Александр Сергейы фырт Пушкины райгуырдыл 124 азы æмæ уырыссаг æвзаджы бæрæгбоны цытæн 6 июны нæ горæты Пушкины цырты раз ацы аз дæр та æрбамбырд бирæ адæм.
Александр Пушкины портрет æмæ йæ цардыл дзурæг къамтæй сфæлыстой бынат мадзалы организатортæ.
Паддзахадон университеты æвзонг ахуыргæнджытæ Æлборты Аланæ æмæ Хъотайты Аленæ уыдысты амонджытæ. Хуссар Ирыстоны уырыссаг æвзаг æмæ литературæйы цæдис радон хатт зындгонд поэты цырты размæ фæхуыдта Хуссар Ирыстоны интеллигенцийы минæвæртты, Хуссар Ирыстоны Уæрæсейы минæварад, студентты, горæт æмæ районты ахуырдзау фæсивæды радон хатт гениалон поэт Александр Пушкины райгуырæн бон банысан кæнынæн. «Александр Пушкин уырыссаг æмæ æндæр адæмты ‘хсæн ахсы стырдæр æмæ кадджындæр бынæттæй сæ иу. Пушкины уæздандзинад, арæхстдзинад, ныфсхастдзинад, хуымæтæгдзинад æмæ хæлардзинад уырыссаг æмæ бирæ адæмтæн систы фæзминаг. Йæ уацмыстæ «Полтава», «Медный всадник», «Метель», «Евгений Онегин», «Капитанская дочка» æмæ æндæрты фæрцы йæ бон бацис, уырыссаг æвзаджы чи базæронд, ахæм дзырдтæ æмæ хъуыдытæй асыгъдæг кæнын», – банысан кодта мадзаламонæг.
«Александр Пушкинæн куыд йæ уацмыстыл, афтæ йæхиуыл дæр бирæ дзурæн ис. Æгæрон сты йæ лæггæдтæ уырыссаг литературæйы. Поэтæн уарзын йе сфæлдыстад, кæсгæ дæр дзы цъус нæ бакодтон. Хатдзæгтæ куы фæаразын, уæд æнæбанысангæнгæ нæ вæййын, мæ царды мын бирæ хъуыддæгты кæй фæахъаз сты, уый», – загъта Хуссар Ирыстоны Хицауады аппараты сæргълæууæг Джуссойты Алан. Йæ раныхасы рæстæджы æрсидт æрбацæуæг адæммæ, уæлдайдæр студенттæ æмæ ахуырдзаутæм, цæмæй æдзух кæсой Пушкины уацмыстæ.
Хуссар Ирыстоны Уæрæсейы минæварады хистæр уынаффæгæнæг Максим Ершов та банысан кодта: «Уе ‘хсæн кæй дæн æмæ иумæ Александр Пушкины райгуырды 124 азы æмæ уырыссаг æвзаджы бон кæй нысан кæнæм, уый тыххæй мæ зæрдæ стыр æхцондзинадæй байдзаг ис, уымæн æмæ йæ уынын: алчи дæр уæ цы аразы, уый кæй аразы сыгъдæгзæрдæйæ æмæ стыр разæнгардæй. Уе ‘ппæтæн дæр бузныг, уæлдай стыр бузныг та, мадзал чи бацæттæ кодта, уыдонæн», – загъта минæварады кусæг.
Бæрæгбоны ма раныхас кодтой Хуссар Ирыстоны «Россотрудничество»-йы минæварады сæргълæууæг Сергей Скворцов, Национ банчы сæргълæууæг Джиоты Жаннæ, Паддзахадон университеты уырыссаг æвзаджы кафедрæйы профессор Гаглойты Элиса, фонд «Русский мир»-ы разамонæг Остъаты Джульеттæ æмæ æндæртæ.
Хуссар Ирыстоны Паддзахадон университеты студенттæ Кокойты Миланæ, Джиоты Константин, Тадтаты Мария, Тедеты Аннæ аив бакастысты Александр Пушкинæн йæхи æмæ йæ номыл фыст æмдзæвгæтæ.
ГÆЗЗАТЫ Иван
