Челябинскы областы Хуссар Уралы паддзахадон историон музеймæ 12-æм июлы телефоны æрбадзырдта æнæзонгæ нæлгоймаг æмæ сын фехъусын кодта, кæй ссардта цавæрдæр историон предметтæ æмæ сæ кæй хъæуы фенын. Музейы кусджытæ уайтагъд æрбацыдысты бынатмæ æмæ сахуыр кодтой артефактты.
Сæрмæтты культурæйы уникалон ссарæггæгтæ разындысты поселок Черкаскульмæ хæстæг Окункулы цады былгæрон. Специалисттæ куыд сбæрæг кодтой, афтæмæй ацы рагон æрмæджытыл цæуы 2500 азы бæрц æмæ сæ радтой бæстæйы Историон музеймæ. Ног артефактты сахуыр кодтой му-зейы кусджытæ Алексей Шапиро æмæ Зоя Валиахметова.
Уыдон куыд радзырдтой, уымæ гæсгæ дыууæ цуайнаджы æнæнхъæлæджы ссардта бынæттон цæрæг Игорь Рябинских. Уый йæ кæрчытæн хъуамæ цады былæй схастаид лыстæг хуыр, йæ кусæнгарз цæуылдæр схæцыд æмæ йæ хъыррыст фæцыдис. Лæг фæдисау æмæ арфдæр куы акъахта, уæд дзы ссардта мигæнæнтæ. Цы ссардта, уыдон рагон мигæнæнтæ кæй уыдысты, уый бамбæрста æмæ уайтагъд музеймæ адзырдта æмæ сын загъта, зæгъгæ, ссардта «скифаг цуайнæгтæ». Музейы кусджытæ ацы хъуыддаджы фæдыл кæй фæдызæрдыг сты, уый фæстæдæр загътой, фæлæ мигæнæнты сæхи цæстæй куы федтой, уæд тынг бадис кодтой æмæ сразы сты, чи сæ ссардта, уыйимæ. Музейы кусджытæ куыд зæгъынц, уымæ гæсгæ, уыдон фыццаг æнхъæл уыдысты, мигæнæнтæ кæй разындзысты иткулы рæстæджы культурæйæ. Уымæн æмæ сын зындгонд у, ацы бынаты кæй уыдис рагон иткулы горæт. «Каслинскы районæн характерон нæу æмæ дзы скифты культурæ разына, уыдон-иу ссардтой Челябинскы хуссарварс. Нæ регионы раджы уыдысты ирайнаг æвзæгтыл дзурæг цæугæ знæмтæ – сæрмæттæ, фæлæ цы мигæнæнтæй пайда кодтой, уыдон раздæр ацы бынæтты никуы разындысты, никуы дзы ссардтам. Фæлæ уымæ æнæкæсгæйæ, ацы дыууæ мигæнæны хауынц сæрмæтты культурæмæ», – банысан кодтой музейы специалисттæ. Алексей Шапиро артефакттыл иртасæн куыстытæ куы уагъта, уæд бамбæрста, се ‘ддаг хуыз æмæ сæ конструкцимæ гæсгæ цавæр археологон культурæмæ хауынц, уый. «Ацы мигæнæнтæ сты уникалон, сты тынг стæм нæ регионы. Бæрцæй адон æнгæс мигæнæны ссардæуыд цалдæр, æмæ æфснайд сты музейы. Ацы артефакттæ нырма хъуамæ рацæуой бирæрæстæгон музейон реставраци, цы згæ сæ хæры, уымæй сæ хъуамæ ссыгъдæг кæнæм æмæ сæ стæй уый фæстæ сæвæрдзыстæм равдысты», – зæгъы Алексей Шапиро.
Специалисттæ ма æрсидтысты бынæттон цæрджытæм, цæмæй археологон ссарæггæгты тыххæй æнæмæнгдæр хъусын кæной æмбæлон уагдæттæм.
Æрмæг мыхуырмæ бацæттæ кодта ЦХУЫРБАТЫ Ларисæ
Comments are closed, but trackbacks and pingbacks are open.