Телепроекты финалæй
Цхуырбаты Гурамы номыл республикон стадионы 12 майы уагъд æрцыд телепроект «Дзырд»-ы конкурсы финалон этап. Ардæм æрæмбырд сты нæ республикæйы цæрджытæ суанг дæрддзæф районтæй дæр. Мадзалмæ ма фæуазæг ис бæстæйы президент Гаглойты Алан дæр. Йæ раныхасы бæстæйы сæргълæууæг стыр бузныджы ныхæстæ загъта проекты организатортæн æмæ банысан кодта, финалы хайадисджытæ иууылдæр кæй бакастысты зæрдæмæхъаргæ æмдзæвгæтæ.
«Фыццаджыдæр мæ бузныг зæгъын фæнды, абоны боны чидæриддæр ахæм рæсугъд мадзалмæ æрбацыдис, байхъуыста сæм, фемдзæгъд сын кодта, æппæт уыдонæн. Тæрхонгæнджытæн тынг зын уыдзæнис уæлахиздзау равзарын, уымæн æмæ финалы хайадисджыты иууылдæр схонæн ис хъайтартæ. 15 майы нысан кæндзыстæм ирон æвзаг æмæ литературæйы бон æмæ нын æй абон нæ кæстæртæ равдыстой – цалынмæ нæ мадæлон æвзаг æмбæлон æмвæзадыл уа, уæдмæ Ирыстонæн сæфæн нæй. Ныры рæстæг та нын æй æргомæй бамбарын кодта, кæй хъæуы уарзын райгуырæн бæстæ, кæй хъæуы ахуыр кæнын мадæлон æвзаг, æмæ нын иумæ бирæ цы бантыса, уыцы арфæ нæ уæд», – загъта Гаглойты Алан.
Жюрийы уæнгты фæндонмæ гæсгæ фыццаг бынат лæвæрд æрцыдис Чилæхсаты Азæмæтæн, дыккаг бынат райста Уанеты Валерия æмæ æртыккаг та саккаг кодтой Быценты Анастасияйæн. Иннæ финалистты дæр схорзæхджын кодтой зæрдылдарæн лæвæрдтæй.
Проекты хайад райсыны тыххæй январы мæйы куырдиæттæ бадæттой 100 адæймагæй фылдæр. Уыдонæй æрмæст 36 адæймаджы райстой проектмæ æмæ æртæ мæйы дæргъы уыдон жюрийы уæнгтæн æвдыстой сæ арæхстдзинад æмдзæвгæтæ, уацмыстæ æмæ прозæ кæсынæй. Финалон этапмæ ахызтысты 9 адæймаджы æмæ организатортæ фæндон рахастой, цæмæй æвдыст æрцæуа Ирон æвзаг æмæ литературæйы Боны цытæн, кæцыйы нысан кæндзыстæм 15 майы.
Поэзи æмæ прозæйы конкурс «Дзырд»-ы автортæ сты Бестауты Юлия æмæ Мамиты Григори. Ахæм проект стыр ахъаз у рæзгæ фæлтæрæн – йæ фæрцы бирæ курдиатджын гоймæгтæ раргом сты, мадæлон æвзагмæ ис хъармдæр ахаст æмæ ма фидардæр кæны райгуырæн зæхмæ уарзондзинад фæсивæды ‘хсæн.
Джиоты Алыксандр
