахадон суверенитет ӕмӕ территориалон ӕнӕхъӕндзинад иумӕйагӕй нымайыны принциптӕй, быцӕутӕ ӕмӕ тыхбахастӕй кӕнӕ тыхӕй спайда кӕныны тасдзинад сабырӕй бӕстон кӕнгӕйӕ, экономикон ӕмӕ ӕндӕр фадӕттӕй ӕндӕвдад сӕм бафтаугӕйӕ, ӕмбардзинад ӕмӕ мидӕггагон хъуыддӕгты хи нӕ хӕццӕ кӕнгӕйӕ, адӕймаджы бартӕ ӕмӕ бындурон сӕрибардзинӕдтӕ хъахъхъӕнгӕйӕ, ӕхсӕнадæмон хӕсистытӕ намысджынӕй ӕххӕст кӕнгӕйӕ, афтӕ ма ӕхсӕнадӕмон барты иумӕйагӕй нымад принциптӕ ӕмӕ нормӕтӕм гӕсгӕ.

Уац 2

Бадзурӕг Фӕрстӕ ӕнгомӕй ӕмгуыстад кӕндзысты ӕддагон политикӕйы къабазы, ӕмархайд кӕндзысты сабырад ӕмӕ стабилондзинад, регионалон ӕмӕ глобалон ӕдасдзинад фидар кӕныны хъуыддаджы, ӕмӕ уыцы нысӕнттӕн регуляронӕн консультацитӕ уаддзысты ӕхсӕнадӕмон ӕмӕ регионалон проблемӕты фӕдыл, кӕцытӕм уа ӕмхуызон цымыдисдзинад. Уыдон сӕхимӕ хӕс исынц, Бадзурӕг Фӕрсты интерестӕм чи ныхила, ахӕм регионалон конфликттæ  ӕмӕ  ӕндӕр  уавӕртӕ ӕрбӕстон кӕнынӕн чи ахъаз кӕна, ахӕм скоординацигонд архайдтытӕй спайда кӕныны тыххӕй.

Уац 3

Бадзурӕг Фӕрстӕ нымайынц быцӕуаг фарстатӕ скъуыддзаг кӕнгӕйӕ тыхӕй спайда кӕнын кӕнæ тыхӕй спайда кӕнынӕй ӕрдхъирӕнтӕ кӕныныл къух сисыны ахсджиагдзинады принцип, уыдон аскъуыддзаггӕнӕн кӕй ис ӕрмӕстдӕр сабырадон амӕлттӕ ӕмӕ политикон фӕрӕзтӕй, уый ӕмбаргӕйӕ.           

Бадзурӕг Фӕрстӕ хайад нӕ исдзысты, кӕцыфӕндыйы ныхмӕ дӕр сӕ чи уа, ахӕм цахӕмфӕнды блокты ӕмӕ цӕдисты.

Дыууӕ Бадзурӕг Фарсӕй алкӕцы дӕр йӕхи хиздзӕн, иннӕ Бадзурӕг Фарсы ныхмӕ комкоммӕ ӕви фӕрссагӕй чи уа, ахӕм цыфӕнды архайдтытӕ ӕмӕ мадзӕлтты дӕр хайад исынӕй.

Кӕд Дыууӕ Бадзурӕг Фарсӕй искӕцыйӕн гарзджын бабырстӕй тас уа, уӕд Дыууӕ Бадзурӕг Фарсы ӕвӕстиатӕй ӕрӕвналдзысты агресси аиуварс кӕныны мадзӕлттӕ бакусыны нысаны охыл ӕмбӕлон консультацитӕм.

Уац 4

Паддзахадон-барадон арӕзтадмӕ ахасты иумӕйаг нысӕнттӕ ӕмӕ ӕмвӕндондзинады бындурыл Бадзурӕг Фӕрстӕ уӕрӕхдӕр кӕндзысты реформӕтӕ уадзыны хайы фӕдыл кӕрӕдзийӕн фӕлтӕрддзинадӕй ӕххуыскӕнынад, сӕ национ хиӕдтӕ ӕмӕ сӕ ӕххӕст кӕныны спецификон хийӕдтӕ хынцгӕйӕ.

Уац 5

Бадзурӕг Фӕрстӕ алы ӕмвӕзадтыл уаддзысты фембӕлдтытӕ ӕмӕ консультацитæ кӕрӕдзийӕн информаци ӕмӕ фӕндӕттӕй ӕххуыс кӕныны нысанӕн, дыууӕварсон ӕмгуыстад ӕмӕ ӕхсӕнадӕмон ахастыты уӕлдай актуалон фарстаты фӕдыл кусдзысты ӕмразыгонд позицитыл, афтӕ ма ӕмхуызон цымыдисдзинад чи ӕвзарын кӕна, ахӕм ӕндӕр фарстаты фӕдыл.

