ДÆ ЦÆСТ АХÆСС ДУНЕЙЫЛ

ÆРУЫНАФФÆ КОДТОЙ КЪОРД ФАРСТЫТЫЛ

Уæрæсейы Федерацийы æмæ Саудоваг Аравийы фæсарæйнаг хъуыддæгты министртæ Сергей Лавров æмæ Адель аль-Джубейрæн Мæскуыйы уыд баныхæстæ, цыран æруынаффæ кодтой къорд темæтыл, уыцы нымæцы Ираны ядерон программæйы фæдыл архайдтыты планыл дæр. Дыууæ фарс дæр цымыдис кæнынц, цæмæй уавæр скъуыддзаг æрцæуа политикон, дипломатон методтæй. Афтæ ма министртæ уынаффæ кодтой сириаг лигъдæтты сæ райгуырæн бæстæмæ раздахыны фарстыл дæр.

МАСШТАБОН МАНЕВРТÆ «ВОСТОК-2018»

Централон æфсæддон зылды æфсæдтæ æххæст скондæй хайад райсдзысты масштабон маневртæ «Восток-2018», цыран пайда кæндзысты хæстон архайдтытæ уадзыны ног формæтæ æмæ амæлттæй. Уæрæсейы хъахъхъæнынады министр Сергей Шойгу куыд фехъусын кодта, уымæ гæсгæ маневртæ «Восток-2018» уагъд æрцæудзысты 11-15 сентябры æмæ суыдзысты иууыл масштабондæр фæстаг 37 азы. Маневрты хайад райсдзысты 300 мин æфсæддон службæгæнæджы æмæ иу минæй фылдæр хæдтæхæджы, вертолеты æмæ æнæпилотоны.

БАХЪАСТ КОДТОЙ ОРГАНИЗАЦИМÆ

АИШ хъаст балæвæрдтой, Дунеон базарадон организацимæ Иугонд Штатты къорд товартыл Уæрæсе таможнæйон фиддонтæ кæй фæфылдæр кодта, уый тыххæй.  6-æм июны йæ тыхы бацыд УФ-йы Хицауады уынаффæ америкæйаг товарты 80 категорийыл 25 процентæй 40 проценты онг таможнæйон фиддонтæ фæфылдæр кæныны тыххæй. Уый уыд дзуаппон къахдзæф Вашингтоны аналогон мадзæлтты ныхмæ Уæрæсейæ ластцæуæг алюминий æмæ æндоныл АИШ фиддонтæ кæй фæфылдæр кодтой, уымæн. УФ-йы Экономикон рæзты министрады минæвар банысан кодта: «Мах архайæм сæрмагонд мадзæлтты фæдыл Дунеон базарадон организацийы Сразыдзинады фæлгæтты, кæцы фадат дæтты æндæр бæстæйæн æрхæсгæ  зианы «сæрмагонд хъахъхъæныны мадзæлттæй» скомпенсаци кæнынæн. Уый размæ ма Уæрæсейæ дарддæр Дунеон базарадон организацимæ АИШ-ыл хъаст балæвæрдтой  Китай, Инди, Евроцæдис, Канадæ, Мексикæ æмæ Норвеги.

УÆРÆСЕЙАГ РАКЕТÆЙЫ ÆНТЫСТДЖЫН ФÆЛВАРÆНТÆ

Казахстаны Сары-Шаганы полигоны УФ-йы Уæлдæфон-космикон тыхты æфсæддонтæ æнтыстджынæй сарæзтой ПРО-ты фыдыбæстæйон системæйы ног ракетæйы фæлварæн ауагъд. ПРО-ты системæйы ныхмæ ног ракетæ фæлварæнты серийы фæстæ бафидар кодта йæ характеристикæтæ æмæ æнтыстджынæй сæххæст кодта йæ хæс «йæ нысаныл» дырысæй сæмбæлгæйæ.

