Президент Бибылты Анатоли паддзахадон хорзæхтæ радта Хуссар Ирыстоны медицинон кусджытæн. Медицинон кусджыты разæнгардгæнæн Барамындтыл къух фыст æрцыд ивгъуыд азы, фæлæ коронавирусон инфекцийы тыххæй хорзæхджын кæныны церемони хаст æрцыд æбæрæг рæстæгмæ æмæ уагъд æрцыд Æнæниздзинады Дунеон бон нысан кæныны сæраппонд.
Паддзахады сæргълæууæг медицинон кусджытæн загъта бузныджы ныхæстæ сæ удуæлдай куыст, быхсындзинад æмæ зæрдæхæлардзинады тыххæй.
«Афтæ зæгъынц, рынчынæн хуыздæр хос у рæвдыд ныхас æмæ дохтыры хорз ахаст. Пациенттæм уæ æнувыд ахаст дзурæг у, сымах зæрдиагæй кæй райстат медицинон кусджытæ суæвыны фæндон æмæ уæ профессимæ, уæ функционалон хæстæ æххæст кæнынмæ кæй дарут уарзондзинады ахаст.
Ныфс мæ ис, Æнæниздзинад хъахъхъæныны рæзты æмвæзад размæ кæй цæудзæн. Фæстаг азты мах фæбæрзонддæр кодтам медицион æххуысы æмвæзад, гом æрцыдысты ног гуырæн хæдзар æмæ хирургион центр, æлхæд цæуы ног ифтонгад. Афтæ хъуыды кæнын, æмæ ацы къахдзæфтæ ахъаз кæндзысты пациенттæн квалификациджын медицинон æххуыс бакæнынæн», – загъта Бибылты Анатоли æмæ æппæт æрæмбырдуæвджытæн йæ цæст бауарзта æнæниздзинад æмæ фæрныгад.
Президент ма банысан кодта медицинон кусджыты куыст ног коронавирусон инфекцийы пандемийы уавæрты. Уый банысан кодта, медицинон кусджытæ æмæ волонтерты хайбавæрд, кæцытæ тох кодтой COVID-19 ныхмæ æмæ равдыстой бæрндзинад, кæй зæгъын æй хъæуы, нысан æрцæудзысты паддзахадон хорзæхтæй.
Æнæниздзинад хъахъхъæныны фадыджы уæлдай хуыздæр йæхи чи равдыста, уыцы минæвæртты паддзахады сæргълæууæг схорзæхджын кодта «Хуссар Ирыстоны адæмы Фыдыбæстæйон хæсты уæлахизыл 10 азы сæххæсты сæраппонд», «Республикæ Хуссар Ирыстоныл 25 азы сæххæсты сæраппонд» майдантæй æмæ Республикæ Хуссар Ирыстоны Кады грамотæтæй.
Иуæй-иу медицинон кусджытæн лæвæрд æрцыд «Республикæ Хуссар Ирыстоны сгуыхт дохтыр», «Республикæ Хуссар Ирыстоны Æнæниздзинад хъахъхъæныны сгуыхт кусæджы» кадджын нæмттæ æмæ бузныджы фыстæджытæ.
Comments are closed, but trackbacks and pingbacks are open.