16-æм августы дзауаг сценæмæкæсджытæ аргъ кодтой Туаты Дауыты пьесæмæ гæсгæ æвæрд спектакль «Пæсæйы фæндон»-æн, кæцы йæ рæстæджы нымад цыдис нæ театры хуыздæр спектаклтæй сæ иуыл.
«Пæсæйы фæндон» у музыкалон комеди æмæ йæм алы кары адæймаг дæр райцентры цæрджытæй бацымыдис кодта.
Дзауы районы администрацийы культурæйы хайады гæс Санахъоты Анжелæ нын куыд радзырдта, уымæ гæсгæ спектаклмæ цы адæм æрбацыдысты, уыдонæн тынг фæцыдис сæ зæрдæмæ æмæ райгондæй баззадысты артистты хъазтæй.
«Мах развæлгъау афишæтæ бакодтам бирæ рæтты, фæлæ, хъыгагæн, не ‘рбамбырд кодтам, куыд нæ фæндыд, уыййас адæм.
Спектаклмæ чидæриддæр бакаст, уыдон стыр райгондæй баззадысты, æмæ артисттæн бузныг æмæ арфæйы ныхæстæ дзырдтой», – банысан кодта Санахъоты чызг.
Спектакль «Пæсæйы фæндон»-ы æвæрæг режиссер у Цæриаты Валери. Ацы классикон спектакль ма раджыдæр æвæрд цыдис нæ паддзахадон драмон театры сценæйыл.
Спектаклы ролтæ æххæст кодтой, хуссарирыстойнаг сценæмæкæсджытæн хорз зонгæ чи сты, уыцы артисттæ. Уыдон сты: РХИ-йы сгуыхт артисттæ Хаситы Сослан, Уанеты Эдуард, Гаглойты Артур, Чохели Натиа, адæмон артисткæ Гæджиты Ингæ, Мæргъиты Ингæ, Дыгъуызты Иринæ æмæ æндæртæ.
ЦХУЫРБАТЫ Ларисæ
