Милицийы æнахъомты хъуыддæгты фæдыл хайады кусджытæ патрулон-постон службæйы кусджытимæ иумæ горæт Цхинвалы ауагътой рейдон мадзæлттæ, цæмæй сбæлвырд кæной æнæххæст кары сывæллæтты хиир-хæфсæн бынæттæ. Рейдты рæстæджы басгæрстой – автомашинæйы гуыффæ, кæцыйы, райсгæ информацимæ гæсгæ, æртымбыл вæййынц сывæллæттæ. Милицийы кусджытæ дзы никæй баййæфтой, фæлæ машинæйыл федтой криминалон субкультурæимæ баст фыстытæ. Бынæттон цæрджытæ бахатыдысты милицимæ, цæмæй сын баххуыс кæной дзæгъæл автомашинæйы утилизацийы хъуыддаджы.
Милицийы кусджытæ сидынц ныййарджытæм, цæмæй сæ сывæллæттæм здахой фылдæр хъусдард, сæ сæрибар рæстæг кæм фервитынц, уый бæрæг кæной, æмæ сæ æхсæвыгæтты ма уадзой дзæгъæлæй. Ахæм кары сывæллон фыдбылыз саразынмæ у æмхиц, æвзæрдзинадыл хæст гоймæгты æндæвдад ыл тынг цæуы æмæ къухтæй куы аирвæза, уæд æй раст фæндагмæ раздахын зындæр вæййы.
Ахæм рейдон мадзæлттæ уагъд цæудзысты арæхдæр куыд горæт Цхинвалы, афтæ ма районты дæр.
