Анахарсисы номыл Хуссар Ирыстоны Национ библиотекæйы кусджытæ банысан кодтой Библиотекæты æппæтдунеон бон. Мадзалмæ æрбацыдысты æмæ дзы хайад райстой республикæйы бæрнон бынæтты кусджытæ, интеллигенцийы æмæ ахуырдзау фæсивæды минæвæрттæ.
Бæрæгбоны сæраппонд библиотекæмæ бахизæны байгом чингуыты равдыст, цыран æдæппæт æвæрд æрцыдис 500 чиныгæй фылдæр. Се ‘хсæн уыд цалдæр æнусы размæ мыхуыр чи æрцыд, ахæм чингуытæ дæр. Мадзалмæ æрбацæуджытæн цымыдисондæр чингуыты историйы тыххæй бæстон радзырдта библиотекæйы методист Харебаты Галинæ æмæ сæ уый фæстæ ахуыдта дыккаг уæладзыгмæ, бæрæгбон нысан кæм цыд, уыцы залмæ.
Мадзал байгом кодтой библиотекæйы кусджытæ Кокойты Фатимæ, Тъехты Ингæ æмæ Хаситы Маргаритæ. Уыдон мадзалмæ æрбацæуджытæ æмæ библиотекæты кусджытæн, библиотекæйы бæрæгбоны цытæн раарфæ кæныны фæстæ, кæрæдзи ивгæйæ æрдзырдтой бæрæгбоны сырæзты тыххæй. «Ацы бæрæгбон 27-æм майы æнæхъуаджы нæ нысан кæнæм. 1775 азы Екатерина дыккаг йæ къух æрфыста библиотекæтæ саразыны тыххæй Барамындыл. Æнæхъæн дунейыл рæзынц æмæ фылдæр кæнынц библиотекæтæ, сæ кусджыты нымæц æмæ се ‘нтыстытæ дæр.
Нæ библиотекæ Анахарсисы ном кæй хæссы, уый тыххæй та мах стæм буц æмæ сæрыстыр. Уымæн æмæ Анахарсис уыд нæ рагфыдæлтæ скифты фæдонтæй, кæцыйæн абон дæр йæ зондджын хъуыдытæ æмæ ныхæстæй пайда кæнынц æгас дунейы. Анахарсисы афоризмтæй фенæн ис Платон æмæ Аристотелы уацмысты дæр.
Цалынмæ Советон Цæдис нæ фехæлд, уæдмæ нæ республикæйы уыд 155 библиотекæйы бæрц. Уыдонæй горæты уыд 16 библиотекæйы. Куыста сæ 300 адæймаджы бæрц. Горæты библиотекæтæй ма абон кусы бæрцæй цыппар. Уавæр ноджы мæгуыраудæр та у хъæууон бынæтты», – дзырдтой библиотекæйы кусджытæ.
Уыимæ ма раныхасгæнджытæ банысан кодтой, зæгъгæ, кæд библиотекæтæ бавзæрстой бирæ алыгъуызон зындзинæдтæ, уæддæр ныффæрæзтой æппæтæн дæр æмæ абон сæрыстыр æмæ райгонд сты бирæ разамонæг кусджытæ, ахуыргæндтæ, инженертæ, аразджытæ, ахуырдзау фæсивæд кæй æнкъарынц се ‘ххуыс, сæ лæггад.
«Библиотекæ сæрыстыр кæмæй у, уыцы кусджыты ‘хсæн сты Бестуаты Иринæ, Тыбылты Азæ, Уалыты Азæ, Сланты Заирæ, Харебаты Галинæ, Тедеты Мария æмæ бирæ æндæртæ. Бæрæгбоны агъоммæ Хуссар Ирыстоны Культурæйы министрады Кады грамотæтæй хорзæхджын æрцыдысты Тъехты Ингæ, Гаглойты Заринæ, Къадзты Ульянæ æмæ Джыгкайты Аллæ.
Мадзалы ссардтой, библиотекæйы къорд азты чи фæкуыста, сæ куыстæй сæхицæн æмæ библиотекæйæн дæр стыр кад чи скодтой æмæ се ‘хсæн чи нал cты, уыдоны рухс нæмттæ.
Мадзалы ма раныхас кодтой сывæллæтты библиотекæйы директор Джиоты Аллæ, горæты библиотекæйы директор Прокопенко Иринæ æмæ йæ кусæг Гуыззыттаты Этери, Хуссар Ирыстоны Национ музейы директор Зассеты Мераб, Абайты Васойы номыл музейы директор Остъаты Мадинæ æмæ æндæртæ.
Библиотекæты æппæтдунеон боны цытæн æмдзæвгæтæ кастысты библиотекæйы чиныгкæсджытæ Битеты Ленæ, Коцты Артур, Джиоты Ламзирæ, Дзахоты Виктория æмæ æндæртæ. Зарæггæнджытæ Хъодалаты Мария, Кокойты Аннæ, Гатыгкоты Линæ, Алла Кокион æмæ æндæртæ та сæ аив зарджытæй бахъæлдзæг котой бæрæгбонон изæры.
ГÆЗЗАТЫ Иван
