Æппæт дунейы цы бæрæгбон фæнысан кæнынц, уый у уалдзæджы бæрæгбонтæй сæ иууыл хъармдæр, рæсугъддæр æмæ цинхæссæг. Адæймагæн цыма уалдзæджы æрбалæуд тых æмæ хъару, ныфс æмæ уæнгрогдзинад радты, афтæ фæхаты йæхи.

8-æм марты бæрæгбоны алкæй дæр бафæнды, цæмæй сæ уарзон, се ‘ввахсдæр сылгоймæгтæн, сæ ныййарджытæн, хотæн, нанатæн æмæ æндæртæн зæрдæбын арфæтæ, хъарм æмæ рæсугъд ныхæстимæ бакæной адæймаджы зæрдæйæн æхцонхæссæг зæрдылдарæн лæвæрттæ. Уæдæ хуссарирыстойнаг сылгоймæгтæ дæр сæ уалдзыгон бæрæгбоны цытæн æрвылаз дæр райсынц бирæ зæрдæбын арфæтæ. Ацы аз дæр 7-æм марты Сылгоймæгты æппæтдунеон боны цытæн Цхинвалы Х. Къостайы номыл паддзахадон драмон театры уыд цытджын концерт «Встречая весенний праздник». Нæлгоймæгтæ зæрдиагæй арфæтæй æмæ буц кодтой сылгоймæгты. Мадзалмæ хуынд æрцыдысты куыд горæты, афтæ районты сылгоймæгтæ дæр. Республикæ Хуссар Ирыстоны Президенты номæй арфæйы ныхасимæ рахызт Президенты администрацийы къухдариуæггæнæг Джиоты Алан. Уый йæ раныхасы банысан кодта, зæгъгæ, Гаглойты Алан ис кусæгон балцы Мæскуыйы æмæ йæ бон не ссис сæрмагондæй сылгоймæгтæн раарфæ кæнын. Мах ацы уалдзыгон бæрæгбон нысан кæнæм уæлдай циндзинадимæ, уымæн æмæ сылгоймагимæ царды бирæ хæрзиуджытæ ис баст æмæ мах хъуамæ уæ бæрæгбоны цытæн ссарæм рæсугъд ныхæстæ, кæцыты аккаг стут æнæмæнг сымах. Ирон сылгоймаг рагæй фæстæмæ дæр у цæвиттойнаг, йæ кадæй кадджын вæййынц куыд бинонтæ, афтæ паддзахад дæр. Хæдзары бæркад æмæ фæрныгад баст у сылгоймагимæ. Уæ куырыхондзинад æмæ уды хъомыс махæн æххуыс кæнынц царды æппæт зындзинæдтæ сæттын», – бакаст Джиоты Алан. Нæ бæстæйы сæргълæууæг ма йæ арфæйы сæрмагондæй бузныджы ныхæстæ загъта Сæрмагонд æфсæддон операцийы хайад чи исы, уыцы сылгоймæгтæн.

Цытджын мадзал адарддæр кодтой бæрæгбонон концертæй. Ацы диссаджы бæрæгбоны цытæн хуссарирыстойнаг сылгоймæгтæн музыкалон арфæтæ кодтой нæ республикæйы популярон зарæггæнджытæ æмæ сфæлдыстадон коллективтæ. Сценæмæкæсджыты раз ралæууыдысты: адæмон инструменты паддзахадон оркестр «Айзæлд» Уалыты Нинæйы къухдариуæгадæй, хореографион ансамбль «Ирон», Культурæйы министрады цур скъола-студийы ансамбль «Кафт», Харебаты Вадим, Гатыгкоты Нинæ, Харебаты Марта æмæ æндæртæ. Сылгоймæгтæн ма инсценировкæйы хуызы хъæлдзæг æмдзæвгæтимæ арфæ ракодтой нæ республикæйы скъолаты кæстæр кълæсты ахуыргæнинæгтæ дæр. Мадзалы кæрон залы æппæт сылгоймæгтæн æхцон музыкæйы зæлтæм фæсивæд байуæрстой дидинджытæ арфæйаг ныхæстимæ.

Бæрæгбонон мадзал организацигонд æмæ уагъд æрцыдис нæ республикæйы Культурæйы министрады хъæппæрисæй.

ЦХУЫРБАТЫ Ларисæ

Comments are closed, but trackbacks and pingbacks are open.