Республикæ Хуссар Ирыстоны Фæсивæдон политикæ, спорт æмæ туризмы фæдыл комитеты инициативæмæ гæсгæ фæсивæды æхсæн расидтысты 2-аг Республикон конкурс «Сæрмагонд стиль», зæгъгæ, ахæм номимæ, хуыздæр публикаци, фотоæрмæг æмæ социалон видеоролик бацæттæ кæныны тыххæй.
Фæсивæдон комитеты пресс-службæ нын куыд фехъусын кодта, уымæ гæсгæ ацы конкурс уагъд цæуы нæ республикæйы фæсивæды минæвæртты æхсæн æмæ дзы хайад райсын та сæ бон у, 14 азæй 30 азы онг кæуыл цæуы, ахæмтæн. «Нæ комитет аскъуыддзаг кодта, цæмæй фæсивæды æхсæн ауадзæм ахæм цымыдисон конкурс. Конкурс «Сæрмагонд стиль»-ы хайад чи райса, уыдонæн тæрхонгæнæг уыдзæнис компетентон жюри. Конкурсы фæуæлахизуæвджытæ хорзæхджын æрцæудзысты РХИ-йы Фæсивæдон политикæ, спорт æмæ туризмы фæдыл комитеты фыццаг, дыккаг æмæ æртыккаг къæпхæны дипломтæй, грамотатæй, афтæ ма сын бакæндзыстæм зынаргъ æмæ зæрдылдарæн лæвæрттæ. Конкурсы хуыздæр куыстытæ та мыхуыргонд æрцæудзысты нæ республикæйы мыхуырон æмæ электронон информацион фæрæзты, трансляцигонд цæудзысты паддзахадон телерадиокомпани «Ир» æмæ «ЮОГУ ТВ»-йы. Конкурсы нысан ма у æрыгон журналисттæн сæ профессионалон архайды фарсмæ æрбалæууын. Хорз уаид, фæсивæд активон хайад куы райсиккой ацы конкурсы, уый», – зæгъынц пресс-службæйы.
2-аг Республикон конкурс «Сæрмагонд стиль»-ы сæйраг нысаниуæг æмæ хæслæвæрдтæ сты æвзонг журналистты профессионалон хæдреализаци спорт, æнæниздзинад, фæсивæдон политикæ, культурæ, улæфт, ахуырад, экологи æмæ æндæр фадгуыты актуалон проблемæтæ сфæлдыстадон æгъдауæй скъуыддзаг кæнын.
Конкурс уагъд цæуы æртæ номинацийæ: «Хуыздæр публикаци», «Хуыздæр фотоæрмæг (фоторепортаж)» æмæ «Хуыздæр социалон видеоролик». Конкурсы фæдыл куырдиæттæ бавдисæн ис 26-æм февралæй 31-æм мартмæ ахæм адресыл: Ирæтты уынг 1, РХИ-йы Фæсивæдон политикæ, спорт æмæ туризмы фæдыл комитеты бæстыхаймæ.
Comments are closed, but trackbacks and pingbacks are open.