Мидхъуыддæгты министрад хъусын кæны

17-ӕм февралӕй 24-æм февралмæ Хуссар Ирыстоны территорийыл ӕрцыдис фондз фыдракæнды ӕмӕ иууылдӕр раргом сты. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы.Уымӕй уӕлдай ма республикӕйы фӕндӕгтыл ӕрцыд цыппар фæндагон-транспортон цауы. Авариты фæстиуæгæн рынчындонмæ уӕлӕнгай цӕфтимӕ бахаудтой фондз адæймаджы. 

Фӕндагон змӕлды ӕдасдзинады инспекци къуырийы дӕргъы сбӕлвырд кодта 261 фӕткхалӕн цауы. Уыдонӕй 9 уыдысты нозтджынӕй машинӕ скъӕрыны цаутӕ.

Ӕхсӕнадон фӕтк фехалыны фӕстиуӕгӕн бӕрн-дзинадмӕ конд ӕрцыдысты фараст адӕймаджы.

19-ӕм февралы дыууӕ фыдгӕнӕджы бацыдысты Цхинвалы 51-аздзыд цӕрӕджы фатермӕ ӕмӕ йӕм бартхъирӕн кодтой пистолетӕй, цӕмӕй сын ӕхца радта. Фыдгӕнджытӕй сӕ иу фатер басгарыны фӕстиуӕгӕн ссардта 350 мин сомы ӕмӕ сӕ ахастой. Милицийы оперативон-агурӕн мадзӕлттӕ райсыны фӕстиуӕгӕн цыбыр рӕстӕгмӕ фыдгӕнджытӕй иу, 23-аздзыд горӕттаг цӕрӕг, ахст ӕрцыд. Дыккаг фыдгӕнӕг бамбӕхст ӕмӕ йӕ ӕрцахсыны фæдыл ист цӕуынц  мадзӕлттӕ.

Цхинвалы 24-аздзыд цӕрӕгӕн хъаугъа рауад 16-аздзыд горӕттаг цӕрӕгимӕ ӕмӕ йӕ ныццавта кардӕй. Ӕнӕххӕст кары сывӕллон бахаудта рынчындонмӕ. Оперативон-агурӕн мадзӕлттӕ райсыны фӕстиуӕгӕн фыдгӕнӕг урӕд ӕрцыд ӕмӕ йӕ бакодтой рӕстӕгмӕдарӕн изоляторы.

Милицийы экономикон фыдракӕндтӕ ма ӕруадзыны управленийы кусджытӕ нӕ республикӕйы афтекты рейдон мадзӕлттӕ ауадзыны фӕстиуӕгӕн сконфискаци кодтой Гуырдзыстоны уагъд медицинон препараттӕ, куыд «Вальтарен плюс», «Корзис», «OmnicOcas», «Aerus», «EucalyptusCN 10» æмæ æндæртæ . РХИ-йы Хицауады Уынаффӕмӕ гӕсгӕ 2007 азӕй фӕстӕмӕ нӕ республикӕйы территорийыл уӕй кӕныны бар нӕй гуырдзиаг медицинон препараттӕ.

Наркотикон буарадты æрзылдыл контроль кæныны кусджытæ баурæдтой 54-аздзыд ӕмӕ 36-аздзыд горӕттаг цӕрджыты, кӕцытӕм сӕ зӕрдӕ фехсайдта ӕнӕзакъонӕй наркотикон буарад «марихуана»-йӕ спайда кӕнынмӕ.Фӕткхалджыты Цхинвалы тӕрхондон фӕивар кодта фӕйнӕ 8 мин сомы. Уымӕй уæлдай   ммилицийы кусджытӕ рейдон мадзӕлттӕ ауадзыны фӕстиуӕгӕн Цхинвалы районы Присы хъӕуы баурӕдтой цыппар горӕттаг цӕрӕджы,  кӕцытӕ ӕнӕзакъонӕй спайда кодтой наркотикон буарад «марихуана»-йӕ.

21 февралы Цхинвалы рынчындонмӕ бахаудта 40-аздзыд горӕттаг цӕрӕг, кӕцы фӕхъӕстӕ ис хъӕстӕ газӕй. Уыцы бон ма ноджы газӕй фӕхъӕстӕ сты 28-аздзыд горӕттаг цӕрӕг ӕмӕ йӕ 12-аздзыд сывӕллон. Дохтыртæ сын медицинон æххуыс бакодтой æмæ сæ цардæн тæссаг нал у.

Фӕндагон змӕлды ӕдасдзинады инспектортӕ нозтджынӕй баурӕдтой 23-аздзыд горӕттаг цӕрӕджы йӕ автомашинӕ «ВАЗ-21099» скъӕргӕйӕ, ӕмӕ куыд рабӕрӕг, афтӕмӕй ма ацы фӕткхалӕг 2019 азы нозтджынӕй автомашинӕ кӕй скъӕрдта, уый фӕдыл ын Цхинвалы тӕрхондон стӕрхон кодта иу азы ахӕстоны фæбадын.

Цхинвал-Дзауы фӕндаджы 5-ӕм километры ӕрцыд фӕндагон-транспортон цау. Цхинвалы 29-аздзыд цӕрӕг нӕ сарӕхст йӕ автомашинӕ «ToyotaAlphard» скъӕрын, фехӕлдта фӕндагон фӕткойтӕ ӕмӕ афӕлдӕхт фӕндаджы фӕсвӕд. Йӕ бӕлццонтӕ, горӕт Къуайсайы 33-аздзыд цӕрӕг ӕмӕ Цхинвалы 34-аздзыд цӕрӕг уӕлӕнгай цӕфтимӕ бахаудтой рынчындонмӕ. Шофыр разынд нозтджын.

8-ӕм июнӕй Дзадтиайы фырты уынгмӕ азилӕны Цхинвалы 62-аздзыд цӕрӕг нӕ сарӕхст йӕ автомашинӕ «ToyotaAvensis» скъӕрын ӕмӕ сӕмбӕлд ӕндӕр автомашинӕ «ВАЗ-21099»-ыл, кӕцыйы шофыр та разынд 43-аздзыд горӕттаг цӕрӕг. Аварийы фӕстиуӕгӕн дыууӕ шофыр дӕр уӕлӕнгай цӕфтимӕ бахаудтой рынчындонмӕ. «Toyota Avensis»-ы шофыр разынд нозтджын.

Цхинвал-Дзауы фæндаджы фыццӕгӕм километры горӕттаг 32-аздзыд цӕрӕг йӕ автомашинӕ «Toyota» скъӕргӕйӕ, фӕндаг нӕ радта йӕ ныхмӕ цӕуӕг мотоциклӕн ӕмӕ йыл сӕмбӕлд. Аварийы фӕстиуӕгӕн мотоциклы скъæрæг – уæрæсейаг æфсæддон базӕйы службæгæнæг уӕззау цӕфтимӕ бахаудта рынчындонмӕ.