Президент Бибылты Анатолийы сæрдариуæгадæй уагъд æрцыд коронавирусон инфекци COVID-19-ы ныхмæ архайды фæдыл оперативон штабы радон рабадт.
Паддзахады сæргълæууæг банысан кодта, зæгъгæ, арæнгонд мадзæлттæ, кæцытæ раздæр ист æрцыдысты Хуссар Ирыстоны арæныл, сифтонг кодтой республикæйы цæрджыты æдасдзинад æмæ нæ бауагътой Республикæ Хуссар Ирыстоны территоримæ инфекци æрбафтын.
«Мах уынæм, развæлгъау ист мадзæлттæ æнæхъуаджы кæй нæ уыдысты, COVID-19 æй рынчынтæ нæм нæй», – загъта уый.
Президент бузныджы ныхæстæ загъта республикæйы цæрджытæн се ‘мбарындзинады тыххæй, кæцытыл парахат кодтой арæнгонд мадзæлттæ.
Уымæй уæлдай ма, Бибылты Анатоли штабы уæнгтæн бахæс кодта, цæмæй фыццæгæм маймæ бакусой, Уæрæсейы Федерацийы æфсæддон уæлдæр ахуыргæнæндæтты цы курсанттæ ахуыр кæнынц, уыдоны æрыздæхт сорганизаци кæныны фарстыл, афтæ ма карантинон мадзæлтты планыл дæр.
«Мах æнæмæнгæйдæр хъæуы ацы фарстмæ максималон бæрндзинад равдисын. Æнæмæнгхъæуæг у бакусын ахæм механизмыл, кæцымæ гæсгæ студенттæ æрыздæхдзысты сæ Райгуырæн зæхмæ, афтæ ма уыдонæн карантинон уавæртæ саразыныл», – загъта уый.
Паддзахады сæргълæууæг банысан кодта, зæгъгæ, сæвзæргæ уавæры Хуссар Ирыстоны ма хъуамæ уа хæлцадон товартæ æмæ фыццаг æнæмæнгхъæуæг товарты цухдзинад.
Инвестицион программæйыл дзургæйæ, Президент Бибылты Анатоли Хицауады Сæрдары хæдивæг – Экономикон рæзты министр Бекъойты Геннадийы раз сæвæрдта ахæм хæс, цæмæй максималонæй контроль кæна, Уæрæсейы Федерацийæ республикæмæ цы уæзтæ цæуынц, уыдоныл, цæмæй Хуссар Ирыстоны территоримæ COVID-19 ма æрбафта. Рабадты кæрон Бибылты Анатоли банысан кодта æнæкусæгон бонтæ адарддæр кæныны æнæмæнгхъæуындзинад, майы фыццаг декадæйы улæфт бонтæ кæй сты, уый хынцгæйæ.
Comments are closed, but trackbacks and pingbacks are open.