Конкурс – ботаникæйæ 

Цхинвалы Æрыгон натуралистты станцы ахуыргæнджытæ бацæттæ кодтой æмæ ауагътой конкурс «Райгуырæн бæстæйы флорæ гербариты».

Конкурс уагъд æрцыд республикæйы горæтты æмæ районты 6-7-8-æм  кълæсты скъоладзаутимæ. Бацæттæ йæ кодтой станцы ахуыргæн-джытæ Джиоты Нанæ, Джиоты Любовь, Джыгкайты Земæ, Гæбæраты Заринæ станцы коллективы æххуысæй. Конкурсы жюрийы уæнгтæ уыдысты  зындгонд ботаник Габайты Владимиры чызг дохтыр Габайты Залинæ, Джиоты Любæ, Чилæхсаты Заирæ, Джыгкайты Зоя æмæ Гасситы Дзерассæ.

Джиоты Нанæ куыд загъта, афтæмæй мадзалы сæйраг нысан уыд ахуыргæнинæгтæн райгуырæн бæстæйы æрдзмæ уарзондзинад æвзæрын кæнын, зонгæ сæ кæнын зайæгойты уагимæ, куыд сæм хъæуы зилын, хъомыл сæ кæнын, хосгæнæн зайæгойтæ куыд æмæ кæд хъæуы æмбырд кæнын, ботаникæйы теоретикон зонындзинæдтæй практикæйы куыд хъæуы пайда кæнын.

«Фыццаг хатт ахæм конкурс ауагътам 2019 азы. Уæд дзы хайад райстой æрмæстдæр горæты скъолаты ахуыргæнинæгтæ. Фæнд кодтам æр-вылаз дæр ахæм конкурстæ уадзын, фæлæ нын нал бантыст пандемийы аххосæй. Ныр та бацæттæ кодтам ногæй æмæ йæ ауагътам Рес-публикон æмвæзадыл. Арвыстам алы скъолатæм дæр нæ програм-мæ æмæ сæ фæхуыдтам. Иуæй-иу скъолатæ нын кæд раздæр фæбæрæг кодтой, сæхи кæй цæттæ кæнынц, уый, уæддæр, хъыгагæн, хайад нæ райс-той, горæтæй дæрддзæф районты кæй сты æмæ транспортон хъуагдзи-нæдтæ кæй æвзарынц, уый аххосæй. Æдæппæт конкурсы хайадисджыты нымæц уыд 18 скъоладзауы бæрц», – радзырдта Нанæ.

Нанæ куыд загъта, афтæмæй конкурсы программæмæ хаст уыд презентацитæ æмæ докладтæ бацæттæ кæнын, алы мыггаджы зайæгойтæн характеристикæ дæттын. Презентацитæ уыдысты ахæм темæтыл куыд хъæдуры алыгъуызон сорттæ, хъæлæрдзыйы, пысырайы æмæ æндæр ахæмтæ. Цæттæгæнæн æмгъуыды рæстæджы скъоладзаутæ ацыдысты республикæйы æрдзы хъæбысмæ, уым æрæмбырд кодтой æрмæг æмæ сæ бацæттæ кодтой гербаритæ.

Фыццаг бынат лæвæрд æрцыд Бехъмары астæуккаг скъолайы ахуыргæнинаг Багаты Эльбрусæн, дыккаг бынат – Цхинвалы 2-аг астæуккаг скъолайы ахуыргæнинаг Цхуырбаты Динæ, æмæ æртыккаг бынат та лæвæрд æрцыд 10-æм скъолайы ахуыргæнинаг Дзигойты Елизаветæйæн.

Уæлахиздзаутæ хорзæхджын æрцыдысты грамотæтæй, æмæ сын зæрдылдарынæн та радтой чингуытæ «Уход за комнатными расте-ниями» æмæ «Лекарственные растения».

Хуыгаты Миленæ