4 июлæй 11 июлмæ Хуссар Ирыстоны территорийыл æрцыдис цыппар фыдракæнды æмæ дзы æртæ раргом ис. Наркотикон буарадтӕй ӕнӕзакъонӕй спайда кӕныны тыххӕй урӕд ӕрцыдысты цалдӕр ӕмбӕстаджы. Уымæй уæлдай ма республикӕйы фӕндӕгтыл ӕрцыдис иу фæндагон-транспортон цау. Аварийы фæстиуæгæн фæмард иу адæймаг.
Алыгъуызон бархалыны фӕдыл бӕрндзинадмӕ конд ӕрцыдысты дыууæ адӕймаджы.
Фæндагон змæлды æдасдзинады инспекци къуырийы дæргъы сбæлвырд кодта 323 фæткхалæн цауы. Уыдонæй 7 уыдысты нозтджынæй машинæ скъæрыны цаутæ.
6 июлы горæт Цхинвалы Островскийы уынгыл боны фыццаг сахатмæ æввахс фыдгæнджытæ æхсæнгарзæй фехстой 34-аздзыд бынæттон цæрæджы æмæ ацыдысты автомашинæ «Mercedes-Benz E 320»-ыл. Цæф адæймаджы æвæстиатæй бахæццæ кодтой рынчындонмæ – йæ синыл сæмбæлд иу нæмыг æмæ йæ уавæр уыд уæззау. Оперативон-сгарæн мадзæлттæ ауадзыны фæстиуæгæн бæлвырд æрцыдысты фыдгæнджытæ – 30-аздзыд Джиоты Олег, 31-аздзыд Джиголаты Мурат, 25-аздзыд Дзабиты Азæмæт æмæ 28-аздзыд Сухомлинов Артур. Фæстæдæр сын ссардтой сæ автомашинæ дæр Цхинвалы районы Присы хъæуы. Фыдгæнджытæ аирвæзтысты Уæрæсейы территоримæ, фæлæ сæ ныридæгæн уым дæр агурынц барадхъахъхъæнæг органтæ.
6 июлы милицийы наркотикты ӕрзылдыл контроль кӕныны æмæ Знауыры районы милицийы управлениты кусджытæ оперативон информацийы фæдыл басгæрстой Знауыры районы Хъорнисы хъæуы 43-аздзыд цæрæджы хисæрмагонд хæдзар. Басгæрсты рæстæджы цæхæрадоны ссардтой 7 гæны къутæры.
7 июлы та Цхинвалы районы милицийы хайады кусджытæ басгæрстой Стыркомы хъæуы 50-аздзыд цæрæджы хисæрмагонд хæдзар æмæ цæхæрадоны ссардтой 5 гæны къутæры.
10 июлы изæры авд сахатмæ æввахс Цхинвалы районы Къостайыхъæумæ æввахс æрцыдис фæндагон-транспортон цау. 23-аздзыд горæттаг цæрæг нæ сарæхст йæ автомашинæ «Mercedes S-320», сæмбæлд æндæр автомашинæ «ВАЗ-2115»-ыл, стæй ахауд фæндаджы фæсвæд æмæ афæлдæхт. Аварийы фæстиуæгæн шофыр æмæ йæ дыууæ бæлццоны, 25 æмæ 22-аздзыд горæттаг цæрджытæ, алыгъуызон цæфтимæ бахаудтой рынчындонмæ. 25-аздзыд æмбæстаг æгæр уæззау цæфтæ кæй райста, уый фæстиуæгæн фæмард. Шофыр нæ бакуымдта медицинон басгæрстмæ æмæ ныридæгæн конд æрцыд рæстæгмæдарæн камерæйы.
11 июлы Фæндагон змæлды æдасдзинады инспектортæ баурæдтой автомашинæ «ВАЗ-2113», кæцыйы шофырмæ сæ зæрдæ фехсайдта нозтджынæй. Шофыр нæ бакуымдта медицинон басгæрстмæ. Уымæй уæлдай ма йын басгæрсты рæстæджы йæ автомашинæйы ссардтой гæххæтты тыхтон гæны ссадæгимæ.
Милицийы наркотикты ӕрзылдыл контроль кӕныны æмæ Фæндагон змæлды æдасдзинады инспекцийы управлениты кусджытæ Дзауы районы Уанелы хъæуы баурæдтой 43-аздзыд горæттаг цæрæджы, кæцымæ сæ зæрдæ фехсайдта наркотиктæй спайда кæнынмæ. Фæтхалæг нæ бакуымдта медицинон басгæрстмæ. Уымæй уæлдай ма милицийы наркотикты ӕрзылды контроль кӕныны управленийы кусджытӕ баурæдтой 37-аздзыд Цхинвалы районы Гудзабары хъæуы цæрæджы, кæцы спайда кодта наркотикон буарад «метадон»-æй.
Comments are closed, but trackbacks and pingbacks are open.