Фембæлд – æмгуыстады фæндиæгтимæ

РХИ-йы Хицауады Сæрдары хæдивæг – Экономикон рæзты министр Бекъойты Геннади кусæгон балцы уыд Цæгат Ирыстон-Аланийы, цыран фембæлд Экономикон рæзты министр Томайты Хъазбегимæ.

Фембæлды æруынаффæ кодтой Хуссар æмæ Цæгат Ирыстоны экономикон æмархайды фадæттыл. Бекъойты Геннади базонгæ РЦИ-Аланийы чысыл æмæ астæуккаг куыстуæтты микрофинанскæнынады фонды, Кредитон гарантиты фонды, Инвестицион рæзты экспортон æмæ корпорацитæн æххуысы центры архайдимæ. «Цæгат æмæ Хуссар Ирыстоны æнæмæнгхъæуæг у экономикон фадыджы æмгуыстады фарстатыл бакусын. Махæн ис потенциал, кæцы гом кæны хорз фадæттæ дыууæ республикæйæн дæр», – банысан кодта Бекъойты Геннади.

Бекъойты Геннади базонгæ центр «Мой бизнес»-ы куыстимæ. Цæгат Ирыстоны Эконо-микон рæзты министрады амалиуæгадæн æххуысы хайады хистæр Цæболты Отары ныхæстæм гæсгæ, уый у бизнесы фадыджы паддзахадон æххуысы æппæт хуызты потенциалон æмæ архайгæ амалиуæггæнджыты иунæг фадат, цыран гæнæн ис практиконæй бизнесы здæхтыты фæдыл цахæмфæнды консультацитæ дæр райсын, ИП æмæ ООО хуызы регистраци скæнын, бизнес-план саразыны тыххæй куырдиат бадæттын æмæ бирæ æндæртæ – æдæппæт 170 лæггадæй фылдæр, кæцытæн сæ фылдæр сты  æнæаргъæй. Банысанчындæуыд, зæгъгæ, центры ис гæнæнтæ дунеон экспозицитæм Хуссар æмæ Цæгаты бизнес-æмæхсæнады минæвæртты иумиаг балцытæн, стендтæ саразыны, партнертæ агурыны æххуысæн.

Бекъойты Геннади бацымыдис кодта дзæуджыхъæуккаг коллегæты фæлтæрддзинадмæ æмæ банысан кодта дарддæры æмгуыстады æнæмæнгхъæуындзинад. «Сымахæн ис амалиуæггæнджытимæ æмархайды æвæрццаг фæлтæрддзинад, кæцымæ хъæуы хъусдард аздахын Хуссар Ирыстоны иуæй-иу методикæтæй спайда кæныны планы. Хъуыды кæнын, сымах дæр кæй бацымыдис кæндзыстут амалиуæгадæн æххуысы фадыджы нæ бакуыстытæм», – загъта уый.

Йæ рады Томайты Хъазбег банысан кодта, зæгъгæ, хъæуы иумиаг экономикон проекттæ, æмæ дыууæ республикæты ‘хсæн хъуыддагон бастдзинæдтæ чи аразы, уыцы бизнесментæн та  – алыгъуызон æххуыс.

«Бæрæг у, мах хъуамæ ауадзæм æмбырд рауæрæхгонд форматы, æмæ уыцы фадгуытæ æмæ идейæтæ банысан кæнын, цыран мах иумæ райсдзыстæм реалон фæстиуæг. Ис   Цæгат æмæ Хуссар Ирыстоны  «Фундук Алании»-йы проекты реализацийы хорз цæвиттон. Мæн уырны, æмгуыстады ахæм цæвиттонтæ кæй хъуамæ уой фылдæр», – загъта цæгатирыстойнаг министр.