КУСÆГОН ВИЗИТ

УФ-йы Президент Владимир Путин кусæгон визиты уыд Белорусийы. Йемæ ма уыдысты УФ-йы Хицауады Сæрдар Дмитри Медведев, Паддзахадон Думæйы Сæрдар Вячеслав Володин, Федерацийы Советы Сæрдар Валентина Матвиенко æмæ æндæр бæрнон адæймæгтæ. Уыдон хайад райстой Æмцæдисон паддзахады Уæлдæр паддзахадон советы рабадты. Рабадты фæстиуджытæм гæсгæ Владимир Путин æмæ Белорусийы Президент Александр Лукашенко къухтæ æрфыстой стратегион партнерондзинад фæуæрæхдæр кæныны тыххæй иумиаг хъусынгæнинагыл. Баныхæсты фæстæ Путин фехъусын кодта, зæгъгæ, сæ сæйрагдæр темæ уыд Уæрæсе æмæ Белорусийы экономикон æмгуыстад, афтæ ма æддагон политикæйы фадыджы æмгуыстад сфидардæр кæныны фарст. Иумиаг хъусынгæнинаджы ма дзырдæуы, зæгъгæ, Уæрæсе æмæ Белоруси æххуыс кæндзысты Сирийы адæмæн æмæ фæтыхджындæр кæндзысты æмгуыстад информацион æдасдзинады фадыджы.

КИМ ЧЕН ЫН ТА НОГÆЙ ÆРЦЫД КИТАЙМÆ

Цæгат Кореяйы лидер фæстаг æртæ мæйы æртыккаг хатт  дыууæбонон визитимæ æрцыд Китаймæ. Уый фембæлд Китайы сæргълæууæг Си Цзиньпинимæ æмæ йын лыстæггай радзырдта æрæджы 12-æм июны Сингапуры АИШ-ы президент Дональд Трампимæ йæ историон фембæлды тыххæй. Цæгат Кореяйы лидер фехъусын кодта, зæгъгæ, къухты бафтыдысты позитивон фæстиуджытæ. «Кæд дыууæ фарсæн дæр сæ бон суа цадæггай консенсус среализаци кæнын, уæд Кореяйы æрдæгсакъадахы денуклеаризацийы алыварс уавæры æрцæудзысты стыр ивындзинæдтæ», – банысан кодта Ким Чен Ын. Уый куыд загъта, уымæ гæсгæ Пхеньяны ныфс ис Пекин æмæ иннæ цымыдисгæнæг фæрстимæ кусын, цæмæй Кореяйы æрдæгсакъадахы сфидар уа фидар æмæ дæргъвæтин сабырдзинад. «Китайæн уæлдай ахсджиаг нысаниуæг ис Цæгат Кореяимæ хæларадон æмгуыстадæн. Дунейы æмæ регионы уавæры ивындзинæдтæм нæ кæсгæйæ, Цæгат Кореяимæ хæларадон ахастыты рæзты фæдыл Китайы хицауады позици у æнæаивгæ», – банысан кодта Си Цзиньпин.

НОГÆЙ ТА СÆМ ÆРТХЪИРÆН КÆНЫ

АИШ-ы президент Дональд Трамп æртхъирæн кæны Китайы товартыл тарифтæ 10 проценты фæбæрзонддæр кæнынæй. Иумиагæй тарифтæ фæфылдæр уыдзысты 200 миллиард доллары. Уый размæ та АИШ китайаг товартыл фиддонтæ фæфылдæр кодтой 25 проценты. Уæд сын Китай дæр сдзуапп кодта æмбæлонæй. Китайы ацы къахдзæф нæ фæцыд Америкæйы зæрдæмæ æмæ та Трамп бахæс кодта китайаг товартыл номхыгъд саразын, кæцытыл фæфылдæр кæндзысты фиддонтæ. Пекины АИШ-ы архайдтытæ схуыдтой æндæвдад æмæ  шантаж.

УЫНАФФÆ КОДТОЙ МИГРАНТТЫ ФАРСТЫЛ

Германы канцлер Ангела Меркель æмæ Францы президент Эммануэль Макрон æруынаффæ кодтой Евроцæдисы миграцион проблемæйыл. Фембæлды рæстæджы Меркель фехъусын кодта йæ коллегæйæн, зæгъгæ, æнæмæнгхъæуæг у сæвзæргæ проблемæ аскъуыддзаг кæныны тыххæй иумиаг мадзæлттæ бакусын. Агентад Спутник куыд хъусын кæны, уымæ гæсгæ баныхæсты фæстæ канцлер фехъусын кодта, зæгъгæ, Париж æмæ Берлин сты Евроцæдисы æддагон арæнтæ сфидардæр кæныны фæдыл плæнтты æвварс.

