Нæ республикæйы Мидхъуыддæгты министрады фадыгон инспектортæ 17 ноябры банысан кодтой сæ профессионалон бæрæгбон – сæххæст сыл ис 97 азы. Сæ бæрæгбоны цытæн сын зæрдæбын арфæйы ныхæстæ загъта Мидхъуыддæгты министры хæстæ æххæстгæнæг Пухаты Мераб æмæ банысан кодта, зæгъгæ, фадыгон инспекторты уæхсджытыл ис стыр хæстæ, гуырахстджын куыст æмæ сæ алчидæр хъуамæ тырна йæ службæйон хæстæ æмбæлонæй æххæст кæнынмæ.
«Фадыгон инспектортæй фæкусынц иууыл фæлтæрддæр инспектортæ, уымæн æмæ уæ хæстæ сты вазыгджын, кусут комкоммæ адæмимæ. Ӕрвылбон дæр æмбæлут адæмы алыгъуызон проблемæтимæ, скъуыддзаг кæнут конфликттæ, æппынæдзух кæнут профилактикон куыст. Сымах уæ профессионалон хæстæ æххæст кæнынмæ цавæр цæстæй кæсат, иумийагæй сисгæйæ милицийы куыстæн кæндзысты ахæм аргъ цæрджытæ. Ныфс мæ ис, уæ фæлтæрддзинад æмæ профессионалондзинад стыр ахъаз кæй фæуыдзысты адæмы сабырадæн!», – банысан кодта йæ арфæты Пухаты Мераб.
Милицийы куысты иумийагæй сисгæ-йæ ацы службæ ахсы иууыл вазыгджындæр бынат. Фадыгон инспектор, фылдæр хатт, хуымæтæг адæймагæн свæййы иунæг хицауады минæвар, кæцы йын фены йæ тыхстдзинад æмæ йæ фарсмæ балæууы æмæ йын, гæнæн уæвгæйæ, йæ проблемæ аскъуыддзаг кæны. Ацы хабар уæлдай ирддæрæй разыны дæрддзæф хъæуты, кæцытæм бæрæггæнæг бацæуынц æрмæстдæр æвзæрстыты рæстæджы. Уымæ гæсгæ, цæсгомджынæй йæ службæйон хæстæ чи феххæст кæны, уыцы инспектор свæййы бынæттон цæрæджы ныфсы мæсыг, кæцымæ кæдфæнды дæр ис бахатæн æххуысмæ.
Фадыгон инспектортæн тынг бирæ куыст ис æмæ сыл фылдæр хатт нæ феххæссынц. Уымæй уæлдай ма ацы аз ноджы сæ хæстæ уæлдайджынтæй фæ-фылдæр сты коронавирусы эпидемийы фæстиуæгæн. Райдыдтой ма адæмимæ профилактикон куыст вирусæй хи бахъахъхъæныны фæдыл, сæ хъус дардтой, карантинон нормæтæ куыд æххæст цæуынц цæрджыты æрдыгæй, уымæ, æмæ ма фæдзæхстой хæрæндæтты æмæ æндæр уагдæтты хицæутты, кæцыты вæййы бирæ адæм, цæмæй ма уадзой массон мадзæлттæ. Æппæт ацы хабæрттæ бæрæг фæфылдæр кодтой фадыгон инспекторты куыст æмæ уымæ гæсгæ сæ комкоммæ хæстæ æххæст кæныны хъуыддаг бæрæг фæкъуыхцы.
Фæлæ æппæт зындзинæдтæм æнæкæсгæйæ милицийы кусджытæ кæддæриддæр сты адæмы фарсмæ æмæ сæ æппынæдзух хизынц фыдгæнджытæй. Горæт Цхинвалы фадыгон инспектортæ дæр, кæд æнæхъæн азы дæргъы карантинон мадзæлттæм сæ хъус дардтой, уæддæр ма сæххæст кодтой 300 бæрц хъæстытæ æмæ куырдиæттæ, бабæрæг кодтой 5 мин хæдзары æмæ ма æнæрлæугæйæ профилактикон куыст кодтой, раздæр ахæстоны чи бадтис, ахæм гоймæгтимæ. Уымæй уæлдай ма сæрдыгон зылдысты донбылты æмæ фæдзæхстой адæмы, цæмæй сæ фæстæ зынг æмæ брон ма уадзой.
Фæстаг азты нæ республикæйы арæзтадон объекттæ кæй фылдæр кæнынц, уый, кæй зæгъын æй хъæуы, хорз хъуыддаг у, фæлæ ма дзы разыны ноджы иу проблемæ. Бынæттон цæр-джытæй æмæ ма арæзтадон компанитæй дæр разыны ахæмтæ, кæцытæ сæ арæзтадон брон акалынц æнæмбæлон рæтты æмæ нычъизи кæнынц æрдз. Ахæм нывтæ фенæн вæййы, куыд горæтгæрæтты, афтæ ма горæтæй дæрддзæф рæтты æмæ районты дæр. Фадыгон инспектортæн кæд сæ бон бавæййы фæткхалджыты рабæрæг кæнын, уæд сæ бæрндзинадмæ æркæнынц.
