Дæ цæст ахæсс дунейыл

ИСТ ÆРЦЫД ЗАКЪОН

УФ-йы Паддзахадон Думæ фыццаг бакасты райста закъон, расыгæй машинæ скъæрыны рæстæджы фæндагон-транспртон цауты аххосджынтæ чи суой, уыдоны ныхмæ æфхæрд фæкарздæр кæныны тыххæй.  «Фæндагон змæлд æмæ транспортон фæрæзты эксплуатацийы уагæвæрдтæ халыны тыххæй» закъонмæ ивындзинæдтæ бахæссыны тыххæй инициативæ ист æрцыд æмхъæлæсæй. Ног закъоны проектмæ гæсгæ, аварийы рæстæджы иу адæймаг куы фæмард уа, уæд аххосджынæн хаст æрцæудзæн ныртæккæйы 2-7  азы бæсты 5 азæй 12 азы онг ахæстоны фæбадыны тæрхон. Кæд æмæ фæмард уа дыууæ адæймагæй фылдæр, уæд та 8 азæй 15 азы онг. Æрвылаз дæр расыг шофырты аххосæй фæмард вæййынц 4 мин адæймагæй фылдæр, 20 мин адæймагæй фылдæр та свæййынц инвалидтæ.

РАЙСТОЙ 2,5 МИН КУЫРДИАТЫ

“Донецкы Адæмон Республикæйы уæрæсейаг паспорттæ райсыны тыххæй ныридæгæн ист æрцыд 2,4 мин куырдиаты”, – загъта республикæйы сæргълæууæг Денис Пушилин. Барамындмæ гæсгæ документтæм æркæсдзысты 3 мæйы æмгъуыдмæ. Дарддæр дæр ист цæуынц куырдиæттæ уæрæсейаг æмбæстагдзинад райсыны тыххæй.

ФЕСТЫ ÆФСÆДДОН АХУЫРТÆ

Гуырдзыстоны фесты æфсæддон ахуыртæ «LOGDEV 2019» 12 бæстæйы æфсæддонты хайадистæй. Ахуырты официалонæй сæхгæныны официалон церемони уыд Вазианийы цыппæрæм механизацигонд бригадæйы. Ахуыртæ райдыдтой 6-æм майы æмæ сæ хайад райстой Гуырдзыстон, Азербайджан, Албани, АИШ, Босни æмæ Герцеговина, Цæгат Македони, Черногори, Серби, Украинæ, Хорвати, Финлянди æмæ Швецийы – 130 æфсæддоны. Ахуыртæ уагъд æрцыдысты НАТО-йы инициативæмæ гæсгæ.

«ГЕРМАН АИШ-ы КОЛОНИ НÆУ»

“Германы парламенты газы фæдыл америкæйаг минæвары хъусынгæнинаджы банымадтой райсинаг чи нæу, ахæмыл. Герман равзæрста уæрæсейаг газы АИШ-ы æлхъывд газы бæсты”, – уый тыххæй фехъусын кодта экономикæ æмæ энергетикæйы фæдыл Бундестагы комитеты сæргълæууæг Клаус Эрнст Берлины дунеон газы конференцийы. «Экологон æгъдауæй уæрæсейаг æрдзон газ махæн у АИШ-ы æлхъывд газæй бирæ хуыздæр. Аргъмæ гæсгæ дæр америкæйаг газ уæрæсейаг газæн нæу конкурентонхъомдзинад», – фехъусын кодта немыцаг политик. Клаус Эрнст ма зæрдыл æрлæууын кодта, зæгъгæ, Герман АИШ-ы колони нæу, æмæ, зæгъ, уымæ гæсгæ Берлиныл Вашингтон кæй æндавы, цæмæй газуадзæн «Северный поток-2» урæд æрцæуа æмæ йæхи экономикон интерестæ европæйæгтæн тыхæй кæй хъары, уый райсинаг нæу.

АРВЫСТА ПРОТЕСТ

Цæгат Корея протестимæ фыстæг арвыста ИНО-йы Генералон секретарь Антониу Гутерришмæ Иугонд Штаттæ сын сæ бæстæйы базарадон нау кæй æрцахстой, уый тыххæй. «Искæйы исад байсыны ацы актæй дæр бæрæг у, АИШ æцæгæйдæр кæй сты гангстерон бæстæ, кæцы æппындæр ницæмæ дары дунеон барадон нормæтæ», – фехъусын кодта ИНО-йы Цæгат Кореяйы æдзухон минæвар Ким Сон.

