2 октябрæй 9 октябрмæ Хуссар Ирыстоны территорийыл æрцыдис æртæ фыдракæнды æмæ дзы дыууæ раргом сты. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы.
Алыгъуызон бархалыны фæдыл горæты милицийы управленийы кусджытæ бæрндзинадмæ æркодтой авд адæймаджы.
Фæндагон змæлды æдасдзинады инспекци къуырийы дæргъы сбæлвырд кодта 294 фæткхалæн цауы. Уыдонæй 13 уыдысты нозтджынæй машинæ скъæрыны цаутæ.
Милицийы экономикон фыдракæндтæ ма æруадзыны фæдыл управленийы кусджытæ рейдон мадзæлттæ уадзыны рæстæджы дыууæ дуканийы баййæфтой æмæ сконфискаци кодтой энергетикон нозтытæ. Дуканиты хицæуттыл бакодтой административон суагъæтæ æмæ сæ арвитдзысты тæрхондонмæ.
2 октябры милицимæ фехъусын кодтой,зæгъгæ Къозы хъæумæ ввахс хъæды ссардтой адæймаджы стæгдар. 2017 азы бынæттон цæрæг æбæрæг сæфт фæкодта æмæ, гæнæн ис, ацы стæгдар уыцы адæймаджы разына. Зæххыл ма ссардтой автомат Калашникова дæр. Ныридæгæн уадзынц хъæугæ экспертизæтæ, цæмæй сбæлвырд кæной фæмардуæвæджы.
4 октябры милицимæ фехъусын кодтой, зæгъгæ Октябры уынгыл æрцыдис æвирхъау цау – æхсæнгарзæй фехстой æмæ фæмард 29-аздзыд бынæттон цæрæг. Куыд рабæрæг, афтæмæй фæмардуæвæджы æхсæнгарзæй фехста 51-аздзыд бынæттон цæрæг, йæ раздæры каис. Фыдгæнæг йæхæдæг бацыд милицимæ.
6 октябры милицимæ хъаст бадæтта 56-аздзыд горæттаг цæрæг, зæгъгæ йын йæ дзулфыцæны кассæйæ адав-той 4500 сомы. Оперативон-агурæн мадзæлттæ ауадзыны фæстиуæгæн цыбыр рæстæгмæ ахст æрцыд къæрных – разынд æнæххæст кары лæппу, бынæттон 17-аздзыд цæрæг. Басаст йæ фыдракæндыл æмæ конд æрцыд рæстæгмæдарæн изоляторы.
6 октябры ма милицимæ хъаст бадæтта Дзауы районы Хуыцъейы хъæуы астæуккаг скъолайы директор, зæгъгæ инвентаризацийы рæстæджы рабæрæг, скъолайæ кæй фесæфтысты ноутбук æмæ проектор. Къæрныхтæ разиан кодтой 38 мин сомы бæрц. Милицийы кусджытæ уадзынц слестгæнæн мадзæлттæ къæрныхты сбæрæг кæныны тыххæй.
Цхинвалы районы милицийы кусджытæ рейдон мадзæлтты рæстæджы баурæдтой фондз шофыры сæ зæрдæ сæм фехсайдта, ома, наркотиктæй пайда кæнынц. Дыууæ шофыры дзы спайда кодтой марихуанайæ, иннæ æртæ нæ бакуымдтой медицинон басгæрстмæ æмæ сæ тæр-хондон фæивар кæндзæнис.
