Республикæ Хуссар Ирыстоны Президент Бибылты Анатоли фембæлд альпинистты делегациимæ РЦИ-Аланийы альпинизмы федерацийы президент, титул «Снежный барс»-ы хицау Хæмыцаты Хъазбеджы сæргълæудæй.
Делегацийы сконды ма уыдысты Эверестмæ дыууæ экспедицийы къухдариуæггæнæг, титул «Снежный барс»-ы хицау Александр Зеленский, РХИ æмæ РЦИ-Аланийы сгуыхт артисткæ Бекъойты Динæ, кæцы Эльбрусы бæрзæндыл акафыд «Хонгæ» кафт æмæ æндæртæ.
Альпинисттæн раарфæ кæнгæйæ, Бибылты Анатоли банысан кодта, зæгъгæ, уе ‘нтыстытæ кады æмæ цины æнкъарæнтæ æвзæрын кæнынц.
«Æхсызгон мын у уынын, сымах уæ хъуыддагмæ стыр цымыдисдзинад кæй æвдисут, æмæ сымахмæ стыр плæнттæ кæй ис, кæцытæ хауынц альпинизмы рæзтмæ», – загъта Президент.
Уый банысан кодта, хуссарирыстойнаг альпинисттæ иу ран кæй нæ бадынц æмæ алыгъуызон бæрæгбонты цытæн кæй схизынц хæхты цъуппытæм. Уымæй уæлдай ма Бибылыты Анатоли ныфс бавæрдта, фембæлды архайджытæ кæй æруынаффæ кæндзысты мадзæлтты планыл, кæцыйы хайад райсдзысты куыд хуссарирыстойнаг, афтæ ма уæрæсейаг альпинисттæ дæр.
Йæ фарсæрдыгæй, Хæмыцаты Хъазбег банысан кодта, кæй бацæттæ кодтой фæндæттæ, уыдоны нымæцы бæрзæнд «Алания»-мæ схизын хуссарирыстойнаг паддзахады сæргълæууæгимæ.
«Бæрзæнд «Алания» у Сæйраг Кавказы рагъæн йæ иу бæрзæнд, кæцы у Ирыстоны цæгат æмæ хуссар хайы иудзинады символ. Уый тыххæй ма фыста номдзыд Хетæгкаты Къоста. Уе схызт ацы бæрзæндмæ у хъæбатырдзинад равдисын, уымæн æмæ уый хуымæтæг хох нæу», – загъта уый.
Хæмыцаты Хъазбег фæндон бахаста Хетæгкаты Къостайы юбилейы цытæн ацы бæрзæндмæ иумæ схизын.
«Хетæгкаты Къостайы юбилейы цытæн символикон уыдзæн уыцы бæрзæндмæ схизын æмæ уым йе ‘мдзæвгæтæй бакæсын. Хорз уаид, дæ хайадистæй», – загъта Президентæн Хæмыцаты Хъазбег.
Хæмыцаты Хъазбег ма банысан кодта хуссарирыстойнаг альпинистты командæйы потенциал, кæцы Стыр Фыдыбæстæйон хæсты Уæлахизы боныл 74 азы сæххæсты æмæ Хетæгкаты Къостайы гуырæн боны цытæн схызт Эльбрусы хохы цъупмæ æмæ уым табличкæ сæвæрдта ирон поэтæн.
«Боныгъæдмæ гæсгæ уагъд нал æрцыдысты æппæт згъордтытæ æмæ триалтæ, кæцытæ план уыдысты Уæлахизы бон нысан кæнынмæ. Хуссарирыстойнаг альпинисттæ æнæ акклиматизацийæ схызтысты хохмæ. Мах, кæй зæгъын æй хъæуы, сæрæстыр уыдыстæм», – загъта уый.
Уыимæ иумæ, Хæмыцаты Хъазбег радзырдта, Уæлахизы боныл 75 азы сæххæсты цытæн Хуссар Ирыстоны командæ кæй план кæны Эвересты цъуппыл сæвæрын хæдбар паддзахад Аланийы тырыса.
«Эвересты цъуппыл акафдзысты «Хонгæ»-йы кафт Бекъойты Динæйы хайадистæй. Уый уыдзæн нæ уæлахиз», – загъта альпинист.
Уый ма банысан кодта, зæгъгæ, уымæн йæ бон у экспедицийы сæргъ слæууын.
Бибылты Анатоли, йæ рады банысан кодта, уый серьезон кæй у æмæ йæм лæмбынæг бацæттæ кæнын хъæуы. Банысан кодта, ахæм тырнындзинады æвварс кæй хæцы.
РХИ-йы Президенты æмæ
Хицауады пресс-службæ
Comments are closed, but trackbacks and pingbacks are open.