Нæ республикæмæ кусæгон балцы æрцыдысты УФ-йы Экономикон райрæзты министрады хистæры хæдивæг Дмитрий Вольвач, ацы министрады сæрмагонд программæты æмæ проектты депортаменты хистæры хæдивæг Антон Мельник æмæ ма æндæр бæрнон кусджытæ. Уазджытыл фембæлдысты РХИ-йы Хицауады сæрдар Джуссойты Константин, Арæзтады министр Елдзарты Константин, Экономикон рæзты министр Тадтаты Дзамболат æмæ ма æндæр министрадты минæвæрттæ. Сæ фæндаг ракодтой «Мзиугом»-ы лагерыл, кæцыйы арæзтад ис йæ тæккæ тæмæны æмæ дзы бонæй-бонмæ ивддзинæдтæ цæуы хуыздæрырдæм.
«Ныридæгæн дæр ыл зыны, лагеры арæзтад кæй фæтагъддæр ис æмæ дзы объекттæ бæрæгæй кæй разындысты. Аразджытæ æрæвнæлдтой бæстыхæйтты мидæгæй цалцæггæнæн куыстытæм æмæ сын ис æнтыстытæ. Мах ныр хъæуы раст концепцимæ гæсгæ кусын æмæ уыцы хъуыддагыл æнæмæнг аныхас кæндзыстæм РХИ-йы къухдариуæгадимæ. Хъуамæ лагерæй пайда цæуа максималон эффективонæй, сæ фæллад дзы уадзой, се ‘нæниздзинад дзы хуыздæр кæной куыд сывæллæттæ, афтæ хистæр кары адæм дæр азы алы афоны дæр. Уый тыххæй та бацæттæ кæнын хъæуы рæстмæ организацион-барадон, юридикон æмæ финансон схемæ. Ацы объекты арæзтад æппынæдзух ис нæ хъусдарды бын æмæ 2024 азы æнæмæнг лæвæрд хъуамæ æрцæуа эксплуатацимæ», – зæгъы Вольвач.
Дмитрий Вольвач: «Мзиугом»-ы лагерь уыдзæн фæлладуадзæн æмæ æнæниздзинад хуыздæргæнæн бынат»
«Мзиугом»-ы объект эксплуатацимæ лæвæрд хъуамæ æрцыдаид ацы азы кæрон. Фæлæ проектмæ ивддзинæдтæ кæй бахастой, уый фæстиуæгæн арæзтадон куыстытæ адаргъ сты æмæ ныр хъуамæ кæронмæ арæзт фæуа 2024 азы. Ис дзы цалдæр бæстыхайы, 150 адæймаджы иугæндзонæй кæм баулæфой, ахæм объекттæ. Уымæй уæлдай ма дзы уыдзæнис хиирхæфсæн æмæ спортивон объекттæ дæр.
Уазджыты кусæгон балцы программæйы ис ин-нæ инвестицион объектты арæзтад фенын дæр.
ДЖИОТЫ Алыксандр
