Сæ адæмæн лæггад кæнын сæ службæйон хæс

Кӕцыфӕнды ӕхсӕнад дӕр фӕтырны сабырдзинад, рӕстдзинад ӕмӕ фӕткмӕ. Нӕ рагфыдӕлтӕм уыд ӕгъдӕуттӕ ӕмӕ традицитӕ, кӕцыты сӕрты ахизӕн нӕ уыд ӕмӕ стыр ахъаз уыдысты адӕмы хорз уагахастӕн. Уыцы нормӕтӕ-иу чи фехӕлдта, уыдон-иу ӕфхӕрд ӕрцыдысты, ӕгӕрыстӕмӕй-иу сӕ се ‘хсӕнадӕй дӕр фӕсырдтой, ома-иу сыл хъоды бакодтой. Рӕстӕг куыд цыд, афтӕ дуг дӕр ивта, ивтой ӕхсӕнадтӕ дӕр, ӕмӕ уыцы ӕгъдӕуттӕ фаг нал уыдысты ӕхсӕнадон фӕтк ӕрӕвӕрынӕн. Уый фӕстиуӕгӕн ӕрымысыдысты закъӕттӕ ӕмӕ уыдон фӕлгӕтты бархалджытӕ бӕрндзинадмӕ конд цыдысты. Цӕмӕй уыцы закъӕттӕ ӕмбӕлонӕй кусой, уый тыххӕй та арӕзт ӕрцы-дысты барадхъахъхъӕнӕг органтӕ.

Барадхъахъхъӕнӕг органтӕн сӕ хӕстӕ алыхуызӕттӕ сты, фӕлӕ сӕ нысан у иу – ӕхсӕнадон фӕтк ӕмӕ адӕмы ӕдасдзинад хъахъхъӕнын. Фӕтк ӕвӕрыны хъуыддаджы иууыл стырдӕр уӕз цӕуы мидхъуыддӕгты органтыл, бӕлвырдӕй та, фадыгон инспектортыл. Афтӕ зӕгъӕн ис, ӕмӕ милицийы куысты фӕстиуджытӕ бирӕбӕрцӕй баст сты ацы службӕйы куыстимӕ. Ӕдде бакӕсгӕйӕ афтӕ зыны, цыма фадыгон ин-спекторӕн йӕ хӕстӕ бынтон хуы-мӕтӕг ӕмӕ ӕнӕахадгӕ сты,  фӕлӕ кӕнынц иууыл фылдӕр ӕмӕ вазыгджындӕр куыст закъонӕвӕрынады. Фадыгон инспектортӕ кусынц комкоммӕ адӕмимӕ, ирдӕй уынынц ӕхсӕнады хъӕндзинӕдтӕ, нӕ уадзынц ӕхсӕнадон фӕтк халын, ӕдзух кӕнынц профилактикон куыст куыд хъомыл адӕмимӕ, афтӕ ӕнӕххӕст кары сывӕллӕттимӕ дӕр. Уымӕй уӕлдай ма сӕ хъус дарынц, ахӕстонӕй чи рацыд, ахӕм ӕмбӕстӕгтӕм, контроль кӕ-нынц ӕхсӕнгарз кӕмӕ ис, уыдоны, кӕсынц уынгты сыгъдӕгдзинадмӕ, адӕмы уагахастмӕ. Иууыл уынгӕджы та сты хъаугъатӕй, кӕцытӕ арӕх ӕрцӕуынц куыд бинонты, афтӕ сыхӕгты ‘хсӕн дӕр. Ӕмӕ фадыгон инспектор та кӕддӕриддӕр хъуамӕ уа тыхст адӕмы уӕлхъус.

Мидхъуыддӕгты органты ныртæккæ кусы 47 фадыгон инспекторы ӕмӕ дзы алкӕмӕн дӕр бар ис ӕмӕ йӕ хъус дара 3 мин адӕймагмӕ. Ӕцӕг махмӕ кæмдæрты уыйбӕрц адӕм цырагъы рухсӕй дӕр нал ссардзынӕ, – нӕ хъӕутӕн сӕ фылдӕр ӕмбис дӕр нал сты. Ӕрмӕст ма нӕм горӕт Цхинвалы ис дзӕвгар цӕрджытӕ ӕмӕ амы фадыгон инспектортӕн дӕр уый фӕстиуӕгӕн ис фылдӕр куыст. Фӕлӕ афтӕ зӕгъӕн дӕр нӕй ӕмӕ фадыгон инспекторӕн адӕмы нымӕцмӕ гӕсгӕ бирӕ къаддӕр куыст вӕййы. Кӕд хъӕуы иу цӕрӕг йедтӕмӕ нӕй, уӕддӕр инспектор хӕсджын у, ӕмӕ уыцы ӕмбӕстаджы дæр регуляронæй бӕрӕг кӕна, йӕ проблемӕтимӕ йын зонгӕ уа ӕмӕ йын тыхст рӕстӕджы баххуыс кӕна. Алыварсонӕй куы бакӕсӕм фадыгон инспекторы хӕстӕм, уӕд, зӕгъӕн ис, ӕмӕ алкӕй бон кӕй нӕ бауыдзӕн ацы профессийы кусын. Цхинвалы районы мидхъуыддæгты управленийы фадыгон инспектор Хъуылымбегты Александр куыд зӕгъы, афтӕмӕй фадыгон инспектор фыццаджыдӕр хъуамӕ уарза йӕ куыст. «Дӕ куыстыл цас ӕнувыддӕр уай, уыйбӕрц дын ӕнцондӕр уыдзӕнис. Дӕ професси хъуамӕ уарзай ӕмӕ адӕмимӕ кусгӕйӕ та уай рӕстдзинадыл дзурӕг, цӕсгомджынӕй ӕххӕст кӕнай тыхст ӕмбӕстӕгты домӕнтӕ», – банысан кодта Хъуылымбегты Александр.

