Бирæтæм афтæ кæсы, æмæ милицийы фадыгон инспекторы дæсныйад хуымæтæг æмæ æнæ-ахадгæ у. Фæлæ ацы куыст тынг ахсджиаг у. Хъаугъатæ, бинонты æмæ сыхæгты æхсæн зæрдæхсаинаг адæммæ хъус дарын, æхсæнады фæтк хъахъхъæнын – уыдон сты сæ куысты хæрз чысыл хай.
Горæт Цхинвалы Мидхъуыддæгты управленийы фадыгон инспекторты фыццæгæм хайады хистæр, милицийы капитан Остъаты Олег куыд бафиппайдта, афтæмæй иууыл арæхдæр барадхалæн цаутæ вæййы бинонты æхсæн ахастыты æмæ æхсæнадон фæтк фехалыны фæдыл.
«Профилактикон куыст уадзæм куыд иумиагæй, афтæ ма хицæн адæймæгтимæ дæр. Индивидуалонæй кусæм ахæм æмбæстæгтимæ, кæцытæ милицийы лæууынц хыгъды: раздæр ахæстоны чи бадтис, æмгъуыдæй раздæр ахæстонæй кæй рауагътой, алкоголизмæй рынчынтæ æмæ афтæ дарддæр», – зæгъы Остъаты Олег.
Фадыгон инспектортæ æрвылбон дæр азилынц цæрджытыл, бабæрæг кæнынц регистрацигонд æхсæнгæрзтæ, сæ хъус дарынц алкоголизм, наркомани æмæ нуæртты низæй рынчын чи у, ахæмтæм. Горæт Цхинвалы профилактикон хыгъды лæууынц 175 адæймаджы, кæцытæ бадтысты ахæстоны. Уыдонимæ фадыгон инспектортæ рæстæгæй-рæстæгмæ аныхас кæнынц профилактикæйы нысанæн, цæмæй дарддæр раст фæндагыл ныллæууой æмæ закъон фехалынæй сæхи хизой.
«Сæрды Цхинвалмæ æрцæуы æндæр рæттæй бирæ адæм æмæ нæ бахъæуы уæлдай къæрццхъус дæр уæвын, цæмæй сæхи дарой уагыл æмæ фыдракæнд ма саразой», – банысан кодта Остъаты Олег.
Фадыгон инспектортæ ма сгарынц горæты уынгты рекламон фыстытæ, уымæн æмæ бирæ амалиуæггæнджытæм нæ вæййы рекламæйы бары гæххæттытæ горæты администрацийы архитектурæйы хайадæй.
Профилактикон куыстæн йæ фылдæр хай кæнынц фадыгон инспектортæ. Сæ службæйон хæстæ æххæст кæныны тыххæй сты бузныджы ныхæстæ зæгъыны аккаг. Иу фадыгон инспекторы цæстдарды бын астæуккаг ны-мадæй вæййы 5 мин адæймаджы. Афæдзы æмбисы дæргъы фадыгон инспектортæ бабæрæг кодтой 700 хæдзар æмæ фатеры, кæцыты цæры 2 мин адæймагæй фылдæр.
Джиоты Александр
Comments are closed, but trackbacks and pingbacks are open.