2023-2024 ахуыры ног азмæ нæ республикæйы хæрзæфснайд бакодтой æппæт ахуыргæнæндæттæ.
5-æм сентябрæй райдайдзæн ног ахуыры аз æмæ цæмæй уымæ æмбæлон æгъдауæй сæхи бацæттæ кæной, ахуыр-хъомыладон куыст æппæт скъолаты дæр цæуа куыд æмбæлы, ахæм æмвæзадыл, ууыл зæрдиагæй бацархайдтой ахуырадæн бæрныдзыд чи сты, уыцы кусджытæ æмæ ныййарджытæ дæр. Дзауы районы дæр лæмбынæгдæр хатдзæгтæ сарæзтой ивгъуыд ахуыры азы фæстиуджытæ æмæ сæ дарддæры бакæнинаг куыстæн.
Дзауы районы цы куыст цыдис ног ахуыры азы æрбалæудмæ, уый тыххæй нын радзырдта районы администрацийы ахуыры хайады гæс Джиоты Алексей. Уый куыд банысан кодта, афтæмæй ныртæккæ районы сæйрагдæр хæс æмæ куысты сæр уыдис 5-æм сентябрмæ скъолаты бацæттæ кæнын æмæ райзæрдæйæ ног ахуыры азыл сæмбæлын, афтæ ма ахуыр-хъомыладон фарстатæ скъуыддзаг кæнын. «Ног 2023-2024 ахуыры азмæ цæттæ стæм, нæ районы скъолатæ се ‘ппæт дæр цæттæ сты ахуыргæнинæгты райсынмæ. Фаг нын ис ахуыргæнджытæ дæр. Ахуыргæнæн чингуытæй дæр ифтонг стæм. Фæлæ, сæйраджыдæр, цухдзинад æййафæм ирон æвзаг æмæ литературæйы чингуытæй. Нæ министрад нын ныфс бавæрдтой, ацы фарстыл кæй бакусдзысты æмæ нæ кæй сифтонг кæндзысты хъæуæг чингуытæй, фæлæ уал ахуыр кæндзыстæм, нæ къухты цы ис, уыцы ахуыргæнæн чингуытæй. 1-æм сентябры онг нæм æгас районæй æрбацыдис 39 куырдиаты фыццаг къласонтæй. Тынг мæ фæнды, цæмæй сæ нымæц фæфылдæр уа. Ныфс мæ ис, ноджы нæм куырдиæттæ кæй æрбахæсдзысты, уымæй. Ныртæккæ та уал хъæлдзæгæй банысан кæндзыстæм Зонындзинæдты бæрæгбон. Уый размæ та ацыдысты Беслæны трагедийы мысæн бонтæ – уыцы æвирхъау диссагæн рохгæнæн нæй», – банысан кодта Дзауы районы ахуыры хайады гæс.
Джиоты Алексей ма нын куыд загъта, афтæмæй 31-æм августы Дзауы районы педколлективæн цы конференци уыдис, уым докладтæ сарæзтой ног ахуыры азы куысты фæдыл. «Æз мæ доклады фылдæр æрдзырдтон профориентацион куысты тыххæй. Советон дуджы ахæм куыст активонæй цыдис, уымæн æмæ нæм уыдис профтех ахуыргæнæндæттæ æмæ абитуриенттæ уырдæм æрвыст цыдысты. Абон нæ республикæ ифтонг нæу ахæм хъæуæг кадртæй, куыд зæгъæм, трактористтæ, хуыйджытæ æмæ бирæ æндæр ахæм дæсныйæдтæй, кæцытæ нæ паддзахады хъæуынц тынг æхсызгонæй. Уымæ гæсгæ мах хъуамæ архайæм, скъоладзаутимæ, фæсивæдимæ профориентацион куыст кæныныл, хъуамæ сын бамбарын кæнæм хъуыддаг æмæ сæ æрвитæм нæ республикæйы колледжмæ. Ацы куыст мах фæтынгдæр кæнын хъæуы, цæмæй нæ рауагъдонтæ юридикон æмæ экономикон факультеттæм ма ивылой, фæлæ сын сæ царды пайда чи æрхæсса, уыцы дæсныйæдтæ рагацау æвзарой æмæ сæ уарзой. Нырмæ дæр сывæллæттимæ ахæм куыст цыдис, фæлæ йæ куы фæтынгдæр кæнæм æмæ нысанмæздæхтæй семæ куы кусæм, уæд ын уыдзæнис хорз фæстиуджытæ», – банысан кодта уый.
Рох кæнæн кæмæн нæй, уыцы Беслæны трагеди
1-æм сентябры Санахъоты Гришикы номыл Дзауы скъола-интернаты скъоладзау фæсивæд æмæ ахуыргæнджытæ æрымысыдысты 19 азы размæ Беслæны трагеди æмæ иу уысм æмырæй алæугæйæ ссардтой теракты фæстиуæгæн 1-æм скъолайы чи фæмардис, æппæт уыдоны рухс нæмттæ.
Фыдохы мадзалы хайад райстой Дзауы районы администрацийы сæргълæууæджы хæдивæг Тедеты Альберт, районы ахуыры хайады гæс Джиоты Алексей æмæ йæ хæдивæг Битеты Мария.
Беслæны трагедийы тыххæй раныхас кодта скъола-интернаты директор Уалыты Азæ. Уый банысан кодта, зæгъгæ, куыд Ирыстоны, афтæ æгас дунейы дæр кæй хъынцъым кæнынц Беслæны трагедийыл. «Фыццæгæм сентябрь 2004 азæй фæстæмæ ирон адæмæн, дыууæ Ирыстоны дæр канд Зонындзинæдты бон нæу, фæлæ ма фыдох æмæ хъыджы бон дæр. Уæд æрцыд, уайтагъд дунейыл чи ныххъæр, ахæм цыфыддæр теракт. Тугмондаг адæймагхуыз сырдтæ æртæ боны дæргъы скъолайы амынæты дардтой сывæллæтты, ахуыргæнджыты æмæ ныййарджыты. Теракты фæстиуæгæн фæмард сты 334 æнæаххос цардбæллон адæймаджы æмæ уыдонæн сæ фылдæр уыдысты ахуыргæнинæгтæ. Ацы диссаг дунейы растхъуыдыгæнæг адæмы зæрдæтæ нынкъуысын кодта. Кæд бирæ азтæ рацыд, уæддæр махæй, Хуссар Ирыстоны адæмæй, рох нæу нæ иу-мæйаг æфсымæрты стыр рис», – радзырдта директор. Фыдохы мадзалы ма раныхас кодтой Джиоты Алексей, Битеты Мария æмæ æндæртæ. Уый фæстæ скъоладзаутæ бакастысты ирон æмæ уырыссаг поэты зæрдæмæхъаргæ æмдзæвгæтæ Беслæны трагедийы амæттæгты тыххæй.
ЦХУЫРБАТЫ Ларисæ
