Фембæлд фыссæгимæ

Республикæ Хуссар Ирыстоны иумæйагахуырадон скъолаты республикæйы зонадон къуырийы фæлгæтты 1-7-æм февралмæ уагъд цæудзысты алыгъуызон мадзæлттæ.

Ацы программæйы фæлгæтты иу ахæм фембæлд сорганизаци кодта нæ горæты 3-æм скъолайы райдиан кълæсты ахуыргæнæг Хъуылымбегты Медея. 2-аг къласы ахыргæнинæгтæм æрбахуыдта фыссæг æмæ зонадон кусæг Бекъойты Майæйы æмæ сæ базонгæ кодта йæ фыст чингуытæ «Уасæг» æмæ «Ногазон лæвæрттæ»-имæ. Сывæллæттæн цыбыртæй радзырдта фыссæджы сфæлдыстады тыххæй æмæ уый фæстæ сывæллæттæн бакастысты йæ фыст æмдзæвгæтæ. Чиныг «Уасæг»-ы мыхуыр æрцыдысты радзырдтæ реалон цаутыл, «Ногазон лæвæрттæ»-йы та – чысыл сабитæн аргъæуттæ æмæ æмдзæвгæтæ. «Сывæллæттимæ развæлгъау нæхи бацæттæ кодтам ацы фембæлдмæ. Тынг цымыдисимæ æнхъæлмæ кастысты чиныджы авторимæ фембæлдмæ», – загъта Хъуылымбегты Медея.

Фембæлды рæстæджы ахуырдзаутæ фыссæгмæ лæвæрдтой алыгъуызон фарстатæ, кæцытæн истой хуымæтæг æмæ зæрдиаг дзуаппытæ. Бекъойты Майæ 2-аг къласы ахуырдзаутæн балæвар кодта йæхи фыст чингуытæ æмæ сын ныфс бавæрдта, цы ног чиныджы рауагъдмæ æнхъæлмæ кæсы, уый дæр сын кæй балæвар кæндзæн. Сывæллæттæ дæр ныхас радтой фыссæджы раз хорз кæй ахуыр кæндзысты æмæ йын йе’мдзæвгæтæ æмæ радзырдтæ зæрдиагæй кæй кæсдзысты.

Бекъойты Майæйы ныхæстæм гæсгæ, йæ аргъæуттæ фæзындысты йæ лæппуйы райгуырдимæ иумæ, кæцыйæн æй фæндыд дзурын хорз æмæ рæсугъд дунейы тыххæй. Литературæмæ уарзондзинад Майæмæ фæзынд хæрзчысылæй. Уый йæ фыццаг æмдзæвгæ ныффыста, фыццæгæм къласы куы ахуыр кодта, уæд. «Чиныджы сæйраг идейæ у, цæмæй сывæллæттæм æвзæрын кæной рæсугъддзинады æнкъарæнтæ. Кæддæриддæр хорздзинады тыххæй дзурын, кæцы алыхатт дæр фæуæлахиз вæййы æвзæрдзинадыл. Хорздзинадмæ та хъæуы æппæтзæрдæйæ тырнын. Мæнмæ гæсгæ мах, хистæрты, сывæллæттæ ивынц хуыздæрырдæм æмæ нæ удцырын кæнынц», – банысан кодта фыссæг.

Йæ ныхæстæм гæсгæ, сæйраг у сывæллæттæн чингуытæ сæ мадæлон æвзагыл кæсын, цæмæй сæм мадæлон æвзагмæ уарзондзинад фæзына чысылæй. «Сывæллæттæн хъуамæ дзурæм нæ мадæлон æвзаг куыд аив æмæ рæсугъд у, афтæ ма нæ культурæ æмæ традициты тыххæй дæр. Уыдон сæ кæцæй базондзысты хистæртæ сын уыцы зонындзинæдтæ куы нæ дæттой уæд? Ахсджиаг ма у, скъолаты алыгъуызон мадзæлттæ уадзын мадæлон æвзагыл, сывæллæттимæ иронау дзурын. Афтæмæй сывæллонæн йæ цымыдисдзинад сывзæры йæ культурæ æмæ æвзагмæ», – загъта Бекъойты Майæ.

Бекъойты Майæйæн ацы аз мыхуыры рацæудзæн ног чиныг «Аргъæутты дуне», зæгъгæ, ахæм номимæ, кæцыйы мыхуыр уыдзысты радзырдтæ  куыд ирон, афтæ уырыссаг æвзагыл дæр.

КОКАЙТЫ Зæринæ