3 июлæй 10 июлмæ Хуссар Ирыстоны территорийыл æрцыдис дыууæ фыдракæнды æмæ раргом сты. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы. Республикæйы фæндæгтыл æрцыдис дыууæ фæндагон-транспортон цауы. Авариты фæстиуæгæн рынчындонмæ алыгъуызон цæфтимæ бахаудтой цыппар адæймаджы.
Алыгъуызон бархалынæдты фæдыл горæты милицийы управленийы кусджытæ бæрндзинадмæ æркодтой 8 адæймаджы.
Фæндагон змæлды æдасдзинады инспекци къуырийы дæргъы сбæлвырд кодта 298 фæткхалæн цауы. Уыдонæй 11 уыдысты нозтджынæй машинæ скъæрыны цаутæ.
4 июлы оперативон информацийы фæдыл Ленингоры районы милицийы управленийы кусджытæ Орчъосаны хъæугæрон ссардтой 77 хæдæвзæрд гæны къутæры.
4 июлы горæт Цхинвалы милицийы хайадмæ фехъусын кодтой, зæгъгæ бынæттон 82-аздзыд цæрæг 2 июлы рахызт йæ хæдзарæй æмæ æбæрæгæй фесæфт. Мидхъуыддæгты æмæ Уæлвæткон уавæрты министрадты кусджытæ ауагътой æмбæлон мадзæлттæ сæфт адæймаджы ссарыны тыххæй æмæ йæ 5 июлы ссардтой Гудзабары хъæуы æнæхицау цæхæрадоны. Фæдзырдтой тагъд æххуысы машинæмæ æмæ йæ аластой рынчындонмæ.
5 июлы Дзауы районы милицийы управленийы кусджытæ оперативон информацимæ гæсгæ Ногхъæумæ ввахс ссардтой 8 гæны къутæры, кæцыты сконды ис наркотикон буа-радтæ.
5 июлы Тæболты уынгæй Лужковы уынгмæ азилæны 80-аздзыд бынæттон цæрæг бахаудта автомашинæйы бын. Шофыр, нæ горæты 45-аздзыд цæрæг, разынд нозтджын.
6 июлы горæты милицийы хайадмæ хъаст бадæтта 40-аздзыд бынæттон цæрæг, зæгъгæ мын мæхимæ æмæ мæ æнæххæст кары сывæллонмæ æртхъирæнтæ кæны Цхинвалы дзулфыцæн комбинаты директор. Куыд рабæрæг, афтæмæй йын комбинаты директор Цхуырбаты Вадим нæ дæтта бар харбызтæ уæй кæнынæн. Бынатмæ ссыдысты милицийы кусджытæ æмæ фæткхалæджы æрцахстой.
6 июлы милицийы наркотикты ӕрзылдыл контроль кӕныны управленийы кусджытӕ баурæдтой автомашинæ «Nissan March», кæцыйы шофыр разынд нæ горæты 38-аздзыд цæрæг. Басгæрсты рæстæджы автомашинæйы ссардтой 146 бурбын капсулæйы. Эксперттæ куыд рабæрæг кодтой, афтæмæй ацы капсулæты уæз у 55,48 гр. æмæ сты медицинон препараттæ «Катэна», кæцыйы сконды ис «Габапентин». Медицинон басгæрсты фæстиуæгæн рабæрæг ис, шофыр ма кæй спайда кодта наркотикон буарад «Метадон»-æй. Фæткхалæджы уал горæт Цхинвалы тæрхондон ахæстонмæ арвыста иу мæйы æмгъуыдмæ «метадон»-æй спайда кæныны тыххæй.
7 июлы милицийы наркотикты ӕрзылдыл контроль кӕныны управленийы кусджытӕ оперативон информацийы фæдыл горæт Цхинвалы басгæрстой афтек, кæцыйы хицау у нæ горæты 24-аздзыд цæрæг. Басгæрсты рæстæджы оперативон кусджытæ ссардтой 490 капсулæйы «Габапентин» æмæ 60 капсулæйы та «Катэна», кæцытæн сæ уæз уыд. 200 граммæй фылдæр. Афтекы хицауыл баконд æрцыд уголовон хъуыддаг.
8 июлы Цхинвалы районы Бихъары хъæуы 73-аздзыд цæрæг милицийы хайадмæ фехъусын кодта, зæгъгæ йæ 52-аздзыд фырт 6 июлы райсом 9 сахатыл рахызт хæдзарæй æмæ æбæрæг сæфт фæкодта. Бынæттон цæрджытæ æмæ æмбæлон службæтæ уадзынц агурæн мадзæлттæ.
