10-æм сентябры нæ республикæмæ кусæгон балцы æрцыдысты Цæгат Кавказы хъуыддæгты фæдыл УФ-йы министры хæдивæг Игорь Кошин æмæ УФ-йы Цæгат Кавказы хъуыддæгты фæдыл дунеон æмгуысткæнынады департаменты директор Антон Мельник. Се ‘рцыды нысан уыд 2018-2019 азтæн Инвестпрограммæйы фæлгæтты арæзтцæуæг объекттæ бабæрæг кæнын.
Райдианы уазджытæ бабæрæг кодтой Гуырæн хæдзары арæзтад. Бæрæг куыд у, афтæмæй объекты арæзтадæн рахицæн æрцыд 490 милуан сомы. Арæзт та хъуамæ фæуыдаид 2019 азы кæронмæ, фæлæ арæзтадон организаци арæнгонд бæрндзинады æхсæнад «СТМ-Юг»-ы минæвар куыд загъта, афтæмæй æппæт куыстытæ дæр ныридæгæн сты фæудгонд.
Объекты азилыны фæстæ уæрæсейаг уазджытæ бацымыдис кодтой аразыны рæ-стæджы финансон хъуыддаджы, стæй арæзтадон æр-мæджытæй ифтонгады исты проблемæтыл æмбæлдысты æви нæ, уымæ.
Подрядон организацийы минæвар загъта, зæгъгæ, финансон фæрæзтæй, стæй арæзтадон æрмæджытæй дæр цыдысты рæстæгыл ифтонг. «Аразджытæн сæ фылдæр бынæттон цæр-джытæ уыдысты, иннæтæ та – Уæрæсейы æндæр æмæ æндæр рæттæй æрхонгæ уазджытæ. Ныртæккæ ма Гуырæн хæдзары аззад ахæм куыстытæ, куыд вентиляци, зынгсирвæзт, сигнализаци æмæ видеохъусдар бакæнын, системæ смонтаж кæ-нын. Уыдонæн хъæуы специалисттæ æмæ республикæйы та ахæмтæ фаг нæй, уымæ гæсгæ сæ æрхонæм Уæрæсейæ æндæр æмæ æндæр рæттæй», – дзырдта арæзтады фадыджы хистæр.
Уый фæстæ та уазджытæ ацыдысты æмæ бабæрæг кодтой уазæгдон «Ирыстон»-ы арæзтад. Ног уазæгдон дæр арæзт цæуы Инвестпрограммæйы рахицæнгонд æмæ Цæгат Ирыстон-Аланийæ амалиуæггæнæг Бердиты Вадимы хисæрмагонд фæрæзтæй. Арæзт та цæуы иууыл хуыздæр арæзтадон æрмæджытæй. Амалиуæггæнæгмæ, уазæгдæтты арæзтады хаххыл ис стыр фæлтæрддзинад. Уый Цæгат Ирыстоны сарæзта цыппар ахæм объекты.
Æртæуæладзыгон объект ныридæгæн ис агъуысты бын. Ныр мæгуырау боныгъæдты дæр ам куыст нал æрлæууы. Объекты арæзтады фæзуат у 6 405 квадратон метры. Уыдзæнис дзы ресторан, бизнес-центр æмæ банджы хайад. Цыппарстъалыйон уазæгдон дзуапп дæтдзæн æппæт нырыккон домæнтæн.
Уазджытæ азылдысты æндæр арæзтцæуæг объекттыл дæр. Уыцы нымæцы Суворовы уынджы цы рæвдауæндон æмæ Фиддонтæ æмæ хъалонты комитетæн цы бæстыхай арæзт цæуы, уыдоны.
Уæрæсейаг уазджытæ рæвдауæндонмæ бацæугæйæ, сæ хъус аздæхтой арæзтадон куыстыты темптæ ныллæг æмвæзадыл кæй сты, уымæ. Ныртæккæ ам æххæст цæуынц мидæггагон куыстытæ. Æрæвнæлдтой инженерон хызæгты арæзтадмæ, арæзт цæуы хъæрмадон системæ, кæнынц вентиляцион куыстытæ, куыст цæуы зынгсирвæзты ныхмæ сигнализаци саразыныл. Арæзтадон фирмæйы къухдариуæггæнæг ныфс бавæрдта, азы фæудмæ объект эксплуатацимæ лæвæрд кæй æрцæудзæнис, уымæй.
