Нæ Республикæйы коронавирусы ныхмæ тох кæныны тыххæй цы оперативон штаб баконд æрцыд, уый 2 ноябры фæндон рахаста, цæмæй 15 ноябрмæ нæ республикæйы территорийыл карантинон нормæтæ ногæй æххæст цæуой. Ацы фæндон рæхæссыны фæстиуæгæн рæстæгмæ æхгæд æрцыдысты хиирхæфсæн центртæ, аттракционтæ, культурæ æмæ спорты объекттæ, ахуырадон уагдæттæ. Уыимæ ма иумæ бар нæй спортивон, культурон æмæ æндæр массон мадзæлттæ уадзæн дæр. Карантины нормæтæ куыд æххæст цæуынц, уымæ та сæ хъус дарынц барадхъахъхъæнæг органтæ.
Горæт Цхинвалы милицийы фадыгон инспектортæ ныридæгæн зилынц кафетыл, ресторантыл æмæ æндæр ахæм объекттыл, æмæ сын сæ хицæутты фæдзæхсынц, цæмæй ма халой карантинон нормæтæ. Фадыгон инспектор Хæбæлаты Леваны ныхæстæм гæсгæ, ныридæгæн ацы объектты хицæуттæ иууылдæр сразы сты нæ домæнтыл æмæ сæ къухтæ æрфыстой.
«Мидхъуыддæгты министры бардзырдмæ гæсгæ мах азылдыстæм горæты хæрæндæттыл æмæ сæ бафæдзæхстам, цæмæй рæстæгмæ мауал исой заказтæ банкеттæ, гуырæнбонтæ, чындзæхсæвтæ, куывдтæ æмæ ма æндæр массон мадзæлтты фæдыл», – зæгъы Хæбæлаты Леван.
Фадыгон инспектортæ ма сæ хъус дарынц иннæ ахæм объекттæм дæр, кæцытæн рæстæгмæ сæ куыст æрурæдтой. Уымæй уæлдай ма профилактикон куыст кæнынц цæрджытимæ, цæмæй сæхи бахизой массон религиозон мадзæлттæй, чындзæхсæвтæм æмæ зиæнттæм цæуынæй æмæ, бирæ адæм кæм тымбыл кæны, ахæм рæттæй.
Comments are closed, but trackbacks and pingbacks are open.