Уац 6

Бадзурӕг Фӕрстӕ сӕ территоритыл исдзысты эффективон барӕнтӕ, ӕмбӕлон закъондӕттынадон акттӕ райсын дӕр сӕм бафтаугӕйӕ, цӕмӕй ма бауадзой ӕмӕ аиуварс кӕной цыфӕнды архайд дӕр, кӕцытӕн уа иннӕ Бадзурӕг Фарсы ӕмбӕстӕгтӕм тыхбахасты нысаниуӕг, уа сын националон, знӕмон, этникон кӕнӕ динон ӕнӕбыхсындзинады бындуртӕ, знагиуӕгон кӕнӕ ӕнӕуынондзинады нысӕнттӕ.

Уац 7

Бадзурӕг Фӕрстӕй алкӕцыйы территорийыл дӕр нымад цӕуынц документтӕ, кӕцытӕ радтой иннӕ Бадзурӕг Фарсы паддзахадон органтӕ ӕмӕ бынӕттон хӕдуынаффӕйадон органтӕ.

Ацы уацы банысангонд фарстатӕ бӕстон кӕныны ны-сӕнттӕн Бадзурӕг Фӕрстӕ ӕрфысдзысты хицӕн фидыдтӕ.

Уац 8

Дыууӕ Бадзурӕг Фарсӕй алкӕцы дӕр гаранти дӕтты йӕ территорийыл цӕрӕг иннӕ Бадзурӕг Фарсы ӕмбӕстӕгтӕн сӕ бартӕ ӕмӕ сӕрибардзинӕдтӕн ахӕм бындурыл ӕмӕ гуырахстӕй, куыд йӕхи сӕрмагонд ӕмбӕстӕгтӕм ахасты, дыууӕ Бадзурӕг Фарсы архайӕг закъондӕттынад ӕмӕ ӕндӕр ӕхсӕнадӕмон бадзырдты фидаргонд чи сты, ахӕм цауты йедтӕмӕ.

Бадзурӕг Фӕрстӕ сӕхимӕ исынц бӕрндзинад сфидаргонд фӕткмӕ гӕсгӕ се ‘мбӕстӕгты бартӕ ӕмӕ сӕрибардзинӕдтӕ хъахъхъӕныны тыххӕй, кӕцытӕ цӕрынц иннӕ Бадзурӕг Фарсы территорийыл.

Уац 9

Бадзурӕг Фӕрстӕ исдзысты ӕнӕмӕнгхъӕуӕг барӕнтӕ, сӕ паддзахадты – ӕмбӕстӕгты Бадзурӕг Фӕрсты территоритыл сӕрибарӕй бацӕуын, рацӕуын ӕмӕ уӕвынад ӕмхуызонӕй сифтонг кӕныны тыххӕй.

Уац 10

Бадзурӕг Фӕрстӕ тырндзысты алы ӕмвӕзадтыл экономикон интеграци арфдӕр кӕнынмӕ ӕмӕ уыцы нысӕнттӕн рӕзын кӕндзысты базарадон-экономикон ӕмгуыстад комкоммӕ базарадон ӕмӕ экономикон бастдзинӕдты бындурыл.

Бадзурӕг Фӕрстӕ сӕхимӕ хӕс исынц, цӕмӕй сифтонг кӕной хӕрзвадат финансон ӕмӕ барадон уавӕртӕ амалиуӕгад ӕмӕ ӕндӕр хӕдзарадон архайдӕн, инвестицитӕ иумӕйагӕй разӕнгард кӕнын ӕмӕ хъахъхъӕнын дӕр сӕм бафтаугӕйӕ, ӕмбӕстӕгтӕ, уагдӕттӕ, фирмӕтӕ ӕмӕ Бадзурӕг Фӕрсты экономикон ӕмгуыстады ӕндӕр субъектты ‘хсӕн кооперацийы алывӕрсыг формӕтӕ ӕмӕ комкоммӕ бастдзинӕдтӕ разӕнгард кӕныны тыххӕй.

Бадзурӕг Фӕрстӕ сифтонг кӕндзысты ӕппӕт ӕнӕмӕнгхъӕуӕг уавӕртӕ товартӕ, лӕггӕдтӕ, капиталтӕ ӕмӕ кусӕгдых сӕрибарӕй ласынӕн. Товартӕ, лӕггӕдтӕ, капиталтӕ ӕмӕ кусӕгдыхы сӕрибарӕй ласыны уавӕртӕ ӕмӕ принциптӕ бӕрӕг цӕуынц Дыууӕ Бадзурӕг Фарсы хицӕн фидыдтӕй.

