Карантинон режим бакæныны фæстиуæгæн æмбæлон службæтæ сæ хъус дарынц, цæмæй алчидæр æххæст кæна райсгæ мадзæлттæ æмæ домæнтæ. Уый фæдыл милицийы фадыгон инспектортæ зилынц, республикæйы территорийыл цы хæрæндæттæ, кафетæ æмæ ресторантæ ис, уыдоныл, æмæ сын сæ хицæутты фæдзæхсынц, цæмæй ма бауадзой аразын чындзæхсæвтæ, бирæ адæм кæм вæййы, ахæм фынгтæ æмæ æндæр бæрæгбонтæ. Уымæй уæлдай ма сын æрфыссын кодтой сæ къухтæ дæр, 1 декабры онг кæй æххæст кæндзысты эпидемиологон домæнтæ, уый тыххæй.
Фадыгон инспектортæ ма азилынц æмæ бабæрæг кæнынц спортивон объекттæ, сывæллæтты хиирхæфсæн центртæ æмæ аттракционтæ, компьютерон клубтæ, кæцытæ æхгæд сты 1 ноябрмæ. Рейдон мадзæлтты рæстæджы милицийы кусджытæ не сбæлвырд кодтой фæткхалæн цаутæ.
Фæндагон змæлды æдасдзинады инспектортæ дæр æнæ хæслæвæрд нæ баззадысты карантинон режим бахъахъхъæныны хъуыддаджы, – азылдысты таксисттыл æмæ семæ ауагътой профилактикон мадзæлттæ.
«Махæн бахæс кодтой, цæмæй бафæдзæхсæм таксистты санитарон домæнтæ æххæст кæныны тыххæй. Алкæмæ дæр хъуамæ уа дезинфекцигæнæн донгъæд æмæ маскæтæ. Стæй ма сæ бæлццæттæй дæр хъуамæ домой, цæмæй уыдон дæр машинæйы бадгæйæ уой маскæйы. Фæткхалджыты куы сбæлвырд кæнæм, уæд конд æрцæудзысты административон бæрндзинадмæ», – банысан кодта милицийы инспектор Тедеты Маир.
Фæндагон змæлды æдасдзинады инспектортæн ма ахæм фембæлдтытæ уыд автобусты шофыртимæ дæр. Уымæй уæлдай ма фæдзæхсынц бæлццæтты дæр, семæ уадзынц профилактикон мадзæлттæ æмæ сын æмбарын кæнынц, санитарон домæнтæ æххæст кæнын æнæмæнг хъуыддаг кæй у.
Миграцийы фарстаты фæдыл милицийы управленийы кусджытæ та бæрæг кæнынц фæсарæйнаг æмбæстæгты, кæцытæ ныртæккæ цæрынц Хуссар Ирыстоны. Уыдонæн сæ фылдæр хай сты Астæуккаг Азийы бæстæты æмбæстæгтæ æмæ нæ республикæмæ æрцыдысты куыстагур. Милицийы кусджытæ сæ фæдзæхсынц, цæмæй ма халой карантинон режим æмæ-иу тыхст рæстæджы та фехъусын кæной барадхъахъхъæнæг органтæм.
Ахæм рейдон мадзæлттæ милицийы кусджытæ регуляронæй уадздзысты суанг карантинон режимы фæудмæ.

ДЖИОТЫ Алыксандр

Ацы æрмæджытæ дæр бакæс:

ЦÆТТÆ СТЫ СÆ ХÆСТÆ АДÆМЫ ХÆРЗИУÆГÆН ÆХХÆСТ КÆНЫНМÆ Кусынц æрмæстдæр адæмы тыххæй Кæнынц профилактикон куыст Куыд ныл æндавы карантинон режим? Карантин æмæ йæ фæстиуджытæ

Comments are closed, but trackbacks and pingbacks are open.