Нæ республикæйы цæрджыты фыл-дæр хай горæт Цхинвалы цæры æмæ ам фадыгон инспектортæн фылдæр куыст ис. Фæлæ районты та хъæутæ сæ кæрæдзимæ дæрддзæф кæй сты, уымæ гæсгæ милицийы кусджыты бахъæуы фылдæр рæстæг фæндæгтыл хардз кæнын. Зæгъæм, Ленингоры районы цæры 2 500 адæймагæй фылдæр æмæ дзы кæцыдæр дæрддзæф хъæуы иунæг адæймаг дæр куы цæра, уæддæр æм хъæуы иннæтау хъус дарын. Фадыгон инспектор Дрияты Азæмæты ныхæстæм гæсгæ ацы районы цæрынц бынтон æнæхъыгдард адæм æмæ дзы уымæ гæсгæ конфликттæ арæх нæ вæййы.
Дрияты Азæмæт 2016 азы каст фæцис Краснодары Мидхъуыддæгты министрады университет æмæ йæ райгуырæн бæстæмæ куы æрæздæхт, уæд райдыдта кусын барадхъахъæнæг органты. Фыццаг бацыд уголовон фæдагуырды службæмæ, фæлæ фадыгон инспекторы куыст йæ зæрдæмæ кæй цыд, уымæ гæсгæ йæхи аивын кодта ацы куыстмæ. Ныридæгæн у Ленингоры поселочы фадыгон инспектор æмæ йæм хауы 900 адæймаджы бæрц.
«Мæнæн мæ чысылæй фæстæмæ æхцондзинад лæвæрдта искæмæн баххуыс кæнын æмæ мын фадыгон инспекторæй кусгæйæ та ахæм фадат æппынæдзух дæр вæййы. Цæрджытыл азил-гæйæ куы фенын тыхст адæймаджы, уæд йæ фарсмæ балæууын. Нæ районы цæрджыты фылдæр хай сты кардзыд æмæ иунæг, – сæ цот кæмæн Гуырдзыстоны сты, кæмæн та – Уæрæсейы. Уымæ гæсгæ сæм фæкæсæг нæ вæй-йы æмæ сын æз та, мæ рæстæг мæ куыд амоны, афтæ баххуыс кæнын, – кæмæн суг æрсæттын, кæмæн йæ кау бараст кæнын. Уыцы куыстытæ мæнæн мæ рæстæгæй бирæ нæ байсынц, нæдæр тынг бафæллайын, фæлæ, куыд фæдзурынц, – «судзин зæрдæ ссардта». Тынг æхсызгон мын вæййы арфæйы ныхæстæ ма мын куы фæзæ-гъынц, уæд», – банысан кодта Дрияты Азæмæт.
Ленингоры районы фадыгон инспектортæ дæр иннæтау æрвылбон æх-хæст кæнынц сæ службæйон хæстæ. Кæд районы цæрджытæ хъаугъатæ кæныны ‘рдæм не сты, уæддæр азы дæргъы æрæмбырд 8 куырдиат æмæ хъасты, кæцытæ æвæстиатæй скъуыддзаг æрцыдысты. Уымæй уæлдай ма æрнывыл кодтой 6 конфликты, 22 адæймаджы та æфхæрд æрцыдысты административон фыдракæндтæ саразыны фæстиуæгæн. Ацы районы цæрджытæ ма арæх фехалынц Хуссар Ирыстоны паддзахадон арæн æмæ уымæ гæсгæ фадыгон инспектортæ арæнхъахъхъæнджытимæ ауадзынц рейдон мадзæлттæ, цæмæй бæрндзинадмæ конд æрцæуой фæткхалджытæ.
Уæдæ, куыд уынæм, афтæмæй фадыгон инспекторы куыст у зын, фæлæ æнæмæнгхъæуæг. Уымæн æмæ ацы службæйы æмбæлон куысты фæрцы тынг бирæ проблемæтæ иуварс æрцæуынц. Разындзæнис ахæмтæ дæр, кæцытæ нæ зонынц сæ фадыгон инспекторты, кæнæ разы не сты сæ куыстæй. О. Ис дзы ахæмтæ дæр, уымæн æмæ алчи ахæм куысты нæ бæззы æмæ ахæм милицийы кусæгмæ цыбыр рæстæг куы бакæсынц, уæд æй кæнæ æндæр службæмæ ахизын кæнынц, кæнæ та йæ куыстæй ссарибар кæнынц. Вæййы ма афтæ дæр æмæ инспектор вæййы æрыгон, æвæлтæрд, нырма уæлдæр ахуыргæнæндон æрæджы каст чи фæцис, ахæм, æмæ уымæн та æнæмæнгæй хъæуы рæстæг раттын. Æндæр гæнæн дзы нæй. Уымæн æмæ хорз, фæлтæрд кусджытæ æвиппайды не свæййынц, – хъуамæ практикон æгъдауæй равдисой сæ зонындзинæдтæ æмæ сæ куыстхъомдзинад.
ДЖИОТЫ Александр
Comments are closed, but trackbacks and pingbacks are open.