Уац 11

Бадзурӕг Фӕрстӕ кӕрӕдзийӕн ахъаз кӕндзысты сӕ территоритыл хъомысджын экологон ӕнамонддзинӕдты фӕс-тиуджытӕ аиуварс кӕныны хъуыддаджы, афтӕ ма ӕмхуызон ӕххуыс кӕндзысты уӕлвӕткон уавӕртӕ фӕзыныны рӕстӕджы, кӕцытӕ фӕзыной ӕрдзон ӕмӕ техногенон факторты фӕстиуӕгӕн ӕмӕ тӕссаг уой адӕмӕн.

Бадзурæг Фӕрстӕ ма ӕмгуыст кӕндзысты экологийы къабазы дӕр, ӕрдзон фӕсауӕрцтӕй рационалонӕй спайда кӕныны къабазы кӕрӕдзийӕн фӕлтӕрддзинадӕй ӕххуыс кӕныны фӕрцы, экологон сыгъдӕг технологитӕй пайда кӕнын ӕмӕ алфӕмблайы ӕрдз сырӕзын кӕнын ӕмӕ хъахъхъӕныны фӕдыл мадзӕлттӕ уадзгӕйӕ.

Уац 12

Бадзурӕг Фӕрстӕ сӕ адӕмты ‘хсӕн уӕрӕхдӕр ӕмӕ арфдӕр кӕндзысты бастдзинӕдтӕ культурӕ ӕмӕ аивады, спорт ӕмӕ туризмы къабазты. Дыууӕ Бадзурӕг Фарсы сӕ архайӕг закъондӕттӕм гӕсгӕ ифтонг кӕнынц культурон-историон бынтӕм, архивтӕм, информацион ӕмӕ зонадон-техникон зонӕнтӕ ӕмӕ фондтӕм баххӕссын ӕмӕ сӕ сӕ-рибарӕй пайдакӕнынад.

Бадзурæг Фӕрстӕ ӕппӕтварсонӕй ахъаз кӕндзысты сфӕлдыстадон коллективтӕ, культурӕйы архайджытӕ ӕмӕ специалистты паддзахадон ӕмӕ бынӕттон ӕмвӕзад-ты культурон уагдӕтты ӕмахастытӕ уӕрӕхдӕр кӕнынӕн,

Бадзурӕг Фӕрстӕ ӕмархайд кӕндзысты историон-культурон бынтӕ бахъахъхъӕнын, реставраци кӕнын ӕмӕ сӕ пайда кӕныны къабазы.

Бадзурӕг Фӕрстӕ ӕппӕтварсонӕй разӕнгард кӕнынц спортивон организацитӕ ӕмӕ клубты ‘хсӕн контакттæ фидар кӕныны, ӕхсӕнпаддзахадон спортивон мадзӕлттӕ иумӕ уадзыны хъуыддаг.

Уац 13

Бадзурӕг Фӕрстӕ ахъаз кӕндзысты кӕрӕдзийӕн информацийӕ ӕххуыс кӕныны сферӕйы ӕмгуыстады рӕзтӕн, паддзахадон органты, уагдӕтты ӕмӕ дзыллон-инфор-мацион фӕрӕзты минӕвӕртты ‘хсӕн контакттæ разӕнгард кӕнгӕйӕ.

Уац 14

Бадзурӕг Фӕрстӕ рӕзын кӕндзысты ӕмгуыстад ахуырад ӕмӕ зонады къабазы, ахуырадон кусӕндӕттӕ ӕмӕ зонадон-иртасӕн уагдӕттимӕ комкоммӕ бастдзинӕдтӕ разӕнгард кӕнгӕйӕ, ӕххӕст кӕндзысты иумӕйаг программӕтӕ ӕмӕ сгарӕнтӕ.

Бадзурӕг Фӕрстӕ сӕхимӕ исынц кадртӕ цӕттӕ кӕнын, кӕрӕдзимӕ ахуыргӕндтӕ, специалисттæ, аспиранттæ ӕмӕ студенттæ хоныны къабазы ӕмархайд кӕнын ӕмӕ хӕрзиуӕгон уавӕртӕ аразыны хӕс.

Уац 15

Бадзурӕг Фӕрстӕ ӕмгуыстад рӕзын кӕндзысты ӕнӕниздзинад хъахъхъӕныны къабазы, социалон ӕмӕ гуманитарон сферӕты, цӕрджыты ӕнӕниздзинад хъахъхъӕныны иумӕйаг мадзӕлтты, медицинон зонад ӕмӕ практикӕйы рӕзт, ӕмбӕлон материалон-техникон базӕ, хосгӕнӕн фӕрӕзтӕй ифтонгкӕнынад, медицинон техникӕйы ифтонггӕрзтӕй ӕмӕ сывӕллӕтты хӕлцадон продукттӕй ифтонг кӕныны ӕнӕмӕнгхъӕуындзинад нымайгӕйӕ.

