КОРОНАВИРУСОН ИНФЕКЦИ НОГÆЙ СЫТЫНГ. ИСТ ЦÆУЫНЦ МАДЗÆЛТТÆ

РХИ-йы Президент Бибылты Анатоли 8-июлы ауагъта коронавирусон инфекци COVID-19-ы ныхмæ архайды фæдыл оперативон штабы рабадт.

Æнæниздзинад хъахъхъæныны æмæ социалон рæзты министр Наниты Сослан радзырдта Республикæ Хуссар Ирыстоны территорийыл COVID-19-æй рынчынтимæ баст ситуацийы тыххæй. Уый банысан кодта, зæгъгæ, ивгъуыд къуырийы ацы низæй рынчынты нымæц фылдæрæй фылдæр кодта.

«Ныртæккæ инфекцион рынчындоны ис 49 пациенты, кæцытæ рынчын сты коронавирусæй. Аивгъуыйгæ бонты рынчындон райста 9 адæймаджы. Бацæттæ кодтой 91 сынтæджы. Амбулаторон æгъдауæй хос цæуы 135 адæймагæн. Куыстæуы техникон фадæттæ уæрæхдæр кæныныл. Махмæ ис туаггуыры станц, ифтонг стæм туаггуырæй. Абоны бонмæ вакцинаци æрцыдысты 512 адæймаджы», – загъта Наниты Сослан.

Бибылты Анатоли бахæс кодта, цæмæй бакуыстæуа COVID-19-æй хос кæныны тыххæй республикæйы медицинон уагдæтты хосгæнæн фæрæзтæй рæстæгыл сифтонг кæныны фарстыл.

Президент ма байхъуыста Хуссар Ирыстоны Сæйраг санитарон дохтыр Коцты Маринæйы докладмæ республикæйы коронавирусимæ баст ситуацийы тыххæй.

«Ацы вирус срегистраци кæнынæй фæстæмæ раиртæстæуыд 24720 пробæйы. Уыдонæй æвæрццаг фæстиуæг рабæрæг 3614 адæймагæн. Ивгъуыд суткæйы 119 пробæйæ коронавирусон инфекцийæ фæрынчын уæвыны цаутæ уыд 34», – загъта комитеты сæрдар.

Йæ ныхæстæм гæсгæ, райдианы фæрынчын уæвыны цаутæ иууыл фылдæр уыдысты ивгъуыд азы октябры мæйы. Уæд ауадзгæ 2296 лабораторон иртасæнæй æвæрццаг разындысты 981.

«Июны мæйы дыккаг къуырийæ Рес-публикæ Хуссар Ирыстоны æнкъардæуы фæрынчын уæвыны ног сытынгдзинад. Эпидемион процессмæ, сæйраджыдæр, бахаудысты Цхинвалы цæрджытæ. Ныртæккæ фæрынчын уæвыны цаутæ арæхæй арæхдæр кæнынц æмæ уымæн та ахъаз кæны къорд факторы: инфекци тынгдæр парахат кæны профессионалон коллективты æмæ цæрджытæ дзыллон æгъдауæй кæм æмбырд кæнынц, ахæм бынæтты, бæлвырддæрæй та цытджын, культурондзыллон, динон мадзæлтты, зианы кæндты.

Уыдис къорд цауы, дзыллон мадзæлттæ уадзыны фæстæ  къордгæйттæй куы рынчын кодтой коронавирусон инфекцийæ. Дарддæр рынчын кодтой ахæмты бинонтæ, æмбæлон уагыл æххæст нæ цыдысты эпидемийы ныхмæ рекомендацитæ: маскæйон æмæ дезинфекцион режим, социалон дистанци хъахъхъæ-нын æмæ рынчын адæймæгтæй хæ-дизоляцийы режим халын. Фæрынчын уæвыны цауты рæзтæн ма ахъаз кæны, эпидемион уавæр мæгуырау кæм у, ахæм бæстæтæм активон миграци дæр», – фехъусын кодта Коцты Маринæ.

Бавдисгæ информацийы бындурыл æруынаффæ чындæуыд ног коронавирусон инфекцийы рæзты æмæ парахат кæныны ныхмæ архайды мадзæлттыл.

Бибылты Анатоли Хуссар Ирыстоны Фæлхасгæнджыты бартæ хъахъхъæныны фæдыл хъусдарды комитеты сæргълæууæгæн бахæс кодта, цæмæй йæ хъус дара, иртасæнтæн æнæмæнгхъæуæг тесттæ æмæ хардзгæнæн æрмæджыты максималон бæрц ис æви нæ, уымæ.

Президент æрсидт алкæмæ дæр, цæмæй вакцинæ скæной. Банысан кодта, зæгъгæ, алы адæймаг дæр ацы фарстмæ хъуамæ акæса бæрндзинады цæстæй æрмæст уый тыххæй нæ æмæ цæмæй бахъахъхъæна йæ цард, фæлæ ма уый тыххæй дæр, цæмæй æдас уой йæ хиуæттæ æмæ æввахс адæймæгтæ.