 Хъуылымбегты Александр милицийы кусы 1998 азӕй фӕстӕмӕ. Йӕ цӕсгомджын  куысты фӕстиуӕгӕн ын 2012 азы лӕвӕрд ӕрцыдис «Милицийы хуыздӕр фадыгон инспектор»-ы ном. Абоны бон дӕр лӕггад кӕны йӕ адӕмӕн ӕмӕ йӕ фӕлтӕрддзинад дӕтты ӕрыгон фӕлтӕртӕн, кӕцытӕ ӕрцыдысты Уӕрӕсейы уӕлдӕр ахуыргӕнӕндӕттӕй ӕмӕ кусынц фадыгон инспектортӕй.

«Милицийы хуыздӕр фадыгон инспектор»-ы ном ӕрвылаз дӕр лӕвӕрд цӕуы фадыгон инспекторы бакӕнгӕ куыст бахынцгӕйӕ ӕмӕ бынӕттон цӕрджыты бафӕрсыны фӕстиуӕгӕн. Ӕмӕ ацы аз та ацы хорзӕхы хицау баци милицийы Къуайсайы хайы фадыгон инспектор Козаты Анарӕ ӕмӕ йӕ мидхъуыддӕгты министр Наниты Игорь цытджын ӕгъдауӕй схорзӕхджын кодта. «Фыдракӕндтӕ ӕмӕ фӕткхалӕн цаутӕ бӕрӕг кӕй фӕкъаддӕр сты, уыцы хъуыддагмӕ егъау хайбавӕрд бахастой фадыгон инспектортӕ. Фӕнды мӕ, цӕмӕй уӕ службӕйон хӕстӕ дарддӕр дӕр ӕххӕст кӕнат цӕсгомджынӕй, ӕмӕ ӕз та ӕппӕт мадзӕлттӕй архайдзынӕн уӕ уавӕртӕ хуыздӕр кӕныныл», – банысан кодта ведомствойы сӕргълӕууӕг. 

 Ӕрыгон чызг йӕ чысылӕй фӕстӕмӕ бӕллыд милицийы кусынмӕ ӕмӕ 2009 азы йӕ бӕллиц сӕххӕст. Уӕдӕй абоны онг Козаты Анарӕ цӕсгомджынӕй ӕххӕст кӕны йӕ службӕйон хӕстӕ ӕмӕ йын ис хорз ӕнтыстытӕ. «Мӕнӕн мӕ фарсмӕ мӕ коллегӕтӕ куынӕ уыдаиккой, уӕд мын бынтондӕр ницы бантыстаид. Ацы хорзӕх мӕ ноджы сразӕнгард кӕндзӕнис ӕмӕ дарддӕр дывӕр тыхтимӕ лӕггад кӕндзынӕн мӕ адӕмӕн», – банысан кодта Козаты Анарӕ.

Фадыгон инспектортӕ азы райдианӕй фӕстӕмӕ сӕххӕст кодтой 259 куырдиаты, кӕцыты милицимӕ ӕрбалӕвӕрдтой тыхст ӕмбӕстӕгтӕ. Уымӕй уӕлдай ма бабӕрӕг кодтой 5 мин хӕдзары, профилактикон куыст бакодтой алы кары ӕмӕ категорийы адӕмимӕ дӕр, æрнывыл кодтой 102 хъаугъайы. Нӕ республикӕйы уагъд цӕуӕг мадзӕлтты кӕддӕриддӕр фӕхъахъхъӕнынц ӕхсӕнадон фӕтк ӕмӕ бархалджыты ӕркодтой бӕрндзинадмӕ, – тӕрхондонмӕ арвыстой 121 хъуыддаджы.

ДЖИОТЫ Александр