ÆРУРОМДЗЫСТЫ ÆФСÆДДОН АХУЫРТÆ

АИШ æмæ Хуссар Корея аскъуыддзаг кодтой  Корейы æрдæгсакъадахы августы мæйы сплангонд иумиаг æфсæддон ахуыртæ фæстæдæр æмгъуыдмæ аргъæвыны тыххæй. 12 июны Сингапуры саммиты фæстæ АИШ-ы президент Дональд Трамп фехъусын кодта, зæгъгæ, Вашингтон æру-ромдзæн Хуссар Кореяимæ иумиаг æфсæд-дон ахуыртæ, цалынмæ Пхеньянимæ баны-хæстæ «раст» здæхты уагъд цæуой, уæдмæ.

СÆВÆРДЗÆН ФИДДОНТÆ

Уæрæсе фиддонтæ сæвæрдзæн америкæйаг товарты иу къордыл. Уый у дзуаппон къахдзæф АИШ æндон æмæ алюминийыл фиддонтæ кæй фæфылдæр кодта, уымæн. «Америкæйаг товартыл уæлæмхас фæсарæйнаг фиддонты хуызы мадзæлттæй пайда кæнын райдайдзысты æввахс рæстæджы. Уыдон хаудзысты æрмæстдæр ахæм продукцимæ, кæцытæн аналогтæ ис уæрæсейаг базары æмæ негативонæй нæ бандавдзысты макроэкономикон бæрæггæнæнтыл», – фехъусын кодта УФ-йы Экономикон рæзты министр Максим Орешкин.

ФЕХЪУСЫН КОДТОЙ СОВЕТÆЙ РАХИЗЫНЫ ТЫХХÆЙ

Америкæйы Иугонд Штаттæ фехъусын кодтой, зæгъгæ, уыдон рахиздзысты адæймаджы барты фæдыл ИНО-йы Советы скондæй. ИНО-йы АИШ-ы æдзухон минæвар Никки Хейли Советы схуыдта «цурон организаци, кæцы фыцы æрмæстдæр йæхи интересты тыххæй æмæ адæймаджы бартæ фестын кодта хынджылæггаг». АИШ фæстаг рæстæджы сæ хайадист æрурæдтой дунеон инициативæты æнæхъæн къорды. Ивгъуыд аз Трамп фехъусын кодта климаты фæдыл парижаг сразыдзинадæй рахизыны тыххæй, ацы аз та – Иранимæ ядерон бадзырдæй. Уымæй дарддæр ма АИШ фехъусын кодтой миграцийы тыххæй глобалон бадзырды дарддæр хайад кæй нæ исдзысты æмæ ЮНЕСКО-йæ рахизыны тыххæй. ИНО-йы Генералон секретарь Антониу Гуттераш сарæзта хъусынгæнинаг, цыран дзырдæуы, зæгъгæ, хуыздæр уаид, цæмæй АИШ баззайа Советы сконды. «Нырыккон дунейы адæймаджы барты уавæр хынцгæйæ, Советы скондæй рахизыны бæсты АИШ хъуамæ уæлдай активондæр хайад исиккой, ацы ахсджиаг фарсты», – банысан кодта уый.

АДАРДДÆР КОДТОЙ САНКЦИТÆ

Евроцæдисы Совет санкцитæ адарддæр кодта Хъырым æмæ Севастополы ныхмæ ноджы иу азы æмгъуыдмæ. Ацы аз марты мæйы Европæйаг дипломатийы сæргълæууæг Федерика Могерини бафидар кодта Евроцæдисы фæнд Хъырым æмæ Севастополы ныхмæ арæнгонд мадзæлттæ бахъахъхъæныны тыххæй.

ÆНАМОНД ЦАУ

Индонезийы Суматрайы сакъадахы Тобайы цады быран (паром) кæй фæдæлдон, уый фæстиуæгæн фæмард сты дыууæ адæймаджы, 180 адæймаджы та нымад цæуынц æбæрæгæй сæфтыл. Куыд хъусынчындæуы, уымæ гæсгæ нау туристон нæ уыд. Агурæн куыстытæ дарддæр цæуынц. Аирвæзын кодтой 19 адæймаджы.

Информацион агентадты

хъусынгæнинæгтæм гæсгæ

Comments are closed, but trackbacks and pingbacks are open.