Æмæ æндæр фарстатæ
Хъæууон хæдзарады министр Мæргъиты Алан доклад сарæзта республикæйы ветеринарон лаборатори саразыны тыххæй æмæ уынаффæмæ рахаста паддзахадон бюджетон уагдон «Республикон ветеринарон лаборатори» саразыны тыххæй проект.
Министр куыд банысан кодта, афтæмæй Хуссар Ирыстоны хъæууонхæдзарадон хъусдарды службæйы структурæйы ис цæрæгойты низтæ иртасæн хайад. Ацы хайад кусы цæрæгойты низты диагностикæйы фæдыл лабораторон иртасæнтæ уадзыныл. Уынаффæйы проекты нысан у ацы иртасæнтыл республикæйы закъонмæ гæсгæ кусын.
Паддзахадон бюджетон уагдон саразынæн цы 12 иуæджы рахицæн кæндзысты, уыдонмæ ма бафтауын хъæудзæн бухгалтер, хъуыддагдар æмæ хъахъхъæнæджы штатон иуæг-тæ. Афтæмæй, министры ныхæстæм гæсгæ, Республикон ветеринарон ла-бораторийы кусджыты иумæйаг нымæц уыдзæн 15 адæймаджы.
Министрты кабинет уынаффæйы райстой æмхъæлæсæй.
Банысан кæнын хъæуы уый, æмæ Республикон ветеринарон лабораторийы тыххæй æрæджы Цхинвалмæ кусæгон балцы æрцыд Крапоткины крайон ветеринарон лабораторийы (Краснодары край) директор Олег Черных æмæ бабæрæг кодта ла-бораторийы бæстыхай æмæ ифтонггæрзтæ. Уый фæнд кæны Иммуноферментон анализæн диагностикæйы тыххæй лабораторийæн методикон æмæ консультативон æххуыс бакæнын, афтæ ма республикæйы ветеринарон службæйы кусджытæн лекцитæ бакæсын.
Хуссар Ирыстоны Президенты Барамындæй Олег Черных хорзæхджын æрцыд «РХИ-йы сгуыхт ветеринарон дохтыр»-ы кадджын номæй.
Социалон фиддонтæ
Дарддæр раныхас кодта æнæниздзинад хъахъхъæнын æмæ социалон рæзты министр Плиты Агуындæ. Уый раразмæ кодта æххуысхъуаг æмбæстæгтæ æмæ бинонты хицæн кате-горийæн паддзахадон социалон æх-хуыс бакæныны фæткы уынаффæйы проект.
Министр бамбарын кодта, зæгъгæ, ацы уынаффæйы проекты нысан у куысты эффективондзинад фæбæрзонддæр кæнын æмæ республикæйы территорийыл цæрæг æмбæстæгты æмæ бинонты хицæн категорийæн, ома, астæуккаг нымадæй удæн æфтиаг цæрынæнхъæуæг минимумæй къаддæр кæмæн у, уыдонæн социалон баххуыс кæнын. Банысангонд категорийæн паддзахады æрдыгæй афæдз иу хатт æххуыс цæудзæн æхцайæ.
Æрдзон газ цы цæрæн пункттæм нæ хæццæ кæны, уыцы цæрджытæй сугтæ самал кæнынæн æхцайы фæрæзтæ кæмæн нæй, уыдонæн дæр сæ бон уыдзæн паддзахадон æххуысæй спайда кæнын. Иу бинонты социалон æххуыс нæ уыдзæн 20 мин сомæй фылдæр.
Паддзахадон социалон æххуыс райсыны бар ис, 1989-2008 азты агрессийы рæстæджы чи фæмард, уыдоны бинонтæн; Гуырдзыстоны агрессийы рæстæджы I æмæ II къорды сахъатдзинад чи райста, уыдонæн; I къорды сахъатджынтæн; Æнæниздзинад хъахъхъæнын æмæ социалон рæзты министрады «Цæрджыты социалон æххуысы центры» хыгъды чи ис æмæ 75 азæй уæлæмæ кæуыл цæуы, уыцы иунæг адæймæгтæ æмæ æвæрæз пенсиисджытæн.
Сæ бон у афæдз иу хатт паддзахадæй æххуыс æрдомын, æртæ æмæ фылдæр сывæллæттæ (18 азы онг кæуыл цæуы) кæмæн ис, ахæм бинонтæн; гуырцæй сахъатджынтæн, 18 азы онг кæуыл цæуы, ахæм сидзæр сывæллæтты чи хъомыл кæны, уыцы бинонтæн.
Ахæм æххуыс райсын ма сæ бон у уæззау рынчынтæн, уæззау цардуагон уавæры чи бахауд, уæлдайдæр уыцы уавæр стихион æнамонддзинæдтæм, террористон акттæм куы хауа, уæд.
Плиты Агуындæ сæрмагондæй бахахх кодта, зæгъгæ, паддзахадон æххуыс æмбæлы, республикæйы территорийыл æдзухæй чи цæры, æрмæстдæр уыцы æмбæстæгтæн.
