4-æм сентябры нæ республикæйы Ахуырад æмæ зонады министр Лолаты Асланæн Информаци æмæ мыхуыры комитеты пресс-центры уыд брифинг. Фыццаджыдæр министр ног 2023-2024 ахуыры азы тыххæй арфæ ракодта республикæйы æппæт скъоладзау фæсивæдæн æмæ ахуыргæнджытæн.
Лолаты Аслан куыд банысан кодта, уымæ гæсгæ, практикон æгъдауæй, нæ бæстæйы æппæт иумæйагахуырадон скъолатæ æмæ скъолайы агъоммæйы уагдæттæ цæттæ сты ног ахуыры азмæ. 5-æм сентябры скъолаты айзæлдзысты фыццаг дзæнгæрджытæ æмæ афтæмæй республикæ банысан кæндзæн Зонындзинæдты бон.
Ахуырад æмæ зонады министр куыд фехъусын кодта, афтæмæй Цхинвалы скъола-интернаты ахуыры процесс чысыл фæфæстæдæр уыдзæнис, уымæн æмæ уым ныридæгæн цæуынц цалцæггæнæн куыстытæ. «Ацы хъуыддаг, сæйрайраджыдæр, баст у скъолайы хæрæндоны цалцæггæнæн куыстытæ рæстæгыл кæй нæ фесты, уыимæ. Ахуырадон процесс ацы скъолайы хъуамæ райдайа 11-æм сентябры, фæлæ уал уымæй размæ æнæмæнг хъæудзæн санитарон-эпидемиологион куыстытæ дæр бакæнын радон хатт. Бирæ нал баззад æмæ скъола-интернат дæр йæ ахуыргæнинæгтыл хъæлдзæгæй сæмбæлдзæн. Цалынмæ скъола цæттæ кæной, уæдмæ уал сывæллæттæн цалдæр боны æмгъуыдмæ уадздзысты дистанцион ахуыртæ. Нæ республикæйы иннæ ахуырадон уагдæттæ иууылдæр сты цæттæ æмæ æнæфæстиатæй райдайдзысты сæ ахуыртæ дыццæгæй», – банысан кодта Лолаты Аслан.
Министр ма абарста ацы азы рауагъдонты нымæц æмæ ныр ног ахуыры азмæ чи бацæудзысты, уыцы фыццаг-къласонты нымæц. Лолаты Аслан куыд загъта, афтæмæй ацы аз фыццагкъласонты нымæц развæлгъау зонæнтæм гæсгæ хизы 604 онг æмæ, зæгъгæ, гæнæн ис æмæ ноджы фæфылдæр уой. Рауагъдонтæ та уыдысты 506 бæрц. «Фыццагкъласонты нымæц рауагъдонты нымæцæй кæй фæфылдæр, уый у тынг æхсызгон хъуыддаг æмæ сын арфæ кæнын», – загъта уый.
Брифингы ма министр куыд банысан кодта, афтæмæй ахсджиаг у сывæллæтты æдасдзинады фарст скъолаты. Куыд рабæрæг, афтæмæй Хуссар Ирыстоны цы 49 иумæйаг ахуырадон уагдоны ис, уыдонæй æрмæстдæр дыууæ скъолайы ифтонг сты зынгсирвæзты ныхмæ тохы системæтæй. Æмæ министр куыд банысан кодта, афтæмæй уый раппæлинаг хъуыддаг нæу, фарст у ахсджиаг æмæ йыл хъæуы бакусын.
«Ацы фарст махæн, кæй зæгъын æй хъæуы, тынг ахсджиаг у, уый æмрæнхъ ма у нæ риссаг фарст дæр. Фæлæ банысан кæнын хъæуы уый æмæ æппын «нæ»-йы бæсты не скъолатæ ифтонг кæй сты зынгсирвæзты ныхмæ тохы фыццаг рады ифтонггæрзтæй. Цæмæй куыд æмбæлы, афтæ ифтонггонд æмæ арæзт æрцæуой скъолатæ, уый тыххæй хъæуы егъау финансон фæрæзтæ. Нæ министрад æмæ нæ республикæйы къухдариуæгад дæр зонынц ацы проблемæ æмæ архайынц, цæмæйдæриддæр скъуыддзаг æрцæуа. Абон уа æви сом, уæддæр ацы фарстæн æнæ аскъуыддзаггæнæн нæй», – банысан кодта министр.
Цхинвалы æппæт скъолаты дæр хъахъхъæнынц Мид-хъуыддæгты министрады дæлведомствойон организаци «Ирбис»-ы кусджытæ, фæлæ хъыгагæн, скъолайы агъом-мæйы кары ахуыргæнæн уагдæтты уыдон нæ хъахъхъæнынц. «Сабиты рæвдауæндæтты хъахъхъæнджыты функцитæ æххæст кæнынц хуымæтæг хъахъхъæнджытæ. Ацы фарсты тыххæй дæр дзырд цæуы, цæмæйдæриддæр хъахъхъæд цæуой скъолаты куыд у ахæм хуызы», – загъта Лолаты Аслан.
Брифингы ма Лолайы фырт цыбыртæй æрдзырдта æндæр ахсджиаг фарстаты тыххæй, куыд зæгъæм, скъолаты кæй нæ фаг кæнынц ирон æвзаг æмæ литературæйы чингуытæ. «Зонындзинæдтæ райсыны хъуыддаджы сæйраг сты чингуытæ æмæ мах архайæм, цæмæй ацы фарст скъуыддзаг æрцæуа. Фæстаг хатт ма не скъолатæ ахуыргæнæн чингуытæ ирон æвзагæй райстой 2019 азы, уымæ гæсгæ ныр нал фаг кæнынц. Цыфæнды ахургæнæн чиныг дæр, ахуыргæнинæгтæ йæм хорз куы зилой, уæддæр фаг кæны фондз азмæ, стæй базæронд вæййы æмæ та йæ бахъæуы сног кæнын», – загъта уый.
Журналистты ма цымыдис кодта, зæгъгæ, иууыл къаддæр ахуыргæнинæгтæ кæм ахуыр кæнынц, ахæм скъолатæ абоны бон нæ республикæйы цал ис æмæ цы хъæуы саразын, цæмæй хъуыддаг фæхуыздæр уа. Министр куыд банысан кодта, афтæмæй ахæм скъолатæ сты бирæ, иу дæсмæ æввахс æмæ сæ, хъыгагæн, ахуыр кæны тынг цъус ахуыргæнинæгтæ. (1-4 ахуыргæнинаджы онг).
Кæронбæттæны Лолаты Аслан рардзырдта ахуырады системæмæ ногæй кæй бахастой электронон боныгтæй пайда кæныны хъуыддаг æмæ уыцы ногдзинад цы пайда хæссы, уыдæттæ. Ацы проект нырма хаст æрцыд гимназитæ «Альбион» æмæ «Рухсм»-мæ. Кæд æмæ йын хорз фæстиуджытæ уа, уæд æй æрбиноныг кæндзысты æндæр скъолаты дæр.
ЦХУЫРБАТЫ Ларисæ
