Фæстаг азты фылдæр хъусдард здæхт цæуы нæ мадæлон æвзаг бахъахъхъæнын æмæ рæзын кæнынмæ дæр. Ирон æвзаджы дæснытæ егъау куыст бакодтой æмæ кæнынц, цæмæй мадæлон æвзаг йæ аккаг бынат ссара нæ æхсæнады царды. Ахуыргæнæн уагдæттæ ифтонг цæуынц мадæлон æвзагæй хъæуæг ахуыргæнæнметодикон литературæйæ. 

Ахсджиаг нысаниуæг ис æрвыаз дæр Ирон æвзаг æмæ литературæйы бон нысан кæнынæн дæр. Ацы нысаниуæгджын бæрæгбонмæ  сæхи  бацæттæ кодтой горæт Къуайсайы сывæллæтты библиотекæйы кусджытæ дæр йæ директор Багаты Асиаты къухдариуæгадæй æмæ Къуайсайы Культурæйы хæдзары кусджыты æххуысæй. Мадзалмæ хуынд æрцыдысты скъолайы ирон æвзаджы ахуыргæнджытæ, хъæуты библиотекæты кусджытæ  æмæ æхсæнады минæвæрттæ. Бæрæгбон байгом кодтой Хонгæ кафтæй. Сæххæст æй кодтой æвзонг кафджытæ Цхуырбаты Анастасия æмæ Джиоты Аслан (хореграф Зассеты Заза). Уый фæстæ ирон æвзаджы нысаниуæджы тыххæй æрдзырдта Багаты Асиат:

«Нæ абоны æрбамбырд нысан кæны уый æмæ стыр аргъ кæй кæнæм нæ ирон мадæлон æвзагæн. Алы нацийæн дæр ис йæхи культурæ, йæхи æгъдæуттæ, уыдон æнусæй æнусмæ цæуынц фæлтæрæй фæлтæрмæ, æнæ уыдонæй иунæг нацийæн дæр уæвæн нæй. Стыр хæзна кæддæриддæр хъахъхъæнинаг вæййы æмæ мах дæр цæстыгагуыйау хъахъхъæнæм нæ традицитæ, нæ мадæлон æвзаг», – дзырдта Багаты Асиат. Йæ раныхасы æрсидт, цæмæй кæстæртæ ма рох кæной, сæ уæнгты ирон туг кæй зилы, уыимæ кад кæной æмæ сæ зæрдыл дарой ирондзинады, не ‘взаг цæмæй цæра, уый сæраппонд  цы хъæбатыртæ фæмард сты, уыдоны рухс нæмттæ. «Сæрмæ хæссын нæ хъæуы уый дæр æмæ дыууæ ирон адæймаг сæхи мадæлон æвзаджы бæсты æндæр æвзагыл кæрæдзиимæ куы фæдзурынц, уыцы хъуыддаг. Кæй зæгъын æй хъæуы, нацийы æнцойгæнæн цæджындзтæй сæ иу у культурæ. Ирон адæмы культурон бынтæн ис æнусон истори, уыдон махмæ æрхæццæ сты нæ раг фы-дæлтæй, æмæ мах та хъуамæ бакусæм ууыл, цæмæй сæ адæттæм нæ  кæстæр фæлтæртæм», – загъта йæ раныхасы библиотекæйы сæргълæууæг.

Скъолайы ахуыргæнинæгтæ Зассеты Сослан, Хуыгаты Валерия, Танделаты Анастасия, Хуыгаты Роберт, Джусойты Аделинæ æмæ Хуыгаты Давид бакастысты ирон æвзагыл æмдзæвгæтæ. Къуыдаргомы цæрджытæ кæдфæнды дæр æмхиц уыдысты аивадмæ. Ныр дæр ацы рæсугъд бæрæгбонмæ культурæйы хайады хистæр Зассеты Фатимæ æмæ Къуайсайы астæуккаг скъолайы ирон æвзаг æмæ литературæйы ахуыргæнæг Зассеты Федосия  бацæттæ кодтой  чысыл хъомылгæнинæгтимæ инсценировкæтæ ахæм нæмттимæ: «Ирон чызджытæ» æмæ «Чындз æмæ æфсин». Сæ ролтæ аив сæххæст кодтой Джиоты Янæ, Хуыгаты Ларисæ, Цхуырбаты Анастасия æмæ Битеты Андрей. Вокалон къорд, йæ сæргълæууæг Хуыгаты Алан, афтæмæй азарадысты «Иры чызджытæ» æмæ «Райгуырæн бæстæ». Бæрæгбонмæ ма бацæттæ кодтой викторинæ дæр. Уымæ хаст æрцыдысты фарстатæ канд ирон æвзаг æмæ литературæйы бындурæвæрджыты тыххæй нæ, фæлæ ма нæ паддзахады историйы фæдыл дæр. Викторинæйы рæстæджы йæ хайадисджытæ равдыстой сæ зонындзинæдтæ æмæ рабæрæг, хорз кæй зонынц сæ мадæлон æвзаг æмæ сæ паддзахады истори.

Танделаты Вилена

 

Добавить комментарий

Ваш адрес email не будет опубликован. Обязательные поля помечены *

Этот сайт использует Akismet для борьбы со спамом. Узнайте, как обрабатываются ваши данные комментариев.