Республикæ Хуссар Ирыстоны Президент Бибылты Анатоли раарфæ кодта Культурæйы кусджытæн сæ профессионалон бæрæгбоны цытæн.
Паддзахады сæргълæууæг банысан кодта адæймаджы æмæ æхсæнады царды культурæйы нысаниуæг æмæ ацы къабазы кусджыты хайбавæрд культурæйы рæзтмæ æмæ ирæтты национ хæдбындурдзинад бахъахъхъæнынмæ.
«Культурæ æххæссы нæ республикæйы цардархайды бирæ фадгуытыл. Уымæн ис бамбарынгæнæн, фæлæ культурæ æвдисын та у бирæ зындæр. Уый æрмæст сценæйыл хъазын æмæ кафты мидæг нæй, уый хъуамæ уа ныхас кæныны æмæ амынд цæуа сабийы бонтæй.
Культурæ куы нæ уа, уæд адæм дæр нæ уыдзысты. Æмæ, кæй зæгъын æй хъæуы, æз сæрыстыр дæн культурæйы фадыджы кусджытæ, театры артистты курдиатæй, сæрыстыр дæн, абоны бон ансамбль «СИМД» кæй рахызт ног æмвæзадмæ æмæ бирæ чингуытæ кæй фæзынд нæ библиотекæты, сæрæстыр дæн музыкалон скъолайы ахуыргæнджыты, нæ нывгæнджыты дæсныйадæй.
Сымах размæ кæнут Республикæ Хуссар Ирыстоны культурæ. Ныфс мæ ис, дарддæр дæр мах кæй уындзыстæм нæ сфæлдыстадон коллективты æнтыстытæ, кæцытæ ралæудзысты серьезон фæзуатты», – загъта Бибылты Анатоли.
Уый загъта, цæмæй къухыбафтгæ æнтыстытыл ма æрлæууой, кæсой фидæнмæ æмæ исой бæрзонд фæстиуджытæ.
Культурæйы къорд кусджыты Президент йæ Барамындæй схорзæхджын кодта «Республикæ Хуссар Ирыстоны Культурæйы сгуыхт архайæг», «Республикæ Хуссар Ирыстоны Культурæйы сгуыхт кусæг», «Республикæ Хуссар Ирыс-тоны сгуыхт артист», «Республикæ Хуссар Ирыстоны сгуыхт нывгæнæг», «Республикæ Хуссар Ирыстоны адæмон ахуыргæнæг»-ы кадджын нæмттæй, афтæ ма радта Республикæ Хуссар Ирыстоны кады грамотатæ.
Мадзалы официалон хайы кæронбæттæны сфæлдыстадон коллективтæ, кафты ансамблтæ æмæ музыканттæ равдыстой бæрæгбонон программæ, сæ профессионалон æвзыгъддзинæдтæ æвдисгæйæ.
Банысан кæнын хъæуы, Хуссар Ирыстоны Культурæйы кусæджы бон нысан кæй цæуы 25 марты. Паддзахады сæргълæууæджы Барамындмæ гæсгæ уый хаст æрцыд Бæрæгбонтæ æмæ зæрдылдарæн бонты къæлиндармæ.
Comments are closed, but trackbacks and pingbacks are open.