Республикæ Хуссар Ирыстоны Президент Бибылты Анатоли ауагъта коронавирусон инфекци СOVID-19 ма апарахт кæныны фæдыл оперативон штабы рабадт. Сæйраг санитарон дохтыр Коцты Маринæ загъта, зæгъгæ, фæстаг дыууæ суткæйы сбæрæг COVID-19 æй 137 рынчыны. Коцты Маринæ банысан кодта рынчынты бæрзонд процент, ауадзгæ басгӕрстытæн сæ 60 проценты æвдисынц æвæрццаг фæстиуæг.
Пандемийы райдианæй Хуссар Ирыстоны уагъд æрцыд 7787 ПЦР басгæрсты.
Президент банысан кодта, зæгъгæ, райсгæ бæлвырдгæнæнтӕ хынцгæйæ, æнæмæнгхъæуæг у уæлæмхас мадзæлттæ райсын вирус апарахат кæныны темптæ фæкъаддæр кæныны тыххæй.
Бибылты Анатоли ма банысан кодта, æппæт архайдтытæ, кæцытæ баст сты паддзахадон управленийы органтæ æмæ вирусимæ тох кæныны фæдыл службæтимæ хъуамæ уой мобилизацигонд, фæлæ ис ахæм кусджытæ, кæцытæ не ‘ххæст кæнынц сæ комкоммæ хæстæ.
«Абон мах бузныджы ныхæстæ дзурæм «сырх зонæйы» цы дохтыртæ кусынц, уыдонæн, мах бузныг зæгъæм Тагъд æххуысы дохтыртæн, кæцытæ цæуынц сидтытæм. Уыимæ иумæ, ис ахæм информаци, зæгъгæ, кæцыдæр кусджытæ нæ разы кæнынц æххуыс бакæныныл, COVID-19-æй фæрынчыны тасæй.
Æфсæддон адæймаг, кæцы лидзы тохы быдырæй, у дезертир. Æз афтæ нымайын æмæ медицинон кусджытæ, кæцытæ ацы уавæры лидзынц COVID-19-имæ тох кæныны быдырæй – сты дезертиртæ. Уымæ гæсгæ, Георги Феликсы фырт, хæс дын кæнын, кæд ахæм факттæ ис, уæд хъуамæ барӕнтӕ ист æрцæуой, уыдоны сæ бынæттæй ссæрибар кæныны тыххæй», – загъта Президент Æнæниздзинад хъахъхъæнын æмæ социалон рæзты министр Тотчиты Георгийæн.
Бибылты Анатоли ма банысан кодта уæрæсейаг æфсæддон медикты стыр хайбавæрд, кæцытæ абоны бон æххуыс кæнынц республикæйы цæрджытæн, фæлæ ма банысан кодта, Хуссар Ирыстоны къухдариуæгад республикæйы мидæг кæй хъуамæ райса уынаффæтæ алыгъуызон мадзæлттæ сарæнгонд кæныны фæдыл.
Оперативон штабы уынаффæмæ гæсгæ 2020 азы 15 ноябрмæ урæд æрцыд астæуккаг, астæуккаг-профессионалон æмæ уæлдæр ахуыргæнæндæтты, сывæллæтты æмæ уæлæмхас ахуырады уагдæтты, сывæллæтты хиирхæфсæн центрты, атракционты, компьютерон клубты, физикон культурæ æмæ спорты объектты куыст .
Сæрмагонд уынаффæмæ гæсгæ урæд æрцыд культурон-дзыллæйон, спортивон, хиирхæфсæн мадзæлттæ, чындзæхсæвтæ æмæ æндæр бæрæгбонтæ аразыны хъуыддаг. Оперативон штаб ма Хуссар Ирыстоны цæрджытæн рекомендаци кæны, цæмæй ма цæуой дзыллон-динон мадзæлттæм, афтæ ма зиæнттæм дæр.
Бибылты Анатоли бахæс кодта, цæмæй коронавирусон инфекцийы симптомтимæ æмæ æвæрццаг ПЦР-тестытимæ пациенттæ райсыны фæткыл контроль фæтынгдæр кæной. Паддзахады сæргълæууæг банысан кодта, зæгъгæ, алы бахатгæ адæймаджы хоскæнынад æмæ басгæрст хъуамæ уагъд цæуа дохтыры хъусдарды бын.
«Иу адæймаг дæр, кæцыйы хъæуы, æххуыс ма хъуамæ баззайа æнæ медицинон кусæджы хъусдардæй. Куыст, кæй зæгъын æй хъæуы, зын у, фæлæ махæн нӕй, цы хæстæ ныл ис, уыдоныл ма фæтых уæвыны бар», – банысан кодта Президент.
Comments are closed, but trackbacks and pingbacks are open.