«Мах иууылдæр æвдисæн стæм, вирус та ногæй тынгдæй тынгдæр кæй кæны. Дунейы паддзахадты телеканалты ма дзурынц æрмæстдæр уый тыххæй, цас тæссаг у ацы вирус, уæлдайдæр та йæм чи фæзынынц, уыцы мутацитимæ. Уы-мæ гæсгæ мах хæсджын стæм, цæмæй бахъахъхъæнæм не ‘мбæстæгты цард æмæ инфекцийы парахат кæнын ма бауадзæм дарддæр», – загъта уый.

Бибылты Анатоли банысан кодта, зæгъгæ, цы фæкъуындæггонд мадзæлттæ ист цæуы, уыдон æмбæстæгтæн бæрæг зындзинæдтæ гæнæн ис æрхæссой, фæлæ æнæ уыдон нæй гæнæн инфекцийы парахат кæнын æруромын. Афтæ ма банысан кодта, COVID-19-ы ныхмæ тохы ивгъуыд аз бæрнджын ведомствоты бакæнгæ куыст, бахæс кодта, цæмæй хынцыд æрцæуой, цы рæдыдтытæ уыд, æмæ бæрнон ахаст равдыстæуа инфекцийы ныхмæ тохмæ.

Дарддæр рабадты хайадисджытæ æркастысты æмæ сфидар кодтой республикæйы территорийыл ног коронавирусон инфекцийы апарахаты тасдзинад фæкъаддæр кæныны фæдыл мадзæлттæ.

Фæрынчын уæвыны цауты нымæц кæй рæзы, уый хынцгæйæ æмæ Хуссар Ирыстоны COVID-19 апарахаты тасдзинад фæкъаддæр кæныны нысанæн оперативон штаб райста уынаффæ инфекцийы ныхмæ  архайды фæдыл мадзæлттæ фæтыхджындæр кæнын.

1. Базарады, æхсæнадон хæлцады, коммуналон-цардуагон объектты, сывæллæтты хиирхæфсæн центрты, физикон культурæ æмæ спорты объектты къухдариуæггæнджытæ сæ архайд æххæст кæнæт COVID-19 парахат кæныны тасдзинады уавæрты архайд организаци кæныны фæдыл домæнтæм гæсгæ (маскæйон æмæ дезинфекцион режим, социалон дистанци хъахъхъæнын æмæ æндæр ахæмтæ).
2. Министрадтæ, ведомствотæ, организацитæ æмæ уагдæтты разамонджытæ, исады формæмæ нæ кæсгæйæ, сифтонг кæнæт «бахизæн фильтр» организаци кæнын, æнæконтактон æгъдауæй кусæджы буары температурæйыл контроль кæнгæйæ, къухты антисептиктæй сæхсын (кæнæ та санитайзертæ сæвæрын), маскæйон æмæ дезинфекцион режим æххæст кæнын.
3. Куыстдæтджытæн бар лæвæрд æрцæуæт, цæмæй тæссагдæр кæмæн у, уыцы кусджыты: 65 азы æмæ уымæй фылдæр кæуыл цæуы, сывæрджын сылгоймæгтæ, хроникон низтæй рынчын адæймæгтæ (сæкæрниз, бронхиалон астмæ, уыргты хроникон низтæ, онколо-гион низтæ, инфаркт, инсульт кæмæн уыд æмæ афтæ дарддæр) ракæной куысты дистанцион режиммæ, сæ куыстмызд сын бахъахъхъæнгæйæ.
4. Бар ма уæт сывæллæттæн сæрдыгон æнæнизгæнæн лагертæ организаци кæнынæн.
5. Рекомендаци лæвæрд цæуы ахæм бынæттæм цæуын фæкъаддæр кæнын:

– дзыллон бæрæгбонон æмæ бæрæгбонондинон мадзæлттæм:

– зианы кæндты мадзæлттæм.

6. Культурон-дзыллон æмæ спортивон мадзæлттæ æхгæд бынæтты уагъд цæ-уæт, ахæм ран цал бынаты ис, уыдонæн сæ 50 процентæй фылдæрыл бадæг куыд нæ уа иу рæстæджы, COVID-19 парахат кæныны тасдзинады уавæрты архайд организаци кæныны фæдыл домæнтæм гæсгæ.
7. Æнæниздзинад хъахъхъæныны æмæ социалон рæзты министрад сифтонг кæнæт амбулаторон æмæ стационарон æгъдауæй медицинон æххуыс, афтæ ма тагъд медицинон æххуыс чи кæны, Республикæ Хуссар Ирыстоны уы-цы медицинон организациты цæттæдзинад респираторон симптоматикæимæ рынчынты райсын æмæ сын оперативон медицинон æххуыс кæнын, биологион æрмæг исын, коронавирусон инфекцийæ рынчын сты, æви нæ, уый базоныны тыххæй.
8. Фæлхасгæнджыты бартæ хъахъхъæныны æмæ адæймаджы фæрныгады къабазы хъусдарды фæдыл комитет уадзæт мониторинг коронавирусон инфекцийæ рынчынты фæдыл æмæ COVID-19 рабæрæг кæныны фæдыл сифтонг кæнæт лабораторон диагностикæ.