Минималон мызд фæфылдæр уыдзæн
Финансты министр Цæрикъаты Хъазбеджы доклад уыд минималон бæрцæй къаддæр куыстмыздты æмбæлон æмвæзадмæ схизын кæныны тыххæй. Уый тыххæй раразмæ кодта цалдæр уынаффæйы проекты.
Министры ныхæстæм гæсгæ уынаффæйы проектты нысан у, цæмæй республикæйы терри-торийыл мыздтæ ма уой 13242 сомæй къаддæр.
«Кæй зæгъын æй хъæуы, бахъæудзæн нæ уæлæмхас æхцайы фæрæзтæ. Фæлæ уыдон развæлгъау нысан æрцыдысты, уыцы нымæцы уæрæсейаг фарсы æрдыгæй дæр æмæ нын уæлæмхасæй рахицæн чындæуыд 81 милуан сомы бæрц», – банысан кодта Цæрикъайы фырт.
Разæнгардгæнæн æхцайы фæрæзтæ райсдзысты æнæ-низдзинад хъахъхъæнын æмæ социалон рæзты фадыджы, культурæ, физикон культурæ æмæ спорты, хъæууон хæдзарады, информаци æмæ мыхуыры паддзахадон комитеты дæлведомствойон организацитæ, ХИПУ æмæ ХИЗИИ кусджыты хицæн категоритæ.
Уынаффæты проектты министрты кабинет райста æмхъæлæсæй.
Æмбырды ныхас цыд кадрон ивындзинæдтыл дæр. Хъæууон хæдзарады министры фыццаг хæдивæгæй снысан кодтой Хъæцмæзты Джонийы.
Фæсивæдон политикæ, спорт æмæ туризмы фæдыл комитеты сæрдары хæдивæджы бынаты снысан кодтой Гасситы Сосла-ны, уыцы бынатæй, йæхи куырдиатмæ гæсгæ, Кокойты Георгийы кæй ссæрибар кодтой, уый тыххæй.
Дарддæр ахуырад æмæ зонады министры хæдивæг Галуанты Александр раразмæ кодта 2023 азы паддзахадон сæрмагонд иумæйагахуырадон органи-зацитæн субсидитæ радтыны фæткы тыххæй уынаффæйы проект.
Министры хæдивæджы ныхæстæм гæсгæ, уынаффæйы проект арæзт æрцыд «Ахуырады тыххæй» РХИ-йы закъоны 7-æм статьяйы 2-æм хайы реализацийы нысанæн.
Ацы уынаффæйы проектмæ гæсгæ арæзт цæуынц педагогты куыстмызд баххæст кæныны нысанæн субсидитæ радтыны фæтк æмæ уавæртæ.
Субсидитæ райсыны бар ис, республикæйы территорийыл цы сæрмагонд ахуырадон организацитæ кусынц æмæ регистраци чи сты, ахуырадон архайды тыххæй лицензи кæмæ ис, уыдон.
Арæнты
æдасдзинад
Республикæйы паддзахадон арæнтæ æмæ æрдзон фæсауæрцты хъахъхъæныны фæстиуæгæн хæцæнгарзæй спайда кæныны фæткмæ ивындзинæдтæ бахæссыны тыххæй уынаффæйы проекты фæдыл раныхас кодта Паддзахадон æдасдзинады комитеты Арæнхъахъхъæнæг службæйы сæргълæууæджы хæстæ рæстæгмæ æххæстгæнæг Алиханты Валериан.
Уый банысан кодта, зæгъгæ, ныртæккæ куыд æмбæстагон, афтæ æфсæддон фадыджы дæр стыр у æнæпилот тæхæн аппараттæй пайда кæныны спектр. Пайда сæ кæнынц Хуссар Ирыстон æмæ Гуырдзыстоны ‘хсæн паддзахадон арæн хъахъхъæныны хъуыддаджы дæр.
Нæ республикæйы арæнгæрæтты арæх фенæн ис Гуырдзыстоны æнæпилотон тæхæн аппаратты.
Раздæр райстæрцæуæг фæткмæ гæсгæ нæй бар паддзахадон арæнтæ æмæ æрдзон фæсауæрцтæ хъахъхъæныны нысанæн æнæпилотон авиацион системæтæ, верттæхджыты æмæ хæдтæхджыты ныхмæ хæцæнгарз æмæ хæстон техникæйæ спайда кæнын.
Паддзахадон æдасдзинады комитеты нормативон-барадон базæ фæнырыккондæр кæныны нысанæн, уый фæндон бахаста, раздæр райстæрцæуæг уынаффæмæ ивындзинæдтæ бахæссын, цæмæй Гуырдзыстоны авиацион системæты ныхмæ хæцæнгæрзтæй спайда кæнын закъоны уа.
Уынаффæйы проектыл сразы сты Хицауады уæнгтæ иууылдæр.
ОСИАТЫ Индирæ
