Хуссар Ирыстоны райдыдта Паддзахадон телерадиокомапни «ИР»-ы проект ирон поэзи æмæ прозæйы конкурс «Дзырд»-ы дыккаг сезон. Проект цытджын æгъдауæй байгом кодтой Хетæгкаты Къостайы номыл Паддзахадон драмон театры.
Сезоны байгом кæныны фыццаг видеофыстмæ æрбацыдис республикæйы разамынад Хуссар Ирыстоны Президент Гаглойты Аланы сæргълæудæй.
Конкурс «Дзырд»-ы фыццаг сезоны уæлахиздзаутæ æмæ финалисттæ бакастысты зындгонд ирон авторты æмдзæвгæтæ.
Паддзахады сæргълæууæг йæ раныхасы банысан кодта проект ауадзыны ахсджиагдзинад:
«Сценæйыл мадæлон æвзагыл цы рæсугъд æмдзæвгæтæ бакастысты, уыдон зæрдæмæхъаргæ уыдысты. Цы адæм се ‘взагæн кад æмæ размæ кæнынц, уыдонæн ис хорз фидæн æмæ дидинæфтыд», – загъта уый.
Президент ма йæ раныхасы æрсидт æмбæстæгтæм, цæмæй дзурой сæ мадæлон æвзагыл æмæ йæ афтæмæй популярон кæной. Банысан кодта, зæгъгæ, республикæйы хицауад дарддæр дæр алыварсон æгъдауæй æххуыс кæндзæн мадæлон æвзаджы рæзтæн ахъазгæнæг проекттæн.
«Фæзæгъынц, зæгъгæ, цал æвзаджы зоныс – уал лæджы дæ. Фæлæ дæ мадæлон æвзаг куы нæ зонай, уæд æндæр æвзæгтæ зонынæй цы пайда ис? Ирæтты бирæ фæлтæртæ нæ республикæйы сæрибардзинад æмæ хæдбардзинады сæраппонд ныккалдтой сæ туг. Мах та æппæтдæр хъуамæ саразæм, цæмæй бахъахъхъæнæм, нæ хистæртæ нын цы хъæздыг бынтæ ныууагъдтой, уыдон. Цы наци йе ‘взаг нæ хъахъхъæны, нæ кад кæны йе ‘гъдæуттæ æмæ традицитæн, уымæн фидæн нæй», – загъта Президент.
Уый бузныг загъта проекты организатортæн æмæ æппæт æрæмбырдуæвджытæн.
Бæрæгбонон изæры фыццаг хатт райхъуыст Мамиты Григори æмæ Тыбылты Леониды ныхæстыл фыст ног зарæг «Алайнаг»-ы зæлтæ. Азарыд æй Дзуццаты Тимур.
Кæронбæттæны æххæст æрцыд композици «Мæ зæрдæйæн йæ зæрдæ дæ, Ирыстон!».
Конкурсы фыццаг сезоны хайад райстой сæдæ скъоладзауы. Фыццаг бынат фарон бацахста Чилæхсаты Азæмæт, дыккаг – Уанеты Валерия, æртыккаг та – Быценты Анастасия. Проект рауад тынг цымыдисон, адæмы зæрдæмæ фæцыд. Ныфс нæ ис, конкурсы дыккаг сезоны дæр хайад кæй райсдзысты бирæ æвзонг курдиатджын æмбæстæгтæ.
Проекты разамонджытæ сты Бестауты Юлия æмæ Мамиты Григори.
Нæ уацх.
