Президент Гаглойты Алан йæхимæ райста Фæсарæйнаг хъуыддæгты министр Джиоты Æхсар æмæ УФ-йы РХИ-йы Уæлвæткон æмæ Æххæстбарджын минæвар Гасситы Знауыры.
Паддзахады сæргълæууæгæн уыдон фехъусын кодтой 2022 азы бакæнгæ куыст æмæ сæ дарддæры плæнтты тыххæй.
Джиоты Æхсар банысан кодта, æддагполитикон ведомствойы куысты ‘ргом кæй у здæхт Хуссар Ирыстоны стратегион партнер – Уæрæсейы Федерациимæ æмахастыты рæзтмæ.
«Ивгъуыд аз Уæрæсе æмæ Хуссар Ирыстон сæ къухтæ æрфыстой 2022-2025 азты республикæйы социалон-экономикон рæзты программæйыл. Абон куыст цæуы ацы программæйæн суагъæ саразыныл, кæцы хауы бюджетон фадыгмæ. Уыимæ иумæ ма мах план кæнæм Уæрæсейы регионтимæ куыст райдайын æмæ рауæрæх кæнын. Фæсарæйнаг хъуыддæгты фæдыл уæрæсейаг коллегæты ‘рдыгæй махæн ис æмбарынад æмæ æххуыс», – загъта уый.
Джиоты Æхсар ма банысан кодта, зæгъгæ, æддагполитикон ведомство дарддæр дæр Хуссар Ирыстоны профилон министрадтæ æмæ ведомствотæн æххуыс бакæндзæн Уæрæсейы Федерациимæ бастдзинæдтæ бæстон кæнынæн.
Гаглойты Аланæн ма фехъусын кодтой Хуссар Ирыстоны хæларадон бæстæты æддагполитикон ведомствоты æмгуыстады тыххæй.
Гасситы Знауыр банысан кодта, зæгъгæ, уый размæ азты тоталон изоляцийы уавæрты коронавирусон инфекцийы пандемийы аххосæй Хуссар Ирыстоны минæварад кодта активон куыст республикæйы медикаменттæ æмæ тест-системæтæй сифтонг кæныныл.
«Ныр, активон фазæмæ рахизгæйæ, мах фæнд кæнæм, фыццаджыдæр, кусын Хуссар Ирыстоны экономикон рæзты фадыджы. Сæйраг у республикæмæ инвестицитæ æрбаздахын. Ацы фарсты фæдыл деталон план цæттæ у», – загъта уый.
Паддзахады сæргълæууæг бузныг загъта Джиоты Æхсар æмæ Гасситы Знауырæн сæ активон куысты фæдыл æмæ ныфс бавæрдта æппæт банысангонд плæнттæ æнтыстджынæй кæй сæххæст уыдзысты.