Игорь Кошин æмæ Антон Мельник бабæрæг кодтой, Театралон фæзуаты национ стилыл цы фонтан арæзт цæуы, уый дæр.
Уый фæстæ уазджыты йæхимæ райста Президент Бибылты Анатоли.
Химæрайсты хайад истой Хуссар Ирыстоны Уæрæсейы Уæлвæткон æмæ æххæстбарджын минæвар Марат Кулахметов, Хицауады Сæрдар Пухаты Эрик, Хицауады Сæрдары хæдивæг Экономикон рæзты ми-нистр Бекъойты Геннади, Президенты Администрацийы къухдариуæггæнæг Козаты Игорь, Хицауады Аппараты къухдариуæггæнæг Гаглойты Олег æмæ æндæртæ.
Рабадты рæстæджы Бибылты Анатоли раарфæ кодта уазджытæн, нæ республикæмæ сæ ахаст æмæ хъусдарды тыххæй. Загъта, зæгъгæ, 2018-2019 азты Инвестицион программæ фæуынхъус у æмæ уый фæстæ мах цæтæ уыдзыстæм 2020-2022 азтæн Инвестицион программæ æххæст кæнынмæ. Уыцы нысанæн æмбæлон куыст цыдис бынæттон æмæ уæрæсейаг паддзахадон структурæтимæ, алыгъуызон подрядон организацитимæ.
Президенты ныхæстæм гæсгæ, цы объекттæ арæзт цæуы, уыдоны ‘хсæнæй æнæрахицæнгæнæн нæй медицинон кластеры объекттæн. Хорзыл банымадта, ацы аз горæты 9 уынг реконструкци кæй æрцы-дысты уый. Гуырæн хæдзары тыххæй дзургæйæ загъта, зæгъгæ, уый, æнæмæнг, фæахъаз уыдзæн нæ бæстæйы демографийы фарстатæ скъуыддзаг кæнынæн.
Цæгат Кавказы хъуыддæгты фæдыл УФ-йы министры хæдивæг Игорь Кошин дæр иттæг хорзыл банымадта Гуырæн хæдзары арæзтад: «Мах абон бабæрæг кодтам арæзтцæуæг къорд объекты. Ивгъуыд азты цы объекттæ сырæзт, уыдонæй кæд иууыл егъаудæртæ уыдысты Драмон театр æмæ университеты арæзтадтæ, уæд ныр та уыдон æмрæнхъ æз æрæвæрдзынæн гуырæн хæдзар. Арæзтадон компани Гуырæн хæдзар эксплуатацимæ рат-дзæн ноябры мæйы æмбисы. Ахæм объекттæ Уæрæсейы дæр хæрзцъус ис. Уый у нæ иумæйаг куысты æнтыст, æмæ кæд Хуссар Ирыстоны демографийыл бандава, уæд махæн уый уыдзæнис, æрмæстдæр, цины хос».
Бибылты Анатоли æмæ Игорь Кошин дзырдтой 2020-2022 азтæн Инвестпрограммæмæ хаст чи æрцыд, уыцы мадзæлтты экономикон æгъдауæй сахуыр кæныны фарстатыл дæр. «Арæзт æрцæудзысты фæндæгтæ, хидтæ, цæрæн хæдзæрттæ, уыцы нымæцы районты дæр. Арæзт ма æрцæудзысты ахуырадон æмæ æндæр уагдæттæ. Бакуыстам æмæ корректировкæ сарæзтам скъолайы агъоммæ æмæ иумиаг ахуырады хызæджы модернизацийы план. Бæлвырддæрæй, скъуыддзаг цæуынц ЦАРЗ-ы районы сывæллæтты рæвдауæндоны, сæрдыгон æнæнизгæнæн лагеры арæзтад, Цхинвалы æртыккæгæм скъола сæндидзынгæнæн фарстатæ.
Фембæлды ма æруынаффæ кодтой Æхсæнхицауадон къамисы радон рабадтмæ бацæттæ кæныныл, кæцы уагъд æрцæудзæн 2019 азыдекабры мæйы Цхинвалы.
УАЗÆГТЫ Марфа
Comments are closed, but trackbacks and pingbacks are open.