Хъæрмуатон хæдзарадæн йæхи хорздзинæдтæ кæй ис, уый алы фæлхасгæнæг дæр хорз æмбары – фадат ын вæййы афæдзы алы афон дæр, йæ зæрдæ цахæм халсар агуры, уый балхæнынæн. Хæдзарады хицауæн та боныгъæдтæ, æмæ адæймагæй кæнгæ чи не сты, ахæм уавæртæм нæ кæсгæйæ, йæ бон у иса тыллæг æмæ реализаци кæна, фæлхасгæнджытæ æхсызгонæй кæй агурынц, уыцы хъæууонхæдзарадон продукттæ.
Нæ республикæйы хицæн æмæ хицæн рæтты фæзындысты ахæм хæдзарадтæ. Уыдонмæ ма æрæджы ноджыдæр æрбафтыдис иу. Уыцы хæдзарадтæй сæ иуы хицау у Тедеты Сослан. Уый ныр цалдæр азы йæ хъæрмуаты тауы æмæ хъомыл кæны джитъритæ æмæ болгайраг цывзы.
Æрæджы республикæйы хъæууон хæдзарады министр Мæргъиты Алан фембæлд Тедейы-фыртимæ æмæ йын базонгæ йæ хæдзарады архайдимæ.
Тедеты Сослан радзырдта, йæ проект реализаци кæнгæйæ цы проблемæтыл æмбæлы, уыдæтты тыххæй. Йæ ныхæстæм гæсгæ йын сæйраг проблемæ у, цы халсæрттæ æркæны, уый реализаци кæнын.
Министр бузныг загъта амалиуæггæнæгæн йæ æрвылбонон куысты тыххæй, кæцы здæхт у хъæрмадон хæдзарад райтынг кæнынмæ. Æмæ радзырдта хъæууон хæдзарады министрады пълæнтты тыххæй, ацы къабазы чысыл æмæ астæуккаг амалиуæгадæн æххуысы фæдыл.
Мæргъиты Алан банысан кодта, зæгъгæ, 2022-2025 азтæн РХИ-йы социалон экономикон рæзты паддзахадон программæйы фæлгæтты æввахс рæстæджы республикæйы план цæуы дыргътæ æмæ халсæртты продукци æфснайын æмæ кусыны фæдыл проект среализаци кæнын, кæцы хъæууон хæдзарады товар уадзджытæн фадат ратдзæн сæ рауадзгæ продукци реализаци кæнынæн.
Бестауты Валя
