Ног азы æрбалæудæй алы адæймаг дæр фæкуры, цæмæй йын æрхæсса зæрдæйы фæндиаг ногдзинæдтæ, амонд æмæ фæрныгад. Ныртæккæ уæззау рæстæг у æмæ рæстаг адæмтæ фылдæр фæкувынц, цæмæй зæххыл уа сабырад. Бахатыдтæн мæ хъæуккаг хæларзæрдæ æмæ æгъдауыл хæст адæймаг Санахъоты Валеримæ, цæмæй Ног азы къæсæрыл йæ фæндиæгтæ загъта йæ иубæстон адæмæн.
– Мæн раарфæ кæнын фæнды, цæмæй Хуссар Ирыстон æмæ æмткæй рæстагон адæмты уа Ног азы хорзæх, цы рæсугъд фæндтæ æмæ бæллицтæ сæм ис, уыдон сын сæххæст уой 2024 азы. Ацæугæ аз уæззау аз уыд, хæсты цæхæры бирæ фæсивæд бабын æмæ уыдæттæ зæрдæйæн зын сты. Ног аз ахæм аз фæуæд, цæмæй хæстæндзарджытæ сæхи æрæмбарой, адæмтæ кæрæдзийы уарзгæйæ æмæ хæларæй куыд цæрой. Æз уарзын фæллой кæнын æмæ мæ фæнды, цæмæй алчидæр уа фæллойыл хæст. Ис нæм хорз фæсивæд æмæ кæддæриддæр хызт уæд фыдбылызæй, хайджын та уæд царды хорздзинæдтæй, хистæр кары адæм сын уынæд сæ арфæйаг бакæнгæ хъуыддæгтæ. Ноджы ма хистæр кары адæмæн цы уой лæггадхъом, ахæм амонд сæ уæд. Алы бинонтæ дæр кусæд, фæллой кæнæд сæхи æмæ се ‘ввахс æмбæстæгты фæндиаг, хорз хъуыддæгтæ кæнынмæ уæд цæттæ æмæ сæ цардæй рухс кæнæд сæ зæрдæтæ.
Ног аз нæ къæсæрыл ис æмæ нæ алы адæймаг дæр хайджын уæд йæ хæрзиуджытæй. Ног хорздзинæдтæ, амонд, фарн æрбынат кæнæд Ирыстоны алы хæдзары дæр!
ХУЫБИАТЫ Никъала
