Республикæ Хуссар Ирыстоны Президент Гаглойты Алан фембæлд Ираны Зонад æмæ технологиты рæзты хæрзаудæн ассоциацийы генералон директор Сейед Махмуд Реза Саджадиимæ. Ирайнаг уазæг Хуссар Ирыстонмæ æрцыд уæрæсейаг инвестор, не ‘мзæххон Джуссойты Альбертимæ. Сейед Саджади раздæр уыдис Уæрæсейы Ираны Æххæстбарджын минæвар. Æмæ пенсийы рацæуыны фæстæ сарызта компани, кæцы архайы зонадон æмæ сæудæджерадон здæхтыты.
Фембæлды хайад райста Хицауады Сæрдар Джуссойты Константин.
Бæстæйы разамонæг ирайнаг уазæджы цыбыртæй базонгæ кодта республикæйы историимæ, зæгъгæ, Хуссар Ирыстон нырма у æвзонг паддзахад.
«2008 азы августы зындгонд цауты фæстæ нын нæ паддзахадон хæдбардзинад банымадта Уæрæсейы Федераци, уый фæстæ та æндæр хæларадон бæстæтæ. Уыцы бæстæтимæ мах фидар кæнæм нæ ахастытæ, ис нын конструктивон, хæрзвадат æмæ æнтыстджын куысты зæрдæйыуаг», – банысан кодта Президент.
Бæстæйы разамынад цæттæ у цыфæнды инвестицитæн дæр, æдасдзинад сифтонг кæнынмæ æмæ цæттæ у продуктивон куыстмæ.
Президент куыд банысан кодта, уымæ гæсгæ ирæттæ фыдæлтæй фæстæмæ тынг уазæгуарзон адæм сты, æмæ ныр дæр æхсызгонæй æмбæ-лынц ирайнаг уазæгыл. Саджади раздæр Æххæстбарджын минæвар кæй уыд, уымæ гæсгæ йæм хорз фæлтæрддзинад ис æмæ Хуссар Ирыстон стыр цымыдисимæ цæттæ у бæрæг хъуыдытыл æруынаффæ кæнынмæ.
Гаглойты Алан куыд банысан кодта, уымæ гæсгæ Уæрæсе æмæ Иран сæ æмархайд рæзын æмæ фидар кæнынц, архайынц алы фадгуыты.
Хуссар Ирыстонæн йе стратегион партнер Уæрæсе у, уыимæ аразы йæ хорз фидæн. Ныртæккæ, зæгъгæ, геополитикон планы тынг бирæ ивындзинæдтæ цæуы, уымæ гæсгæ махæн æхсызгон у нæ иумиаг хæлæрттыл æмбæлын.
Зæрдыл æрлæууын кодта, Джуссойты Альберт дæр уымæй размæ къорд инвестицион хъуыдытимæ кæй æрцыд Хуссар Ирыстонмæ. Уыдоныл ныртæккæ куыст цæуы республикæйы.
Сейед Саджади бузныг загъта Гаглойты Аланæн, хуссарирыстойнаг зæхх тынг уазæгуарзон кæй у, уый тыххæй æмæ банысан кодта, зæгъгæ, раздæр минæвар кæй уыд, уымæ гæсгæ æмбары райрæзты нысанæн Хуссар Ирыстоны тырнындзинад æмæ архайдтытæ. Мæнæн, зæгъгæ, æхсызгон у уыцы хъуыддаджы уæ фарсмæ балæууын. «Экономикон æгъдауæй бæстæ тыхджын куы уа, уæд æнтыстытæ дæр æфты къухты, уымæн ахсджиаг нысаниуæг ис», – банысан кодта уазæг æмæ ныфс бавæрдта, кæй баххуыс кæндзæн нæ республикæйæн йæ экономикæ æмæ сæудæджерад райрæзын кæнынæн.
Нæ уацх.