САНКЦИТЫ СХУЫДТА ÆНÆПАЙДА СТРАТЕГИ

Чехийы президент Милош Земан фехъусын кодта, зæгъгæ, Уæрæсейы ныхмæ Евроцæдисы санкцитæ сты кæрæдзийæн æнæпайда стратеги. Уый куыд банысан кодта, уымæ гæсгæ санкцитæ Уæрæсейæ стырдæр зиан хæссынц Евроцæдисæн. «Санкциты бæсты срекомендаци кæнин бирæ æмвæзадтыл адæмы ‘хсæн контакттæ», – загъта  Земан Евроцæдисы Парламентон Ассамблеяйы ныхас кæнгæйæ.

РАРГОМ КОДТОЙ НЫГУЫЛÆНЫ ПЛАН

Сирийы Идлибы провинцийы цæрæн пункт Саракибмæ æрбацыдысты дыууæ уæзласæн машинæйы хъæстæгæнæн буарадимæ. Знагиуæг фæрсты фидыдады фæдыл уæрæсейаг центры куыд фехъусын кодтой, уымæ гæсгæ уыдон цалдæр информаци райстой, провокаци кæй цæттæ кæнынц, уый тыххæй.

 

ЙÆ ЦАРДÆЙ АХИЦÆН ИОСИФ КОБЗОН

80-аздзыдæй йæ цардæй ахицæн Советон Цæдисы адæмон артист æмæ Паддзахадон Думæйы депутат Иосиф Кобзон. Артисты амæлæты фæдыл мæсæллæйы ныхæстæ загътой УФ-йы Президент Владимир Путин æмæ йæ коллегæтæ. Поэт Илья Резник Кобзоны схуыдта адæймаг-легендæ.  Адæмон артисты иууыл зынгæдæр зарджытæ сты «Смуглянка», «Старый клен», «С чего начинается Родина», «Я люблю тебя, жизнь», «Мгновения», «Темная ночь», «День Победы», «В городском саду» æмæ æндæртæ. Æдæпптæй йæ репертуары уыд æртæ мин композицийы бæрц.  Иосиф Кобзоны йæ фæстаг фæндагыл афæндæраст кæндзысты 2-æм сентябры.

РАЙГОНД НÆУ ОРГАНИЗАЦИЙЫ КУЫСТÆЙ

АИШ-ы президент Дональд Трамп фехъусын кодта, зæгъгæ, Вашингтон цæттæ  у Дунеон базарадон организацийæ рахизынмæ, кæд æмæ бацамынд орган йæ куыстмæ ивындзинæдтæ нæ бахæсса, уæд. Ацы аз июлы мæйы Трамп банысан кодта, зæгъгæ, АИШ бирæ азты дæргъы ис организацийы, сæхицæн дзы ницы пайда ис, афтæмæй.

ПРОТЕСТЫ ДЕМОНСТРАЦИТÆ

Германы горæт Хемницы ныр къуырийы дæргъы уагъд цæуынц протесты акцитæ, мигранттæ бынæттон цæрæджы кæй амардтой, уый фæдыл. Ист æрцыдысты æдасдзинады æмбæлон мадзæлттæ, кæцыты бынæттон цæрджытæ абарстой æфсæддон уавæримæ. Протестгæнджытæ равдыстой се ‘нæразыдзинад æмæ дзырдтой, зæгъгæ, канцлер Ангела Меркель фæсидт мигранттæм æмæ уыдон нырма дæр цæуынц æмæ цæуынц нæ бæстæмæ. Мах хъæуы æдасдзинад. Фæстаг æртæ азы горæты сырæзт фыдракæндты æмвæзад, нал дзы ис фæтк, – дзырдтой митинггæнджытæ.

ÆРУАРЫД МИТ

Туркы Карсы провинцийы туристон сезон йæ тæмæны куы ис, уæд дзы æруарыд мит. Уый фæстиуæгæн цалдæр сахатмæ æхгæд æрцыдысты фæндæгтæ популярон курорттæм. Синоптикты ныхæстæм гæсгæ, уæлдæфы температурæ цалдæр сахатмæ æрхауд 7 градусы онг.

Информацион агентадты хъусынгæнинæгтæм гæсгæ