Сабаты киноконцертон зал «Чермен»-ы æрвылазон хыгъдон концерт гом урочы хуызы равдыстой Республикæ Хуссар Ирыстон æмæ Республикæ Абхазы сгуыхт артисткæ Четион Маяйы хореографион студийы сывæллæттæ. Ацы студи архайы Цхинвалы 2-æм астæуккаг скъолайы. Цы 130 сывæллоны дзы ис, уыдон дих сты æртæ къордыл – кæстæр, астæуккаг æмæ хистæр къордтыл.
Радон хатт дæр та сывæллæттæ сæ аив кафтæй барухс кодтой æрæмбырдуæвджыты зæрдæтæ. Уыдонæн сæ алы номыр дæр уыд аив, æххæст кодтой, æрмæст ирон кæфтытæ нæ, фæлæ абхазаг æмæ дагъыстайнаг кæфтытæ дæр. Иууыл диссаг та нæртон кафт «Симд» уыд. Йæ солисттæ Хъазиты Миленæ æмæ Наниты Давид тынг рæсугъд акафыдысты æмæ сæ залы уæв-джытæ дæр схорзæхджын кодтой дæргъвæтин къухæмдзæгъдæй.
Хореографион студи «Кафт» уæвынад кæны 20 азы бæрц. Ацы студийы сывæллæттæ бирæ хæттыты систы æхсæнадæмон конкурсты призертæ. Кæстæр кары къорд Санкт-Петербурджы æхсæнадæмон конкурс «Розы России»-йы бацахста фыццаг бынат. Æрæджы астæуккаг æмæ хистæр кары æвзонг артисттæ дæр уæлахизимæ æрыздæхтысты Хъырымæй. Уыдонæн XV Æхсæнадæмон фестиваль «Æнтыстыты фæндæгтыл» æцæгæй дæр уыд тынг хорз æнтыстытæ æмæ бацахстой фыццаг бынат æмæ рамбылдтой гран-при.
Алы æнтыстыл дæр бирæ тыхтæ, бирæ хъару æмæ нуæрттæ бахардз вæййы, фæлæ дæ куыстыл æнувыд куынæ уай, куынæ йæ уарзай, уæд дын æнтыстытæ дæр нæ уыдзæн. Ацы сывæллæтты æнтыстытæ сты Майя Четионы æнтыстытæ. Четион йæ куыстыл æнувыд куынæ уаид, ирон хореографион сфæлдыстады æмæ йæ дæлбар сывæллæтты куынæ уарзид, йæ уд уыдоныл хайгай куынæ дих кæнид, уæд Ирыстоны æддейæ ахæм конкурсты «йæ сывæл-лæттæ» нæ уæлахиз кæниккой.
Концерты рæстæджы дыккаг астæуккаг скъолайы директор Михаилиди схорзæхджын кодта, 2019 ахуыры азы алыгъуызон мидскъолайон конкурсты цы ахуырдзæутæ фæуæлахиз сты, уыдоны дæр. Схорзæхджын ма кодта афæдзы хуыздæр ахуыргæнджыты дæр.
Концерты фæстæ сценæмæ схызт Президент Бибылты Анатоли æмæ бузныджы ныхæстæ загъта Четион Майяйæн æмæ ансамбль «Кафт»-ы сывæллæттæн.
«Тынг зæрдиагæй кастæн концертмæ. Махæн диссаджы хорз сывæллæттæ ис. Мæн уырны, уыцы сывæллæттæн дæр ахæм хорз ныййарджытæ уыдзæнис. Уыдон сын уарзын кæнынц ахуыр, биноныг сын кæнынц культурæмæ уарзондзинад. Кæй зæгъын æй хъæуы, раст нæ уыдзæн, ансамблы хореографты æмæ къухдариуæггæнджыты зæрдиаг куыстæн ма саргъ кæнын, уыдоны руаджы чысыл артисттæн сæ къухы бафтыд сценæйыл диссаджы хореографи æмæ артистизм равдисын. Стыр бузныг уын уе ‘нтыстыты, уæ уæлахизы тыххæй», – загъта Бибылты Анатоли.
Уый банысан кодта ансамблы æнтыстытæм Четионы стыр хайбавæрд дæр.
«Майя у ахæм адæймаг, кæцы цæры ацы сывæллæтты цардæй, цæры кæфтытæ æмæ культурæйæ. Уый æнæхъæнæй дæр йæхи снывонд кодта уарзон хъуыддагæн», – банысан кодта Президент. Уый ма бузныджы ныхæстæ загъта дыккæгæм астæуккаг скъолайы къухдариуæгадæн, сæрмагондæй та скъолайы директор Михаилиди Ольгайæн, ансамблы размæцыдæн кæй æххуыс кæны, уый сæраппонд.
Йæ рады Михаилиди дæр бузныг загъта Бибылты Анатолийæн, сæ коллективмæ йæ лæмбынæг ахасты тыххæй, алы хатт дæр сæ фарсмæ кæй балæууы æмæ сæм йе ‘ххуысы къух скъоламæ кæй фæдары, уый тыххæй.
Осиаты Индирæ
Comments are closed, but trackbacks and pingbacks are open.