11 июлæй 18 июлмæ Хуссар Ирыстоны территорийыл æрцыдис иу фыдракæнд æмæ раргом ис. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы. Уымæй уæлдай ма республикӕйы фӕндӕгтыл ӕрцыдис æртæ фæндагон-транспортон цауы. Авариты фæстиуæгæн рынчындонмæ бахауд дыууæ адæймаджы.
Алыгъуызон бархалыны фӕдыл бӕрндзинадмӕ конд ӕрцыдысты фараст адӕймаджы.
Фæндагон змæлды æдасдзинады инспекци къуырийы дæргъы сбæлвырд кодта 330 фæткхалæн цауы. Уыдонæй 6 уыдысты нозтджынæй машинæ скъæрыны цаутæ.
13 июлы Цхинвалы районы Хелцуайы хъæуы 64-аздзыд цæрæг милицийы хайадмæ барвæндонæй бахаста танчы ныхмæ гранатæхсæн æхсæнгарз «РПГ-26». Куыд бамбарын кодта, афтæмæй ацы æхсæнгарз ссардта хъæды.
14 июлы Уæрæсейæ Хуссар Ирыстонмæ экстрадици сарæзтой 43-аздзыд æмбæстагæн, кæцы 18 азы бæрц æмбæхст барадхъахъхъæнæг органтæй горæт Санкт-Петербургы. 2004 азы ацы фыдгæнæг цалдæр тыхгæнæгимæ бабырстой кафейы бадджытæм æмæ, æхсæнгæрзтæй спайда кæнгæйæ, байстой егъау æхцайы фæрæзтæ æмæ дыууæ автомашинæйы. Уæрæсейы Федерацийы æмæ Хуссар Ирыстоны барадхъахъхъæнæг органтæ сæ тыхтæ баиу кодтой оперативон-сгарæн мадзæлттæ уадзыны рæстæджы,сбæлвырд кодтой фыдгæнæджы цæрæнуат æмæ йæ æрцахстой.
Цхинвалы районы æмæ наркотикты æрзылдыл контроль кæныны милицийы хайадты кусджытæ оперативон информацийы фæстиуæгæн басгæрстой Гудзабары хъæуы 43-аздзыд цæрæджы хисæрмагонд хæдзар æмæ цæхæрадоны ссардтой 18 гæны къутæры. Басгæрстой ма горæт Цхинвалы 37-аздзыд цæрæджы хисæрмагонд хæдзар дæр æмæ уым та цæхæрадоны ссардтой 2 гæны къутæры. Медицинон басгæрсты фæстиуæгæн дыууæ фæткхалæгæн дæр рабæрæг ис марихуанайæ спайда кæныны факт. Уымæй уæлдай ма горæт Цхинвалы милицийы хайады кусджытæ баурæдтой 31-аздзыд цæрæджы, кæцымæ сæ зæрдæ фехсайдта наркотиктæй спайда кæнынмæ. Фæткхалæг нæ бакуымдта медицинон басгæрстмæ.
Comments are closed, but trackbacks and pingbacks are open.