НЫХКЪУЫРД РАДТОЙ АТАКÆЙÆН

Сирийаг уæлдæфон хъахъхъæнынадон тыхтæ ныхкъуырд радтой Голаны бæрзæндты ‘рдыгæй ракетон атакæйæн. Дзыллон информацийы фæрæзтæ куыд хъусын кæнынц, уымæ гæсгæ израилаг атакæйы нысан уыдысты Дамаскы цур Ираны æфсæддон объекттæ æмæ хæстон æрмæджытимæ æфтауцдæттæ.

ÆХСÆЗ УЫНАФФÆЙЫ

Йæ президентон æмгъуыды кæрон Петр Порошенко Украинæйы ног президент Владимир Зеленскийы командæйæн радта æхсæз уынаффæйы æддагон политикæйы фæдыл. Уыцы уынаффæты ‘хсæн сты Уæрæсейы ныхмæ санкцитæ фæтыхджындæр кæнын æмæ Евроцæдисмæ бацæуыны курс адарддæр кæнын.

ЗЕЛЕНСКИЙЫ ИНАУГУРАЦИ

20-æм майы Уæлдæр Радайы цытджын рабадты рæстæджы Владимир Зеленский официалонæй ссис Украинæйы президент. Уый ард бахордта, Украинæйы Конституцийыл къух æрæвæргæйæ. Ног президент йæхимæ хæс райста бæстæйы суверенитет æмæ хæдбардзинад хъахъхъæныны тыххæй. Зеленский йæ раныхасы ныфс бавæрдта, «Украинæйы Конституци æмæ закъæттæ кæй хъахъхъæндзæнис æмæ дунейы бæстæйы авторитет кæй бæрзонддæр кæндзæн, уымæй. Уый бахатыд Радамæ, цæмæй сæ бынæттæй ссæрибар кæна Украинæйы æдасдзинады советы сæрдары, генералон прокуроры æмæ хъахъхъæнынады министры.

ФЕХЪУСЫН КОДТА РАДАЙЫ АУАГЪДЫ ТЫХХÆЙ

Украинæйы ног президент Зеленский фехъусын кодта, зæгъгæ, æмгъуыдæй раздæр уæгъд кæны æстæм сæвзæрст Уæлдæр Радайы. Радамæ радон æвзæрстытæ хъуамæ уагъд æрцыдаиккой ацы аз октябры мæйы. Фæлæ ма ныр депутаттæн баззад дыууæ мæйы ныртæккæйы сконды кусынæн.

АЦÆУДЗЫСТЫ ОТСТАВКÆЙЫ

Украинæйы президент Владимир Зеленский йæ инаугурацийы рæстæджы фæндон бахаста, цæмæй хицауад отставкæйы ацæуа. Уый загъта: «Хицауад ницахæм проблемæтæ не скъуыддзаг кæны  – хицауад у нæ проблемæ дæр».

ФÆМАРД СТЫ 32 АДÆЙМАДЖЫ

Таджикистаны ныгуылæн хайы карз режимы колонийы змæстыты фæстиуæгæн фæмард сты 32 адæймаджы. Фæмардуæвджыты ‘хсæн сты ахæстоны æртæ кусæджы, иннæтæ сты, ахæстоны чи бадтысты, ахæмтæ. «Змæстыты архайдтой ахæстты къорд, кæцытæн стæрхончындæуыд «Пысылмон паддзахад»-ы уæнгады тыххæй. Уыдон кæрдтæ æмæ æндæр цыргъ предметтимæ амынæты райстой ахæстоны æртæ кусæджы æмæ сæ амардтой. Ахæсттæй аст адæй-маджы фæмард сты бунтгæнджыты къухтæй. Ахæстоны къухдариуæгады бахъуыд фæндвидар мадзæлттæ райсыны сæр уавæр æрбæстон кæныны тыххæй.

ТЕРАКТ

Египеты Каиры горæтгæрон национ музеймæ æввахс уыд срæмыгъд, кæцыйы фæстиуæгæн фæцæфтæ сты 17 адæймаджы. Бомбæ спырх, 25 бæлццонимæ туристон автобус ууылты куы рацæйцыд, уæд.

Информацион агентадты хъусынгæнинæгтæм гæсгæ