ДÆ ЦÆСТ АХÆСС ДУНЕЙЫЛ

ÆРУЫНАФФÆ КОДТОЙ САБЫРАДТЫ  ТЫХХÆЙ БАДЗЫРДЫЛ

Японы премьер-министр Синдзо Абэ, кæцы  визитимæ æрцыд Уæрæсемæ, – фехъусын кодта, зæгъгæ,  Уæрæсейы Президент Владимир Путинимæ æппæт тыхтæй дæр спайда кæндзысты Токио æмæ Мæскуыйы ‘хсæн сабырады бадзырд саразыны тыххæй. «Дыууæ фарсы барадон позицийæн зиан ма æрхæсгæйæ, мах среализаци кæндзыстæм саразæн цæмæн ис, уый. Мах цæуæм сабыады бадзырдмæ», – загъта Абэ Владивостокы Скæсæйнаг дунеон форумы фæлгæтты уæрæсейаг президентимæ баныхæсты фæстæ.  «Ацы фарстыл уынаффæ цыд бирæ дæсгай азты дæргъы æмæ, кæй зæгъын æй хъæуы, уымæн иу сахаты мидæг аскъуыддзаггæнæн нæй. Фæлæ мах агурдзыстæм мадзæлттæ, кæцытæ æмбæлон уыдзысты Уæрæсейæн дæр æмæ Японæн дæр æмæ кæцытыл сразы уыдзысты дыууæ бæстæйы адæмтæ», – загъта Владимир Путин.

ДЫУУÆ ЛИДЕРЫ БАНЫХÆСТÆ

Владивостокы фембæлдысты Владимир Путин æмæ Китайы лидер Си Цзиньпин, кæцы æртахт Скæсæйнаг экономикон форуммæ æмæ йемæ æркодта бинесменты егъау делегаци. «Уæрæсейаг æмæ китайаг фæрстæ цымыдис кæнынц кæрæдзиимæ бахыгъдты уæлдай активондæрæй национ валютæтæй спайда кæнынмæ. Уый фæахъаз уыдзæн экспортон-импортон операциты бангты лæггæдты фидардзинадæн глобалон базарты тæссаг уавæрты», – банысан кодта Владимир Путин. Йæ рады Си Цзиньпин загъта: «Уæрæсейаг коллегæгтимæ иумæ дунеон хъуыддæгты рæзын кæндзыстæм æнтыстджын æмархайд æмæ ахæм дунеон фæзуæттæ, куыд ИНО, ШОС, БРИКС-ы координаци фæактивондæр кæнын. Дунеон æмæхæснадимæ иумæ актуалон фарстытæ бæстон кæнын, иуфарсон архайдтыты политикæйы ныхмæ лæууын.

БАЙГОМ   ФÆЗЗЫГОН СЕССИ

УФ-йы Паддзахадон Думæйы спикер Вячеслав Володин байгом кодта парламенты дæллаг палатæйы фæззыгон сесси. Сесси аххæсдзæн æрмæстдæр цыппар мæйы, фæлæ уыдзæн æндыгъд, – загъта Володин. Ныридæгæн планы 67 закъонæй ист æрцыд 44 закъоны, ноджы ма 18 закъоны проекты та сты æркæсинаг. Паддзахадон Думæйы фыццаг бакасты ист æрцыд закъоны проект мады капитал дыууæ хатты тагъддæр райсыны тыххæй. Мады капиталæн ныр гæнæн уыдзæн райсæн 15 бонмæ.

АДАРДДÆР КОДТОЙ БАЗАРАДОН ЭМБАРГО

Кубæйы ахасты америкæйаг базарадон эмбарго АИШ-ы президент Трамп адарддæр кодта ноджы иу азмæ, ома, 2019 азы 14-æм сентябрмæ. Трамп куыд банысан кодта, уымæ гæсгæ ахæм мадзæлттæ дзуапп дæттынц Иугонд Штатты национ интерестæн.

