Бæрæг куыд у, афтæмæй 15 майы ирон дзыллæ нысан кодтой ирон æвзаджы бæрæгбон. Ацы боны цытæн информацион агентад Спутникы пресс-центры РХИ-йы Информаци æмæ мыхуыры паддзахадон комитеты сæргълæууæг Хъотайты Марияйы радон брифинг уыд ирон æвзаджы темæйыл.
Комитеты сæрдар куыд банысан кодта, афтæмæй ирон æвзагæн фылдæр проблемæтæ уыд ивгъуыд æнусы 90-æм азы. Ома, уæд Гуырдзыстон ирæтты нæ уагъта ирон æвзагыл дзурын, ахуыр æй кæнын. Абоны бон та нæ мадæлон æвзагмæ фылдæр хъусдард ис паддзахады къухдариуæгады æрдыгæй. Цæмæй мадæлон æвзаг æвзонг фæлтæр хуыздæр зоной, ахуыр æй кæной æмæ рæза, уый тыххæй стыр финансон фæрæзтæ рахицæнгонд æрцæуынц. Абоны бон æвзаг бахъахъхъæныны проблемæ Ирыстоны адæмæй дарддæр бирæ чысыл адæмты раз лæууы. Ныртæккæ Уæрæсейы Федерацийы ис бынæттон этносты 156 æвзаджы, уыдонæй 137-æн тас у æвзаг фесафынæй.
Хъотайты Марияйы ныхæстæм гæсгæ, кæд раздæр бæрæг хъусдард нæ цыд ирон æвзаг ахуыр кæнынмæ, уæд ирон æвзагæн баххуыс кæнын æмæ йæ рæзын кæныны тыххæй 2008 азы Хуссар Ирыстоны цы программæ райстæуыд, уымæн ныр бæрæгæй зынынц йæ фæстиуджытæ.
«Абон мадæлон æвзагмæ цас хъусдард ис, уый бæрц хъусдард æм нæ уыд, мæхæдæг куы ахуыр кодтон скъолайы, уæд. Æз мæхæдæг мад дæн æмæ йæ зонын, ныртæккæ ирон æвзагмæ цы ахаст ис, уый. Скъолаты бирæ фæфылдæр сты ирон æвзаджы сахаттæ, ахуыр æй кæнынц сабидæтты дæр, уагъд цæуынц ног ахуыргæнæн чингуытæ куыд скъолатæн, афтæ скъолайы агъоммæ кары сабитæн дæр», – загъта комитеты сæргълæууæг.
Уый ма банысан кодта, зæгъгæ, æрвылаз дæр Мыхуыры хæдзар мыхуырмæ фæисы ирон авторты æрмæджытæ. Уыдон вæййынц Хуссар Ирыстоны исто-рион цауты фæдыл, сывæллæтты литературæ, поэзи, прозæ. 2018 азы Мыхуыры хæдзар рауагъта 20 авторы чингуытæ авд мин тиражæй, кæцыты аргъ уыд 5 милуан сомы бæрц. Чингуыты иу хай мыхуыр æрцæуы Уæрæсейы Федерацийы, уыдон вæййынц, Хуссар Ирыстонмæ цы уазджытæ æрцæуынц, уыдонæн лæвары экземпляртæ, зæгъæм ахæм чиныг, куыд «Осетия – страна солнца». Чиныг у рæсугъд фæлыст, уым мыхуыр æрцыдысты Ирыстонимæ баст æрмæджытæ, пейзажтæ», – банысан кодта Хъотайты Мария.
Уый куыд фехъусын кодта, афтæмæй тагъд рæстæджы Хуссар Ирыстонмæ æрцæудзысты Цæгат Ирыстоны æхсæнэтникон журналистикæйы скъолайы минæвæрттæ.
«Се ‘рцыды нысан у Хуссар Ирыстоны хъæуты цардуагимæ, культурæимæ базонгæ уæвын. Уый дæр ахъаз уыдзæн нæ культурæйы бахъахъхъæнынæн», – загъта комитеты сæрдар.
«Махмæ цы чингуытæ ис, уыдонæй равзæрстам, республикæйы æддейæ цы ирæттæ цæры, уыдонæн цымыдисондæр кæцытæ уыдзысты, уыцы чингуытæ æмæ сæ арвитдзыстæм Мæскуымæ равдыстмæ. Мах ма сорганизаци кæнæм ирон литературæйы чингуыты лæвар армукъатæ дæр. Зæгъæм, фарон Хуссар Ирыстоны ауагъдæрцæуæг ирон адæмы съездмæ цы ирæттæ æрцыдысты фæсарæнтæй, уыдон тынг бирæ ирон чингуытæ ахастой. Æвæццæгæн уымæн, æмæ сæм дефицит у мадæлон æвзагыл чингуытæ æмæ сæ тынгдæр цымыдис кæнынц ирон чингуытæ», – банысан кодта Мария.
Йæ ныхæстæм гæсгæ, абон нырыккон ирон литературæйæ ифтонг сты библиотекæтæ, скъолатæ, сывæллæтты цæхæрадæттæ се ‘ппæт дæр. Хуссар Ирыстоны ис, сывæллæттæн чи фыссы, ахæм автортæ, уыдоны радзырдтæ сты сывæллæттæн цымыдисон.
«Абон ирон æвзаг хъæуы бахъахъхъæнын, цæмæй йæ нæ фæстагæттæ дæр зоной. Финансон æххуыс, алыгъуызон программæтæ, уый ирон æвзаг бахъахъхъæнынæн у йæ иу хай. Ирон æвзаг нæ фесæфдзæн, хæдзары бинонтæ иронау куы дзурой, ирон чингуытæ, мыхуырон æрмæг куы кæсой, сæ кæстæртæн æй куы уарзын кæной, уæд», – банысан кодта Информаци æмæ мыхуыры паддзахадон комитеты сæрдар.
Йæ хъуыдымæ гæсгæ, абон Ирыстоны хъæуты цæрджытæ хуыздæр зонынц æмæ сыгъдæгдæр дзурынц иронау. Кæй зæгъын æй хъæуы, уыдоны сывæллæтты ахаст хуыздæр у ирон æвзагмæ. Уый фæстиуæгæн зæгъæн ис, ирон æвзагæн тас нæу фесæфынæй.
Нæ уацх.
Comments are closed, but trackbacks and pingbacks are open.