Уац 16

Бадзурӕг Фӕрстӕ ӕхсӕнадӕмон нормӕтӕ ӕмӕ сӕхи архайӕг закъондӕттынадмӕ гӕсгӕ ӕххӕст кӕндзысты ӕмгуыстад фыдракӕндты ныхмӕ, уыцы нымӕцы организацигонд фыдракӕндтимӕ, терроризм ӕмӕ экстремизмы ӕндӕр тыххӕссӕг фӕзындтимӕ, наркотикты, хӕцӕнгӕрзты, ӕнӕзакъонон ӕрзылдимӕ, ӕнӕзакъонон миграци, ӕнӕзакъонӕй райсгӕ фӕрӕзтӕ хи бакӕнын, афтӕ ма барады ныхмӕ акттимӕ, кӕцытӕ здӕхт сты транспорты ӕппӕт хуызты ӕдасдзинады ныхмӕ, контрабандӕйы ӕмӕ культурон ӕргъадтӕ давыны ныхмӕ.

Уац 17

Бадзурӕг Фӕрстӕ сӕхимӕ хӕс исынц дыууӕ паддзахады парламенттӕ ӕмӕ парламентариты ‘хсӕн ӕмгуыстад ӕмӕ контактты рӕзтмӕ уӕлдай хъусдард кӕй здахдзысты, уый тыххӕй.

Уац 18

Бадзурӕг Фӕрсты ‘хсӕн ацы Бадзырд ӕмбарын кӕнын ӕмӕ дзы пайда кӕнынимӕ бастуӕвӕг быцӕутӕ скъуыддзаг цӕуынц баныхӕсты руаджы.

Уац 19

Ацы Бадзырд нӕ ныхилы Бадзурӕг Фӕрсты бартӕ ӕмӕ хӕсистытӕм, кӕцытӕ гуырынц, кӕй хайадисджытӕ сты, уыцы ӕндӕр ӕхсӕнадӕмон бадзырдтӕй.

Уац 20

Ацы Бадзырд хъуамӕ ратификаци скӕной Бадзурӕг Фӕрсты закъондӕттынадон органтӕ ӕмӕ йӕ тыхы цӕуы, кӕрӕдзимӕ ратификацион грамотӕтӕ радтыны бонӕй.

Уац 21

Ацы Бадзырд арӕзт цӕуы 10 азы ӕмгъуыдмӕ.

Йӕ архайд автоматикон ӕгъдауӕй дарддӕргонд цӕудзӕн фӕд-фӕдылонӕй алы фондзазон ӕмгъуыдтӕм, кӕд ӕмӕ Бадзурӕг Фӕрстӕй иу дӕр йӕ радон ӕмгъуыдӕй, ӕппынкъаддӕр, ӕхсӕз мӕйы раздӕр фыстӕй нӕ фехъусын кӕна йӕ архайд ӕруромыны фӕндон, уӕд.

Уац 22

Ацы Бадзырдмӕ гӕнӕн ис хаст ӕрцӕуа ивындзинӕдтӕ ӕмӕ баххӕсткӕнинӕгтӕ, кӕцытӕ уыдзысты йӕ ӕнӕаскъуынгӕ хай, ӕмӕ арӕзт цӕудзысты хицӕн суагъӕтӕй. Ивындзинӕдтӕ ӕмӕ баххӕсткӕнинӕгтӕ, гӕнӕн ис, бавдиса Бадзурӕг Фӕрстӕй кӕцыфӕнды дӕр, уый тыххӕй иннӕ Бадзурӕг Фарсмӕ, ӕмбӕлон фыстӕг арвитгӕйӕ.

Уац 23

Кӕд ӕнӕмӕнгхъӕуӕг уа, уӕд ацы Бадзырды уагӕвӕрдтӕ реализаци кӕныны нысӕнттӕн Бадзурӕг Фӕрстӕ се ‘хсӕн фыссынц сӕрмагонд фидыдтӕ, афтӕ ма æндæр фидыдтæ дæр, æмхуызон цымыдисдзинад сын цы къабæзты уа, уым.

Фыст æрцыд сахар Цхинвалы 2018 азы декабры мæйы «19» боны дыууæ экземплярæй, алкæцы дæр дзы ирон æмæ уырыссаг æвзæгтыл, уымæй дæр дыууæ текстæн дæр ис æмхуызон тых.

Comments are closed, but trackbacks and pingbacks are open.