БИОЛОГОН ХÆЦÆНГАРЗ ГÆНÆН ИС ФÆЛВАРОЙ АДÆМЫЛ

Сенсацион хъусынгæнинаг сарæзта Гуырдзыстоны паддзахадон æдасдзинады раздæры сæргълæууæг Игорь Гиоргадзе. Йæ ныхæстæм гæсгæ, америкæйæгтæ Гуырдзыстоны гæнæн ис саразой бактериологон хæцæнгарз æмæ йæ фæлварой адæмыл. Уый баныфс æвæрдта документты тыххæй адæмæн фехъусын кæнынæй. 2011 азы Гуырдзыстоны цы объект арæзт æрцыд, уый тыххæй Пентагон рахицæн кодта 300 милуан доллары. Схуыдтой йæ Лугары номыл æхсæнадон æнæниздзинад иртасыны фæдыл центр. Гуырдзыстоны цæрджытæн сæ зæрдæ фехсайдта уым æрмæст бынæттон вирусты тыххæй вакцинæтыл кæй нæ кусынц, фæлæ дзы кæй кусынц ног таммтæ, кæцыты ныхмæ нæй хостæ. «Ахæм экспериментты æнæхъæн къордæн уыд æвзæр фæстиуæг ме ‘мфыдыбæстæйонтæн. Ис мæм, чи амард, уыцы 30 адæймаджы номхыгъд, кæцытæ сæхицæн хос кодтой гепатит С ныхмæ Лугарайы специалисттæм. Уымæй дæр чи амард, уыдонæй 24 адæймаджы амардысты иу боны мидæг. Амæлæты аххосаджы графæйы ис ахæм фыст «Бæрæг нæу», – фехъусын кодта Гиоргадзе.

УРÆД ÆРЦЫД ТЕРРОРИСТ

Смоленскы Æдасдзинады федералон службæйы кусджытæ баурæдтой  ИГИЛ-ы уæнджы, кæцы у Дагъыстанæй рацæугæ. Уый Украинæйы æдасдзинады службæйы бахæсмæ гæсгæ план кодта Донецкы Адæмон Республикæйы ополченейы командиры амарын, кæцы цæры Смоленскы областы. Террористмæ разынд хиаразгæ бомбæ æмæ пистолет, кæцыты йын радтой Украинæйы спецслужбæтæ.

СПАЙДА КОДТОЙ ФОСФОРОН БОМБÆТÆЙ

Сирийы фидыдады уæрæсейаг центры фехъусын кодтой АИШ-ы Уæлдæфон гарзджын тыхтæ фосфорон бомбæтæ æрæппæрстой кæй спайда кодтой, уый тыххæй. АИШ-ы уæлдæфон гарзджын тыхты дыууæ хæдтæхæджы F-15 фосфорон зынгæфтауæн бомбæтæй ныццавтой Дэйр-эз-Зоры провинцийы Хаджины цæрæн пункты. Уый фæстиуæгæн цæрæн пункты уыд тыхджын зынгсирвæзтытæ. 1949 азы Женевæйаг конвенцийы уæлæмхас суагъæмæ гæсгæ, бар нæй урс фосфорæй пайда кæнын. Афтæ ма боевиктæ æхсынц Сирийы цæрæн пункттæ Икко, Кинсибба, Бшарфа æмæ æндæрты.

БАРТХЪИРÆН СÆМ КОДТА САНКЦИТÆЙ

Вашингтон санкцитæ бакæнынæй бартхъирæн кодта Дунеон уголовон тæрхондонмæ, кæцы архайы Афганистаны территорийыл америкæйаг æмæ израилаг æфсæддонты фыдракæндты сбæрæг кæныныл. АИШ-ы президенты уынаффæгæнæг Джон Болтоны ныхæстæм гæсгæ, бæстæйы хицауад райсдзæн æппæт æнæмæнгхъæуæг мадзæлттæ америкæйаг æмбæстæгты æмæ æмцæдисонты «ацы æнæлегитимон тæрхондонæй» æнæраст фæдыл зилынæй бахъахъхъæныны тыххæй. Куыд бамбарын кодтой, уымæ гæсгæ дзырд цæуы дунеон уголовон тæрхондоны тæрхонгæнджыты ныхмæ санкцитæ бакæныны тыххæй. «Мах АИШ-ы санкциты бын бакæндзыстæм сæ активты, афтæ ма сæ фæдыл зилдзыстæм нæ бæстæйы уголовон закъондæттынадмæ гæсгæ. Ахæм мадзæлттæ æнхъæлмæ кæдзысты кæцыфæнды организаци кæнæ бæстæмæ дæр, кæцытæ æххуыс кæндзысты АИШ-ы ныхмæ Дунеон уголовон тæрхондоны фæдагурæн мадзæлттæн» – банысан кодта Болтон.

АХАУД АВТОБУС

Индийы хуссары Телинганы штаты автобус ахауд коммæ, кæцыйы фæстиуæгæн фæмард сты 32 адæймаджы. Æдæппæтæй автобусыл уыд 62 адæймаджы, уыдон цыдысты Кондагатты кувæндонмæ.

 

Информацион агентадты хъусынгæнинæгтæм гæсгæ